ވީނުވީއެއް ނޭނގި ގެއްލިގެން ހޯދަމުން އަންނަ މީހުންގެ މައުލޫމާތު ސާފުކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ފުލުހުން ހާޒިރު ކުރަން ނިންމައިފި އެވެ.
މިއަދު ބޭއްވި އެ ކޮމިޓީ ބައްދަލުވުމުގައި ކޮމިޓީ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ، ކޮމިޓީން އެ މައްސަލަ ބަލަމުން ދަނިކޮށް މަޑުއްވަރީ ދާއިރާގެ މެންބަރު އާދަމް ޝަރީފް ވެސް ވަނީ އެކަމާ ގުޅޭ މައްސަލައެއް ހުށަހަޅުއްވާފައިވާ ކަމަށެވެ.
އެއާއެކު ކޮމިޓީން ނިންމީ އެ ދެ މައްސަލަ އެކުގައި ކުރިއަށް ގެންދިއުމަށެވެ.
މި މައްސަލައިގައި ކޮމިޓީއަށް ފުލުހުން ހާޒިރުކުރުމަށް ހުށަހެޅުއްވީ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމެވެ. އެ ހުށަހެޅުން ފާސްވީ ކޮމިޓީގެ އިއްތިފާގުންނެވެ.
ކޮމިޓީއަށް ހުށަހެޅީ މިދިޔަ މަހުގެ 31 ވަނަ ދުވަހުގެ ރޭގެ ފަހުން ވީނުވީ އެއް ނޭނގި ގެއްލިފައިވާ އއ. މަތިވެރި، ހަސަން އަލީ (ހަސަންފުޅު) އާއި މި މަހުގެ ހަތަރު ވަނަ ދުވަހުން ފެށިގެން ހަބަރެއް ވެފައިނުވާ ސ. މަރަދޫފޭދޫ، ގަސްކަރަ، މުހައްމަދު އާސިރު އިސްމާއީލްގެ މައްސަލައިގަ އެވެ.
މީގެ ތެރެއިން އާސިރު މިހާރު ވަނީ ފެނިފަ އެވެ. އެހެންނަމަވެސް ކޮމިޓީން ވަނީ އޭނާ ފެނުމަށް ފަހު އެކަން ހިނގި ގޮތުގެ ތަފްސީލެއް ފުލުހުން ހިއްސާކޮށްފައިނުވާތީ އެކަމާ ގުޅޭ ގޮތުން ސުވާލު ކުރުމަށް ވެސް ނިންމައިފަ އެވެ.
ވީނުވީއެއް ނޭނގި ގެއްލެމުން އަންނަ މީހުން އިތުރުވާތީ، އެ މީހުން ހޯދުމަށް އަޅާފައިވާ ފިޔަވަޅުތައް ހަރުދަނާ ކުރުމަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހެޅި އެވެ. އެހެންނަމަވެސް އެ މައްސަލަަ ބަލައިގެންފައެއް ނުވެ އެވެ.
