ރިޝްވަތުގެ ގޮތުގައި ގިނަ އަދަދެއްގެ ފައިސާ ނަގައިގެން ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ގެ ދަށުގައި އޮންނަ ތިލަފުށީގެ ބިމެއް ވިއްކަން މަސައްކަތް ކުރި އެތަނުގެ މުވައްޒަފަކު ސަސްޕެންޑުކޮށްފި އެވެ.
އެ ކޯޕަރޭޝަންގެ ޕަބްލިކް ރިލޭޝަންސް މެނޭޖަރު އަހުމަދު މިމްރާހު މިއަދު "އަދަދު" އަށް ވިދާޅުވީ ބިން ވިއްކާލަން މަސައްކަތް ކުރި މައްސަލައެއް އެ ކުންފުނީގެ ސަމާލުކަމަށް އައިސްފައިވާ ކަމަށެވެ.
"އަދަދު" ނޫހަށް މައުލޫމާތު ލިބިފައިވާ ގޮތުގައި އެ ބިން ވިއްކާލަން މަސައްކަތް ކޮށްފައި ވަނީ އެއް މިލިއަނެއްހާ ރުފިޔާއަށް ކަމަށެވެ.
އެ މައްސަލަ އިންޓާނަލް އޮޑިޓެއްގެ ތެރެއިން ފެންމަތިވުމާއެކު، ފުލުހުންނާ ގުޅިގެން މިހާރު މައްސަލަ ތަހުގީގު ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ނަމަވެސް އޭގެ އިތުރު ތަފުސީލެއް އެ ކުންފުނިން ނުދެ އެވެ. އެ މައްސަލަ ފުލުހުންގެ އިދާރާއަށް ހުށަހަޅާފައިވާކަން ނުވަތަ ނޫންކަމެއް ވެސް އެޗްޑީސީން ނުބުނެ އެވެ.
އެކަމާ ގުޅިގެން ބައެއް ފަރާތްތަކުން ވަނީ އެޗްޑީސީން އޮޅުވާލައިގެން ބިން ވިއްކާފައިވާ ކަމަށް ބުނެފަ އެވެ. ނަމަވެސް، އެ ކުންފުނިން ވަނީ އެކަން ދޮގުކޮށްފަ އެވެ.
"އާއްމުކޮށް ހުޅުވާލައިގެން ގެޒެޓުގައި އިޢުލާންކުރުމަކާ ނުލާ، އަދި އެޗްޑީސީގެ ބިޑް ޕޯރޓަލްގައި ރެޖިސްޓަރ ނުވާ އެއްވެސް ފަރާތަކަށް ބިމެއް ނުވިއްކާނެކަމާއި އަދި ބިން ވިއްކުމަށް ހުޅުވާ ނުލާނެ،" އެޗްޑީސީން ބުނެފައިވެ އެވެ.
އެ މައްސަލަ ފެންމަތިވެފައިވަނިކޮށް، އެޗްޑީސީގެ ތިޖޫރީއަކުން ވައްކަން ކުރި މުވައްޒަފަކު ވެސް މިއަދު ވަނީ ވަޒީފާއިން ވަކިކޮށްފަ އެވެ.
