އަންނަ މަހު 15 ގައި ބާއްވާ ރައްޔިތުން މަޖިލީހުގެ ކ. ގުރައިދޫ ދާއިރާގެ ބައި-އިލެކްޝަނުގައި މޯލްޑިވްސް ތާޑްވޭ ޑިމޮކްރަޓްސް (އެމްޓީޑީ) އިން ވެސް ކެންޑިޑޭޓަކު ނެރުމަށް ނިންމައިފި އެވެ.
އެ ޕާޓީއިން އިއްޔެ ކުރި އިއުލާނެއްގައި ބުނެފައިވަނީ އިންތިހާބުގައި ވާދަކުރުމަށް ބޭނުންވާ އެ ޕާޓީގެ މެންބަރުން އެކަމަށް އެދި ފޯމު ހުށަހެޅުމުގެ ފުރުސަތު މާދަމާ ހަވީރު 5:00 އާ ހަމައަށް އޮންނާނެ ކަމަށެވެ. ނަމަވެސް، ކެންޑިޑޭޓަކު ކަނޑައެޅުމުގައި އެ ޕާޓީއިން ޕްރައިމަރީއެއް ބާއްވާނެ ކަން ނުވަތަ ނޫންކަން ހާމަކޮށްފައެއް ނުވެ އެވެ.
އެމްޓީޑީއަކީ ކުރީގެ ނައިބު ރައީސް އަހުމަދު އަދީބު އިސްވެ ހުންނަވައިގެން އުފެއްދެވި ޕާޓީއެކެވެ.
ގުރައިދޫ ދާއިރާގެ ރައްޔިތުންގެ މަޖިލީހުގެ ގޮނޑި ހުސްވީ އެ ދާއިރާގެ މެންބަރު ކަމުގައި ހުންނެވި އިބްރާހިމް ރިޒާ, 55, މި މަހުގެ 23 ގައި އަވަހާރަވުމާ ގުޅިގެންނެވެ. މައުލޫމާތު ލިބިފައިވާ ގޮތުގައި ރިޒާ އަވަހާރަވީ ކެންސަރުގެ އާލާސްކަންފުޅުގައި މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ.
ގުރައިދޫ ދާއިރާގެ ބައި-އިލެކްޝަނަށް ކުރިމަތިލުމުގެ ފުރުސަތު މިދިޔަ މަހުގެ 26 ވަނަ ދުވަހު ހުޅުވާލާފައިވާއިރު ގާނޫނު ބުނާގޮތުން ފޯމު ބަލައިގަތުމަށް އޮންނަ މުއްދަތަކީ ހުޅުވާލާ ތާރީހުން ފެށިގެން 14 ދުވަހުގެ މުއްދަތަކަށެވެ.
މި އިންތިހާބުގައި އިދިކޮޅު ޕީޕީއެމް އިން ކެންޑިޑޭޓެއްގެ ގޮތުގައި ކުރީގެ މެންބަރު އިބްރާހީމް ރިޒާގެ ކޮއްކޮ ހުސައިން ރިޒާ ހަމަޖައްސާފައިވާއިރު، ދެން ވާދަކުރާނެ ކަމަށް އިއުލާންކޮށްފައިވާ އެމްޑީޕީއިން ކެންޑިޑޭޓަކު ހޮވުމަށް ބާއްވާ ޕްރައިމަރީ މާދަމާ ކުރިއަށްދާނެ އެވެ.
އެ ޕްރައިމަރީގައި ވާދަކުރައްވާ ހަތަރު މީހުންނަކީ:
މުހައްމަދު މުސްތަފާ – ވިވިޑް / ކ. މާފުށި
ސަލްމާން ރަޝީދު – މާފަރިވާގެ / ކ. މާފުށި
އިބްރާހިމް ޝާޒް – ހ. ތާޅަފިލިގެ / މާލެ
އަބްދުﷲ ސައީދު – ވެލި / ކ. ގުރައިދޫ
ގާނޫނުއަސާސީގެ 78 މާއްދާގައި ބުނެފައިވާ ގޮތުން މެންބަރެއްގެ ގޮނޑި ހުސްްވާ ތާރީހުން ފެށިގެން ދެ މަސް ދުވަހުގެ ތެރޭގައި އެ ދާއިރާއެއްގެ ބައި އިލެކްޝަން ބާއްވަންޖެހެ އެވެ. ގުރައިދޫ ދާއިރާގައި ހިމެނޭ ރަށްތަކަކީ، ގުރައިދޫގެ އިތުރުން މާފުއްޓާއި ގުޅި އެވެ.
