ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން މުދާ އެތެރެ ކުރަމުން ދިޔަ މީހަކު ހައްޔަރުކުރިއިރު، އޭނާ އެތެރެ ކޮށްފައިވަނީ ތިން މިލިއަން ރުފިޔާއަށް ވުރެ މަތީ އަގަކަށް މޭވާއާއި ތަރުކާރީކަން އެނގިއްޖެ އެވެ.
މަކަރާއި ހީލަތުން އޮޅުވާލައިގެން މުދާ އެތެރެކޮށް، އެ މުދާ ރާއްޖޭގައި ވިއްކާ މަންފާ ހޯދަމުންދާ ކަމުގެ ތުހުމަތުގައި މިދިޔަ އަންގާރަ ދުވަހުގެ ރޭ ހައްޔަރުކޮށްފައިވަނީ 37 އަހަރުގެ ދިވެހި ފިރިހެނެކެވެ. ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން، 15 ދުވަހުގެ މުއްދަތެއް ދިނެވެ.
ކޯޓު އަމުރުގައި ބުނެފައިވާ ގޮތުން އޮޅުވާލައިގެން ރާއްޖެ އެތެރެކޮށް ވިއްކަމުން ގޮސްފައިވަނީ މޭވާއާއި ތަރުކާރީ އެވެ. އެ މައްސަލާގައި ހިމެނޭ ތަކެތީގެ އަގު ތިން މިލިއަން ރުފިޔާއަށް ވުރެ މަތިވާނެ ކަމަށް ކޯޓު އަމުރުގައިވެ އެވެ.
ނަމަވެސް އޭނާ ފޮނުވި ޓީޓީތަކުގައި ބޭނުންކޮށްފައިވަނީ އަމިއްލަ ނަމާއި އޭނާ ކުރާ ވިޔަފާރިއަށް ނިސްބަތްވާ ނަމެވެ. އަދި ބޭރުގެ ވިޔަފާރިވެރިންނާ އޭނާ މުއާމަލާތް ވެސް ކޮށްފައި ވަނީ އަމިއްލަ ނަމާއި އަމިއްލަ މޯބައިލް ފޯނު ނަންބަރެވެ.
ކޯޓުގައި ފުލުހުން ބުނެފައިވާ ގޮތުން، އޭނާގެ މައްޗަށް ތުހުމަތު ކުރެވޭ އިތުރު މައްސަލަތަކެއް ވެސް ފުލުހުން ދަނީ ތަހުގީގު ކުރަމުންނެވެ. އަދި ފޯޖަރީގެ މައްސަލާގައި ވެސް އިތުރު ބަޔަކު ޝާމިލްވާ ކަމަށް ބެލެވޭ ކަމަށް ފުލުހުން ވަނީ ކޯޓުގައި ބުނެފަ އެވެ.
