ހުކުރު ދުވަހުގެ ރޭ މާފަންނު ބީޖީ ގަރާޖު ކައިރީ ހުރި ފިހާރައެއްގެ ތެރެއަށް ވަދެ މީހެއްގެ ގަޔަށް ވަޅި ޖަހައި މާރާމާރީ ހިންގުމުގައި ބައިވެރިވި ކަމަށް ތުހުމަތު ކުރެވިގެން ހައްޔަރުކުރި މީހާގެ ބަންދަށް 15 ދުވަސް ޖަހައިފި އެވެ.
ފުލުހުން މިއަދު ބުނީ، އެ މައްސަލާގައި ރޭ ހައްޔަރުކުރީ 20 އަހަރުގެ ދިވެހި ފިރިހެނެއް ކަމަށެވެ، އަދި އޭނާގެ ބަންދަށް ކްރިމިނަލް ކޯޓުން 15 ދުވަހުގެ މުއްދަތެއް ދީފައިވާ ކަމަށެވެ. އަދި، މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
އެ މާރާމާރީގައި ޒަހަމްވި 30 އަހަރުގެ ދިވެހި ފިރިހެން މީހާއަށް އައިޖީއެމްއެޗުގެ އައިސީޔޫގައި އަންނަނީ ފަރުވާ ދެމުންނެވެ. އޭނާގެ ހާލު ކްރިޓިކަލް ކަމަށް އެ ހޮސްޕިޓަލުން ބުނެ އެވެ.
މާރާމާރީގެ ބައެއް ވީޑިއޯތަކުން ފެންނަ ގޮތުގައި ހަމަލާ ރައްދުވި މީހާގެ އުނަގަނޑުގައި ވެސް ވަޅިއެއް ހަރުކޮށްފައި އޮންނަ ތަން ފެނެ އެވެ.
މާލޭގައި މި ފަހަކަށް އައިސް ސިލްސިލާ މާރާމާރީތަކެއް ހިނގަމުންދާއިރު އެކަމާ ގުޅިގެން ކޮމިޝަނާ ހަމީދު އިއްޔެ "އަދަދު" އަށް ވިދާޅުވީ މިއީ މާލޭގެ ދެ ގޭންގަކަށް ނިސްބަތްވާ ދެ މީހެއްގެ ދެމެދުގައި މި އަހަރު ކުރީކޮޅު ޖެހުނު މައްސަލައަކާ ގުޅިގެން ހިންގާ މާރާމާރީތަކެއް ކަމަށެވެ.
"މިފަހުން މާލެ ސަރަހައްދުގައި ތޫނު ހަތިޔާރު ބޭނުންކޮށްގެން ހިންގަމުން އަންނަ ނުރައްކާތެރި މާރާމާރީތަކަކީ 'ކުޑަހެންވޭރޭ' ކިޔައިގެން އުޅޭ ބަޔަކާއި 'އެންސީ' އޭ ކިޔައިގެން އުޅޭ ބައެއް ހިންގާ މާރާމާރީ ތަކެއް،" ހަމީދު އިއްޔެ "އަދަދު" އަށް ވިދާޅުވި އެވެ.
