މާލޭގެ ގެއެއްގެ ބެލްކަނިން ހަތަރު އަހަރުގެ ފިރިހެން ކުއްޖަކު ވެއްޓި މަރުވެއްޖެ އެވެ.
އެ ކުއްޖާ ވެއްޓުނީ، ހ. އެސްޕީ ވިލާ ފަސް ވަނަ ފަންގިފިލާގެ ބެލްކަނިންނެވެ.
ފުލުހުންގެ އޮފިޝަލަކު ވިދާޅުވީ އެ ކުއްޖާ މަރުވީ އޭޑީކޭ ހޮސްޕިޓަލަށް ގެންގޮސް ފަރުވާ ދެމުން ދަނިކޮށް ރޭ މެންދަމު 2:00 ޖަހާކަންހާއިރު ކަމަށެވެ. އިތުރު ތަފްސީލެއް ފުލުހުން އަދި ނުދެ އެވެ.
އެ ކުއްޖާ ވެއްޓެއް މެދުވެރިވި ސަބަބެއް އަދަދު ނޫހަކަށް ކަށަވަރެއް ނުވެ އެވެ.
ނަމަވެސް އާއިލާގެ މީހަކު ބުނީ ކުއްޖާ ވެއްޓުނުކަން އެނގުނީ ކޮޓަރީގައި ނެތިގެން ހޯދަމުން ދަނިކޮށެވެ.
"އެ ކުއްޖާ އޮތީ ނިދާފައި. އެ ކޮޓަރީގައި އޭނާގެ ބޭބެ ހުރެފައި ގޭގެ ތެރެއަށް ނުކުމެލާފައި ދެން ވަން އިރު ނެތިންގެން ބެލީ. ގޭގެ އެއްވެސް ތަނެއްގައި ނެތިގެން ތިރިއަށް ބެލިއިރު ވެއްޓިފައި އޮތީ. ކުއްޖާ ނެގީ މަގުމަތިން ބަޔަކު،" ނޫހަށް މައުލޫމާތު ދިން މީހާ ބުންޏެވެ.
އެސްޕީ ވިލާ ހުންނަނީ ދެ ބަޔަކަށްވާ ގޮތަށް ވަކިން އިމާރާތް ކޮށްފަ އެވެ. ކުއްޖާ ވެއްޓުނީ އުނިމާ ގްރޭންޑާ ހޮޓެލްއާ ޖެހިގެން އިރަށް ހުރި ބައިގެ ފަސް ވަނަ ފަންގިފިލާއިންނެވެ. އެ އިމާރާތުގެ ބެލްކަނިތައް ހުރީ ރާނައިފަ އެވެ.
އެ މައްސަލަ ފުލުހުން ދަނީ ތަހުގީގުކުރަމުންނެވެ.
މިދިޔަ އަހަރުގެ އޭޕްރީލް މަހު ހުޅުމާލޭ އިމާރާތެއްގެ ފަސް ވަނަ ފަންގިފިލާއިން ހަތަރު އަހަރުގެ އަންހެން ކުއްޖަކު ވެއްޓި މަރުވެފައިވެ އެވެ.
