ހެލްމެޓް އެޅުން ލާޒިމު ކުރާ ސަރަހައްދުތައް ފިޔަވައި އެހެނިހެން ސަރަހައްދުތަކުގައި ހެލްމެޓް އަޅައިގެން ދުއްވާނަމަ ފާރަވެރިވާނެ ކަމަށް ފުލުހުން ބުނެފި އެވެ.
ފުލުހުން މިއަދު ނެރުނު ނޫސްބަޔާނެއްގައި ބުނީ އަޅަން ނުޖެހޭ ސަރަހައްދުތަކުގައި ހެލްމެޓް އަޅައިގެން ދުއްވާ މީހުންނަށް ފާރަވެރިވެ، ތުހުމަތު ކުރެވޭ މީހުން ހުއްޓުވައި ބަލައި ފާސްކުރާނެ ކަމަށެވެ.
އަދި މިއީ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން ވެއްޓެއް ގާއިމުކުރުމުގެ ގޮތުން އަޅާ ފިޔަވަޅެއް ކަމަށް ވެސް ފުލުހުން ބުނެ އެވެ.
ފުލުހުން މިއަދު ނެރުނު ނޫސްބަޔާނުގަިއ ބުނީ ކާކުކަން ވަންހަނާކޮށްގެން ކުށްކުށަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭކަން ފާހަގަކުރެވިފައިވާ ކަމަށެވެ. ފުލުހުން މިހެން ބުނެފައިވާއިރު، ދާދި ފަހުން ހެލްމެޓް އަޅައިގެން ތިބި ބަޔަކު ވަނީ ހުޅުމާލޭގައި ހުންނަ ޖޫސް ޓައިމް ކެފޭ ފުނޑާލާފަ އެވެ.
މޫނު ފޮރުވައިގެން ގޮސް ކެފޭއަށް ގެއްލުން ދިން މައްސަލާގައި ޕޮލިސް ކޮމިޝަނަރު މުހައްމަދު ހަމީދު މީގެ ކުރިން "އަދަދު"އަށް ވިދާޅުވީ ކެފޭއަށް ގެއްލުންދީ އެ ކެފޭ ފުނޑާލީ މާލޭގައި ހަރަކާތްތެރިވާ އެހެން ދެ ގޭންގެއްގެ ދެމެދުގައި ޖެހިގެން އުޅޭ މައްސަލައަކާ ގުޅިގެން ކަމަށެވެ.
"ހުޅުމާލޭގައި ވިޔަފާރި ހިންގާ ތަނަކަށް އަމާޒުކޮށް ގެއްލުންދިން ދިނުމަކީ، މަސްއޮޑިއޭ ކިޔައިގެން އުޅޭ ބަޔަކާއި ވައިކަންމައްޗޭ ކިޔައިގެން އުޅޭ ބައެއްގެ މެެދުގައި ޖެހިގެން އުޅޭ މައްސަލަ އަކާއި ގުޅިފައިވާ ކަމެއް" ހަމީދު ވިދާޅުވި އެވެ.
މީގެ ކުރިން ވެސް ހެލްމެޓް އަޅައިގެން މޫނު ފޮރުވައިގެން ގޮސް ވައްކަމާއި ފޭރުމުގެ އެކި ކުށްތަކަށް އަރައިގަނެފައިވާ މައްސަލަތައް ވަނީ ފެންމަތިވެފަ އެވެ.
ހެލްމެޓް އެޅުން ލާޒިމުކޮށްފައިވާ ސަރަހައްދުތައް ނޫން ސަރަހައްދުތަކުގައި ހެލްމެޓް ނޭޅުމަށް ފުލުހުން އިލްތިމާސްކޮށްފައިވާއިރު، 30 ކިލޯމީޓަރަށްވުރެ ބާރަށް އެއްގަމު އުޅަނދު ދުއްވަން ހުއްދަކޮށްފައިވާ ސަރަހައްދުތަކުގައި ހެލްމެޓް އެޅުން ލާޒިމުވާނެ އެވެ. އެ ސަރަހައްދުތަކުގައި އުޅަނދު ދުއްވޭ ބާރުމިން އަންގައިދޭ ބޯޑެއް ހަރުކޮށްފައި ހުންނާނެ އެވެ.
