މާލޭގައި މިހާރު ހިނގަމުންދާ ސިލްސިލާ މާރާމާރީތަކާ ދެކޮޅަށް ފުލުހުން ކުރިއަށްގެންދިޔަ އޮޕަރޭޝަނުގެ ހައްޔަރުކުރި އަށް މީހަކު ކްރިމިނަލް ކޯޓުން ދޫކޮށްލައިފި އެވެ.
ފުލުހުން ބުނީ ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން ސިލްސިލާކޮށް މާލެ ތެރޭގައި ހިނގަމުންދާ މާރަމާރީތަކާއި ގުޅިގެން މި މަހުގެ 10 ވަނަ ދުވަހު އަށް މީހަކު ހައްޔަރުކޮށްފައިވާ ކަމަށެވެ.
އެމީހުންގެ ބަންދާ މެދު ގޮތެއްް ނިންމުމަށް ފުރަތަމަ ފަހަރު ކްރިމިނަލް ކޯޓަށް ހާޒިރުކުރުމުން ބަންދަށް 15 ދުވަސް ޖެހި ކަމަށާއި، ނަމަވެސް، ދެވަނަ ފަހަރަށް ހާޒިރުކުރުމުން ކޯޓުން އެމީހުން ވަނީ ދޫކޮށްލާފައި ކަމަށް ފުލުހުން މައުލޫމާތު ދިނެވެ.
ހަތިޔާރު ބޭނުންކޮށްގެން މާރަމާރީ ހިންގަމުން އަންނަކަމުގެ ތުހުމަތުގައި ހައްޔަރުކުރި ބަޔަކު ދޫކޮށްލާފައިވާއިރު، އެއީ ސީދާ ކޮންް ސަބަބަކާ ހުރެ ކަމެއް ފުލުހުންް ހާމަކޮށްފަ އެއްް ނުވެ އެވެ.
ދާދި ފަހުން މިދިޔަ ހުކުރު ދުވަހުގެ ރޭ ވެސް މާލޭގައި މާރާމާރީއެއް ހިންގާ އެކަކު ވަރަށް ބޮޑަށް ޒަހަމުކޮށްލާފައި ވެއެވެ. އެމީހާއަށް އަދިވެސް ފަރުވާދެމުން ދަނީ އައިޖީއެމް ހޮސްޕިޓަލުގައި ވެންޓިލޭޓަރުގައި ބާއްްވައިގެންނެވެ.
މިއީ ދެ ގޭންގެއްގެ ދެމެދުގައި ހިނގި މާރާމާރީއެއް ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު މިއަދު ކުރެއްވި ޓްވީޓެއްގަައި ވިދާޅުވެފައި ވެއެވެ. މި މައްސަލާގައި މިހާތަނަށް އެކަކު ހަައްޔަރުކޮށްފައި ވެއެވެ.
ހާއްްސަކޮށް މާލެ ސަރަހައްދުގައި މާރާމާރީތައް ހިނގާ މިންވަރު އަނެއްކާވެސް ވަނީ ވަރަށް ބޮޑަށް އިތުރުވެފަ އެވެ. އެގޮތުން، މިމަހުގެ ތެރޭގައި އެކަނިވެސް ތިން މާރާމާރީއެއްގެ މައްސަަލަ ފެންމަތިވި އެވެ.
