ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ނަމުގައި ފޭކު މެސެޖުތަކެއް ފޮނުވަމުން ދާތީ ސަމާލުވާން އެ ކުންފުނިން އިލްތިމާސްކުރި ކަމަށް އިއްޔެ ރިޕޯޓުކުރި އެވެ.

އެޗްޑީސީގެ ނަމުގައި ގުނަމުން ދަނީ 7240232 ނަންބަރުން ކަމަށާއި، އެ ނަންބަރުން ގުޅައި ޒާތީ މައުލޫމާތާއި ފޯނަށް އަންނަ ކޯޑެއް ހިއްސާކޮށްދިނުމަށް އެދޭ ކަމަށް އެ ކުންފުނިން ބުނެ އެވެ. އަދި އެޗްޑީސީގެ ނަމުގައި ލިންކުތަކެއް ވެސް ފޮނުވަ އެވެ.

ނަމަވެސް، އެފަދަ ގޮތަށް މެސެޖާއި ފޯނުން ގުޅައި ޒާތީ މައުލޫމާތާއި ފޯނަށް އަންނަ ކޯޑެއް ހޯދަން އެ ކުންފުނީގެ ފަރާތުން ނުގުޅާނެ ކަމަށް އެޗްޑީސީން ބުނެ އެވެ.

މިފަދަ ކޯލުތައްކޮށް މީހުން އަތުން ފައިސާ ފޭރުމުގެ މައްސަލަތައް ވަނީ އިތުރުވެފަ އެވެ. ބައެއް ފަހަރު ފޯނަށް އަންނަ ކޯޑު ހިއްސާކުރުމުން ބޭންކު އެކައުންޓުން ވައްކަންކޮށްފައި ވެސް އެބަހުއްޓެވެ. އަދި ބޮޑެތި ކުންފުނިތަކުގެ ނަމުގައި ލަކީޑްރޯތަކުން އަގު ބޮޑެތި އިނާމު ލިބޭ ކަމަށް ބުނެ އޮޅުވާލައިގެން ފައިސާ ހޯދަން ވެސް މަސައްކަތްކޮށްފައި އެބަހުއްޓެވެ.

މުހިންމު ބައެއް ހަބަރު

• ސީރިޔާ އަދި ތުރުކީގެ ބައެއް ހިސާބުތަކަށް މިދިޔަ މަހު އައި ބިންހެލުމުގައި ހާލުގައި ޖެހުނު މީހުންނަށް އެހީވުމަށް ކަމަށް ބުނެ މޯލްޑިވްސް ރެޑް ކްރެސެންޓުގެ ނަން ބޭނުން ކުރަމުންދާތީ އެގޮތަށް ކަންތައް ނުކުުރުމަށް އެ ޖަމިއްޔާއިން ވަނީ އެދިފަ އެވެ.

• ވިލިމާލޭގައި ކޮމާޝަލް އިމާރާތެއް އެޅުމަށް ރެޑްވޭވަށް ބިމެއް ދޫކުރީ އޮންނަ އުސޫލުތަކުގެ ތެރެއިން ކަމަށް މާލެ ސިޓީ ކައުންސިލުން އިއްޔެ ބުންޏެވެ.

• ހދ. ވައިކަރަދޫ ކައުންސިލުން ހުސްވި އަންހެން ކައުންސިލަރުގެ ގޮނޑިއަށް މީހަކު އިންތިހާބު ކުރަން ބޭއްވި ބައި-އިލެކްޝަންގައި ސަރުކާރު ކޯލިޝަންގައި ހިމެނޭ މައި ޕާޓީ އެމްޑީޕީ އާއި އެ ކޯލިޝަންގައި ދެން ހިމެނޭ އަދާލަތު ޕާޓީން ވާދަކޮށް އެ އިންތިހާބު އެމްޑީޕީގެ ކެންޑިޑޭޓް ކާމިޔާބުކުރި އެވެ.

• ރަސްމީ ދަތުރުފުޅެއްގައި ރައީސް އިބްރާހިމް މުހައްމަދު ސޯލިހު ތިން ގައުމަކަށް ކުރައްވާ ދަތުރުފުޅެއްގައި ރައީސް އިއްޔެ ފުރާވަޑައިގެންނެވި އެވެ.

• ދެ މީހަކަށް ތޫނު ހަތިޔާރަކުން ހަމަލާދީ، އެއިން އެކެއްގެ އިނގިލީގައި ދަތް އަޅައި އިނގިލި ބުރިކޮށްލި ތުހުމަތުގައި ބިދޭސީއަކު ހައްޔަރުކުރި އެވެ.

ދުވަހުގެ ކޯޓޭޝަން

ރިޔާސީ އިންތިހާބު ކައިރިވަމުން އަންނައިރު، އެމްއާރުއެމްގެ ރައީސަކަށް މިހާރު ހުންނެވި އަހުމަދު ފާރިސް މައުމޫން "އަދަދު" ނޫހަށް ދެއްވި އިންޓަވިއުގައި ވިދާޅުވީ

ވަކި ބޭފުޅަކު ވަކި ކޮޅަކަށް ހުންނެވީކީއެއް ވެސް ނޫން، ޕާޓީގެ އެކްސްކޯގައި ތިއްބެވި ބޭފުޅުންގެ ވެސް ހިޔާލުތައް އެބަ ހުރި ދެކޮޅަށް ވެސް، މިހާރު އޮތް ހާލަތާއި ސަރުކާރުގައި އޮތް ހިތްހަމަޖެހުންތަކާއި ހިތްހަމަނުޖެހުންތައް ވެސް ކޮންމެ ބޭފުޅެއްގެ ވިސްނެވުމުގައި ވެސް އެބަ ހުންނެވި،"

ދުވަހުގެ ފޮޓޯ

އުރީދޫން ބޭއްވި ސްޓެމް ފެއާގެ ފަނޑިޔާރުންގެ ވޯޓުން އެންމެ މަތިން މާކްސް ހޯދައިގެން ފެއާގެ އެއްވަނަ ލިބުނު އިސްކަންދު ސްކޫލަށް، އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒު އިނާމު ހަވާލުކޮށް ދެއްވަނީ. -- ފޮޓޯ: މުހައްމަދު ޝާބިން/އަދަދު