ވައިގެ މަގުން ދިވެހިރާއްޖެ އަށް އަންނަ ބިދޭސީއަކު ދިވެހިރާއްޖެ އަށް މަސްތުވާތަކެތި އެތެރެ ކުރަން އުޅޭކަމަށް ޝައްކު ކުރެވޭ ހާލަތްތަކުގައި އެ ފަރާތްތަކާމެދު އަމަލުކުރާނެ ގޮތުގެ ގަވާއިދުގެ ނަމުގައި 26 ޖެނުއަރީ 2023 ގައި ގެޒެޓުކުރެވުނު ގަވައިދުގެ ދަށުން މިހާތަނަށް ފޮނުވާލާފައިވަނީ އެންމެ މީހެއް ކަމަށް އިމިގްރޭޝަނުން ބުނެފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހެންވެއިރު ހުޅަނގު ދާއިރާގެ މެންބަރު ހަސަން ލަތީފް ވަނީ މިކަމާ ގުޅޭ ގޮތުން ޑިފެންސް މިނިސްޓަރު މާރިޔާ ދީދީއާ ލިޔުމުން ސުވާލުކޮށްފަ އެވެ.
އޭނާ ސުވާލުކޮށްފައިވަނީ އެ ގަވައިދުގެ ދަށުން ކިތައް މީހުން އަނބުރާ ފޮނުވާލާފައިވޭތޯއާއި އެ މީހުން އެތެރެ ކުރި މަސްތުވާތަކެތީގެ ބާވަތާއި އަދަދުގެ އިތުރުން އެ މީހުން ނިސްބަތްވާ ގައުމުގެ ސަރުކާރާ ހަވާލުކޮށްފައިވޭތޯ އެވެ.
އެ ސުވާލަށް މިނިސްޓަރު ފޮނުވި ޖަވާބުގައި ވަނީ އިމިގްރޭޝަން އާއި ކަސްޓަމްސްގެ ޖަވާބު އެކަމުގައި ހިމަނައިފަ އެވެ.
ކަސްޓަމްސްއިން ބުނެފައިވާ ގޮތުގައި އެ ގަވައިދުގެ ދަށުން އަނބުރާ މީހުން ފޮނުވުމުގެ ބާރު ލިބިފައިވަނީ ކޮންޓްރޯލާ އޮފް އިމިގްރޭޝަން އަށެވެ. އަދި ކަސްޓަމްސްގެ ޒިންމާއަކީ ފޮށި ބަލައި ފާސްކުރުން ކަމަށް ވުމާއެކު، މަސްތުވާތަކެތި ފެނިއްޖެ ނަމަ ފުލުހުންނާ ހަވާލުކޮށް އެ މީހަކު އިމިގްރޭޝަން އާ ހަވާލުކޮށްފައިވާ ކަމަށް ބުނެފައިވެ އެވެ.
އަދި ރާއްޖެއިން އަނބުރާ ފޮނުވާލި ފަސިންޖަރުގެ ފޮށި ބަލާ ފާސްކޮށްފައިވަނީ އިންޓެލް މައުލޫމާތު ލިބިގެން ކަމަށްވާތީ އޭނާގެ ފޮށި ފާސްކޮށްފައިވަނީ ފުލުހުންގެ ހާޒިރުގައި ކަން ވެސް ފާހަގަކޮށްފައިވެ އެވެ.
ކަސްޓަމްސްއިން ބުނެފައިވާ ގޮތުގައި އޭނާގެ ފޮށިން ފެނިފައިވަނީ 2.6 ކިލޯގެ ކޮކެއިން ޕެކިނާއެކު ފެނިފައިވެ އެވެ.
އިމިގްރޭޝަންގައި ބުނެފައިވާ ގޮތުގައި ރާއްޖެއަކީ އައިކާއޯގެ މެންބަރު ގައުމަކަށް ވެފައި އިމިގްރޭޝަން ގާނޫނުގެ ދަށުން "އިންއެޑްމިސަބަލް ޕަސިންޖަރުން"ނަކީ ލަސްނުކޮށް އެ ފަރާތަކު އައި ފްލައިޓުން އަނބުރާ ފޮނުވާލަން ޖެހޭ ކަމަށެވެ. އަދި މިހާލަތުގައި ބްރެޒިލްގެ މީހާއާ މެދު އަމަލުކޮށްފައިވަނީ ވެސް އެގޮތަށް ކަމަށް ބުނެފައިވެ އެވެ.
ހަސަން ލަތީފް ވަނީ މިނިސްޓަރުގެ ޖަވާބުގައި އެ ފޮނުވާލެވުނު މީހާ ބްރެޒިލް ސަރުކާރާ ހަވާލުކުރެވުނު ކަން ނުވަތަ ނޫން ކަން ބަޔާން ކުރެވިފައި ނުވާ ކަން ފާހަގަކޮށްފަ އެވެ.
