މާފަންނު ބީޖީ ގަރާޖު ކައިރީ ހުރި ފިހާރައެއްގެ ތެރޭ މާރާމާރީ ހިންގާ މީހަކު ޒަހަމްކޮށްލައިފި އެވެ.
މަންޒަރު ދުށް މީހުން "އަދަދު"އަށް ކިޔައިދިން ގޮތުގައި އޭނާއަށް ވަޅިން ހަމަލާ ދީފައިވަނީ ސައިކަލު ސައިކަލެއްގައި އައި ދެ ފިރިހެނުންނެވެ.
މާރާމާރީގައި ޒަހަމްވި މީހާ ވަނީ އެ ދެ މީހުންގެ ކިބައިން ސަލާމަތްވުމަށް މުރަނގަ މަގުގައި ހުރި "ކްރާސާ" ނަމަކަށް ކިޔާ ފިހާރައަކަށް ވަދެފަ އެވެ. އޭނާއަށް ހަމަލާ ދީފައިވަނީ ފިހާރަ ތެރޭގަ އެވެ.
އެ ފިހާރަތެރޭގައި ވެސް ބައިވަރު ލޭ ހުރިތަަން މި ނޫހުގެ ނޫސްވެރިންނަށް ވަނީ ފެނިފަ އެވެ. ހަމަލާ ރައްދުވި މީހާއަށް ހަމަ އެ ވަގުތު އެތަނުގައި ތިބި ދެ މީހަކު ވަނީ ކުއްލި ފަރުވާ ދީފަ އެވެ. އެގޮތުން ބައެއް ތަންތަނުން ލޭ މަނާ ކުރެވޭތޯ މަސައްކަތް ކުރި އެވެ.
ބައެއް ވީޑިއޯތަކުން ފެންނަ ގޮތުގައި ހަމަލާ ރައްދުވި މީހާގެ އުނަގަނޑުގައި ވެސް ވަޅިއެއް ހަރުކޮށްފައި އޮންނަ ތަން ފެނެ އެވެ. އެހެންކަމުން މިއީ ދެ ގޭންގެއްގެ ދޭތެރޭގައި ހިނގި ހަމަނުޖެހުމެއް ކަމަށް ބެލެވެ އެވެ.
މާރާމާރީގައި ޒަހަމްވި މީހާ މިހާރު ވަނީ އައިޖީއެމްއެޗަށް ގެންގޮސްފަ އެވެ. ފުލުހުން މީޑިއާއަށް ފޮނުވި މެސެޖެއްގައި ބުނީ ޒަހަމްވީ އުމުރުން 30 އަހަރުގެ ފިރިހެނެއް ކަމަށެވެ.
ހަމަލާ ދިން ކްރާސާ ފިހާރައިގެ ކޭޝިއަރު އެވަގުތު ވަނީ ސަލާމަތް ވާން ވެގެން ކުރިމަތީގައި ހުރި މަރުހަބާ ފިހާރައަށް ވަދެ އެވެ. އެނގިފައިވާ ގޮތުގައި އޭނާ ވެސް އޮތީ ހަބަރު ހުސްވެފަ އެވެ.
މިކަމާ ގުޅިގެން ފުލުހުންގެ ބަހެއް ލިބޭ ގޮތް ވަނީ ނުވެފަ އެވެ.
