ރިޝްވަތު ހިފުމާއި މަނީ ލޯންޑަރިންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނު ގެއަށް ބަދަލުކޮށްދިނުމަށް އެދި އިދިކޮޅު ކޯލިޝަނުގެ އިސްވެރިން މި ސަރުކާރުގައި ގެންދަނީ އާދޭސް ކުރަމުން ކަމަށް ޕީޕީއެމްގެ ނައިބު ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޔާމީނު މިނިވަންކުރުމަށް ގޮވާލާ އިދިކޮޅުން އިއްޔެ މާލޭގައި ބޭއްވި ހަރަކާތުގައި ވާހަކަދައްކަވަމުން މުއިއްޒު ވިދާޅުވީ ޔާމީނު ޖަލުގައި ހުންނެވީ ނުހައްގުން ކަމަށާއި އިދިކޮޅުގެ އިސްވެރިން ދަނީ ޔާމީނު ގެއަށް ބަދަލުކޮށްދިނުމަށް އެދި އާދޭސް ކުރަމުން ކަމަށެވެ.
"އަޅުގަނޑުމެން އެދި މި ދަންނަވަނީ މި ސަރުކާރުގައި މި ރޯދަ މަސް އައުމުގެ ކުރިން އެމަނިކުފާނު ގެއަށް ބަދަލުކޮށްދިނުމަށް، (އިދިކޮޅު) ލީޑަޝިޕުގެ ހުރިހާ އެންމެން، ޕީޖީގެ ހުރިހާ އެންމެން، އެކި ސިފަސިފައިގަ ސަރުކާރުގެ އެންމެ މަތިން ގޮސް އެކި ވެރިންނަށްވެސް އާދޭސްކޮށް ދަންނަވަމުން އެބަދަން އެމަނިކުފާނު ގެއަށް ބަދަލުކޮށްދިނުމަށް," މުއިއްޒު ވިދާޅުވި އެވެ.
އަދި، މި ސަރުކާރަކީ އެއްވެސް ގޮތެއްގައި އިންސާނިއްޔަތު ކަމަށް ލޯބިކުރާ ސަރުކާރެއް ނޫން ކަމަށާއި ޔާމީނު ގެއަށް ބަދަލުކޮށްގެން މި ސަރުކާރަށް އޮތް ގެއްލުމެއް ނުވިސްނޭ ކަމަށްވެސް މުއިއްޒު ވިދާޅުވި އެވެ.
"މި ސަރުކާރަކީ، ރައީސުލްޖުމްހުރިއްޔާއަށް ހުންނެވި ބޭފުޅަކީ އެއްވެސް ގޮތަކަށް އިންސާނިއްޔަތު ކަމަށް ލޯބިކުރާ ބޭފުޅެއް ނޫންކަން މިކަމުން ފެނިގެންދޭ."
މީގެ ކުރިންވެސް، މަނީ ލޯންޑަރިންގެ ކުށް ސާބިތުވެ ޔާމީނުގެ މައްޗަށް އިއްވި ފަސް އަހަރުގެ ހުކުމުގެ ތެރެއިން އިދިކޮޅާއި ޔާމީނުގެ ވަކީލުންގެ ޓީމުގެ އެދުމަށް އެމަނިކުފާނު ގެއަށް ބަދަލުކުރި އެވެ. އޭޕްރީލް 2021 ގައި ޔާމީން ގެއަށް ބަދަލުކުރި ސަބަބެއް ކަމުގައި އޭރު ބުނީ ޖަލުގައި ކޮވިޑު ފެތުރެމުން ދިއުމެވެ. އެއަށްފަހު ސުޕްރީމް ކޯޓުން އެމަނިކުފާނުގެ މައްޗަށް ކުރި ހުކުމް ބާތިލުކޮށް މިނިވަންކުރަންދެން ހުންނެވީ ގޭގަ އެވެ.
އިދިކޮޅުގެ ރިޔާސީ ޓިކެޓުވެސް ހަވާލުކޮށްފައިވާ ޔާމީނުގެ މައްޗަށް 11 އަހަރުގެ ޖަލު ހުކުމެއް އިއްވީ ވ. އާރަށް ކުއްޔަށް ދިނުމުގައި ރިޝްވަތު ހިފާ، އެ ފައިސާ ލޯންޑާ ކުރި ކަމުގެ ކުށް ސާބިތުވެ މިދިޔަ ޑިސެމްބަރު މަހުގެ 25 ގަ އެވެ.
ކްރިމިނަލް ކޯޓުގެ މި ހުކުމް ޔާމީނުގެ ވަކީލުންގެ ޓީމުން މިހާރު ވަނީ ހައި ކޯޓުގައި އިސްތިއުނާފުކޮށްފަ އެވެ. ޔާމީނުގެ ވަކީލުންގެ ޓީމުން މީގެ ކުރިން ބުނެފައިވަނީ މި މަހުގެ ތެރޭގައި އިސްތިއުނާފީ މައްސަލަ ނިންމާ ޔާމީނު މިނިވަން ވާނެ ކަމަށް ބެލެވޭ ކަމަށެވެ.
އިދިކޮޅުގެ ރިޔާސީ ޓިކެޓު ޔާމީނަށް އަރުވާފައިވީ ނަމަވެސް ހުކުމުގެ ސަބަބުން މިވަގުތު ޔާމީނަށް މި އަހަރުގެ ރިޔާސީ އިންތިހާބުގައި ވާދައެއް ނުކުރެއްވޭނެ އެވެ. ސަބަބަކީ ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހުމެވެ.
