އިމާރާތުން ވެއްޓުމުގެ ވަކި ދެ ހާދިސާއެއްގެ އަންހެނަކާއި ކުޑަ ކުއްޖަކު މަރުވި ކަމަށް އިއްޔެ ރިޕޯޓުކުރި އެވެ.

ފުލުހުން ބުނީ ހެންވޭރުގައި ހުންނަ އިމާރާތުން ރޭ އިރައިކޮޅު ވެއްޓި މަރުވެފައި ވަނީ 32 އަހަރުގެ އަންހެނެކެވެ. އޭނާ އައިޖީއެމްއެޗަށް ގެންދިޔައިރު ވެސް އޮތީ މަރުވެފަ އެވެ.

އަދަދު ނޫހަށް އެނގިފައިވާ ގޮތުގައި އެ ހާދިސާގައި ނިޔާވީ ފުވައްމަލަކު ހަދީޖާ އަލިދީދީ އެވެ. އޭނާ އަކީ މީހަކާ ކައިވެނިކޮށްގެން އުޅޭ، ދެ ދަރިންގެ މައެކެވެ. އޭނާ ދާދި ފަހުން މާލެ ދިޔައީ ފަރުވާއެއް ހޯދުމަށެވެ.

ދެވަނަ ހާދިސާ އަކީ ހ. އެސްޕީ ވިލާ ފަސް ވަނަ ފަންގިފިލާގެ ބެލްކަނިން ހަތަރު އަހަރުގެ ފިރިހެން ކުއްޖަކު ވެއްޓި މަރުވުމެވެ. ނޫމާން ބިން މުހައްމަދު މަރުވީ އޭޑީކޭ ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ.

އެންހެން މީހާ އަދި ކުޑަ ކުއްޖާ ވެއްޓެން މެދުވެރިވި ސަބަބު ފުލުހުން އަދި ހާމައެއް ނުކުރެ އެވެ.

މުހިންމު ބައެއް ހަބަރު

• ކްރިމިނަލް ކޯޓު ވަގުތީގޮތުން ހިންގުން އެ ކޯޓުގެ ގާޒީ އާދަމް މުހައްމަދާ ހަވާލުކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

• ޕްލޭނިން މިނިސްޓްރީއިން ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އާ ހަވާލުކޮށްގެން ކުރިއަށް ގެންދާ އަމީނީ މަގު ތަރައްގީ ކުރުމުގެ މަޝްރޫއުގެ ތަފުސީލު ހާމަކުރުމަށް އެ މިނިސްޓްރީއަށް އިންފޮމޭޝަން ކޮމިޝަނުން އެންގީ ރަނގަޅަށް ކަމަށް ހައި ކޯޓުން މިއަދު ހުކުމް ކޮށްފި އެވެ.

• ޕޯސްޓް މެދުވެރިކޮށް ރާއްޖެއަށް އެތެރެކުރި 120 ގްރާމްގެ މަސްތުވާތަކެތި ކަސްޓަމްސް އިން އަތުލައިގެންފި އެވެ.

• ކުރިއަށް އޮތް ރޯދަ މަހު މާލެ ސަރަހައްދުގައި މުދާ އުފުލޭ ވަގުތުތައް އިއުލާންކޮށް އެ އެންގުމާ ހިލާފުވާ ފަރާތްތައް ޖޫރިމަނާ ކުރާނެ ކަމުގެ އިންޒާރު ޓްރާންސްޕޯޓު މިނިސްޓްރީއިން ދީފި އެވެ.

• ސިޔާސީ ޕާޓީތަކަށް ވަންނަ ފޯމު ހުށަހެޅުން އޮންލައިން ޕޯޓަލްއެއް މެދުވެރިކޮށް ކުރެވޭނެ ގޮތް ހަމަޖައްސައި ކަރުދާސް ފޯމުތައް ރައްކާކުރުމުގެ ޒިންމާ ޕާޓީތަކަށް މަތިކޮށްފި އެވެ.

ދުވަހުގެ ކޯޓޭޝަން

ސަރުކާރުކުންފުނިތަކާއި ދައުލަތުގެ އިދާރާތަކުގެ ކުނި ނެގުމުގެ އަގު ވޭސްޓު މެނޭޖްމެންޓް ކޯޕަރޭޝަން (ވެމްކޯ) ބޮޑުކުރުމާ ގުޅިގެން ކުންފުނީގެ މެނޭޖިން ޑިރެކްޓަރު މޫސާ ސިރާޖު ވިދާޅުވީ؛

ބައެއް ބަދަލު ގެނެވިފައި މިވަނީ ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކަށް، އެގޮތުން އިދާރާތަކަށް އަލަށް ކަނޑައެޅި ރޭޓަކީ 1.25ރ، ކުންފުނިތަކަށް ކަނޑައެޅި ރޭޓަކީ ކިލޯއަކަށް 2.25ރ، އޭގެ އިތުރުން އަމިއްލަ ފަރާތްތަކުން ޓްރާންސްފާ ސްޓޭޝަންތަކަށް ގެންނަ ކުންޏަށް އަލަށް ކަނޑައެޅުނު ރޭޓަކީ 1.06ރ،"

ދުވަހުގެ ފޮޓޯ

ޗައިނާގެ އެހީގައި މާލޭގެ ބޮޑުތަކުރުފާނުގެ ބައެއްގައި ޖެހި ޒަމާނީ ބޮކި ދަނޑިތައް އިފުތިތާހުކުރުމުގެ ރަސްމިއްޔާތުގެ ތެރެއިން. -- ފޮޓޯ: މުހައްމަދު ޝާބިން/އަދަދު