އަހްމަދުއާބާދު، އިންޑިއާ (13 މާޗު) - އޮސްޓްރޭލިއާއާ ދެކޮޅަށް އިންޑިއާ އިން ކުޅެމުންދާ ޓެސްޓް ސިލްސިލާގެ ހަތަރު ވަނަ ޓެސްޓް މެޗުގައި އިއްޔެ އިންޑިއާގެ ވިރާތު ކޯލީ ސެންޗަރީއެއް ހަދައިފި އެވެ.
މިއީ ތިން އަހަރުގެ ތެރޭގައި ކޯލީ ޓެސްޓް މެޗެއްގައި ހެދި ފުރަތަމަ ސެންޗަރީ އެވެ. އޭނާ އެންމެ ފަހުން ސެންޗަރީއެއް ހަދާފައިވަނީ 2019 ވަނަ އަހަރު ނޮވެބަރު މަހުގަ އެވެ.
އިންޑިއާގައި ކުރިއަށްދާ ޓެސްޓް ސިލްސިލާގެ ހަތަރު ވަނަ ޓެސްޓްގައި ވިރާތު ވަނީ 186 ލަނޑު ހަދައިފަ އެވެ. ވިރާތު ވަނީ 364 ބޯޅައިން، 15 ބޯޅަ ހަތަރަކަށް ޖަހައިފަ އެވެ.
މި ސިލްސިލާގައި އިންޑިއާ 2-1 އިން ކުރީގައި އޮތްއިރު، ޓެސްޓް ފަހު ދުވަހަށް ކުރިމަތިލާއިރު އެ ޓީމު އަތުލުމަށް އޮސްޓްރޭލިއާ އަށް މާބޮޑު ފުރުސަތެއް ނެތެވެ.
ވިރާތު، 34، ޑަބަލް ސެންޗަރީ އަކާ ގާތްވެފައިވަނިކޮށް، އޭނާ ނުބައިވީ އޭނާ ޖެހި ބޯޅައެއް އޮސްޓްރޭލިއާގެ މާނަސް ލަބުސްޗާނޭ ހިފުމުންނެވެ.
ތިން އަހަރުގެ ތެރޭގައި ޓެސްޓް މެޗެއްގައި ހެދި ފުރަތަމަ ސެންޗަރީއާ އެކު، ވިރާތު އަށް ވަނީ ބޮޑު ހިތްހަމަޖެހުމެއް ލިބިފަ އެވެ. އޭނާ ޕިޗުން ފާބައިގެން ދިޔައިރު ސަޕޯޓަރުން ވެސް ބޮޑު ތަރުހީބެއް ދިނެވެ.
އިންޑިއާ އިން އިނިންސްގެ ނިންމާލީ 571 ލަނޑާއެކު އެވެ. ފުރަތަމަ އިނިންސްގައި 91 ލަނޑުގެ ލީޑެއް ނެގިއެވެ.
