ރިޔާސީ އިންތިހާބުގައި ކުރިމަތިލުމަށް ނަން ހުށަހެޅުމުގެ މުއްދަތު އިތުރުކުރަން ފާސްކުރާ ހާލަތެއްގައި ވެސް، އިންތިހާބު ބާއްވާ ތާރީހަށް ބަދަލެއް ނާންނާނެ ކަމަށް އިލެކްޝަންސް ކޮމިޝަނުން ބުނެފި އެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އިލެކްޝަން ކޮމިޝަނުން ލަފާކުރާ ތާރީހަކީ ސެޕްޓެމްބަރު 9، ވަނަ ދުވަހެވެ.
އިންތިހާބުގައި ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވާ ކަމަށް އީސީން އިއުލާނުކޮށްފައިވަނީ ޖުލައި 23، އިން އޮގަސްޓު 3، ގެ ނިޔަލަށެވެ.
މި މުއްދަތު 14 ދުވަހަށް އިތުރު ކުރުމަށް ގާނޫނަށް އިސްލާހު ގެނައުމަށް މިއަދު ވަނީ ހުށަހަޅައިފަ އެވެ. މި ބިލު ގާނޫނަކަށް ބަދަލުވުމާއެކު މި މުއްދަތު އޮގަސްޓު 6، އަށް އިތުރުވެގެން ދާނެ އެވެ.
މިކަމާ ގުޅިގެން ސުވާލު ކުރުމުން އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް "އަދަދު" އަށް ވިދާޅުވީ އެ މުއްދަތު އިތުރުކުރިނަމަވެސް އިންތިހާބު ބާއްވަން މިހާރު ލަފާ ކުރާ ތާރީހުގައި ބޭއްވޭނެ ކަމަށެވެ.
މިހާރު އޮތް ގޮތުން ކުރިމަތިލާ ކެންޑިޑޭޓުންގެ ނަންތައް ތަރުތީބު ކުރުމަށް ފަހު އޮގަސްޓު 9 ގައި އިއުލާންކުރާނެ އެވެ. އަދި، ކެންޑިޑޭޓުންނަށް ކެމްޕޭނު ކުރަން ދެވޭ ރަސްމީ މުއްދަތެއްގެ ގޮތުގައި އޮގަސްޓު 10 އިން ސެޕްޓެމްބަރު 8 އާ ހަމައަށެވެ.
މި އަހަރުގެ އިންތިހާބުގައި ވޯޓުލެވޭ މީހުންގެ އަދަދަކީ ގާތްގަނޑަކަށް 280،000 މީހުން ކަމަށް އިލެކްޝަން ކޮމިޝަނުން ހާމަކޮށްފައިވެ އެވެ. 2018 ގެ ރިޔާސީ އިންތިހާބުގައި ވޯޓު ލާފައި ވަނީ ގާތްގަނޑަކަށް 262،000 މީހުންނެވެ.
މުޅި ރާއްޖޭގެ މީހުން ދިރިއުޅޭ ހުރިހާ ރަށަކާއި، ރިސޯޓުތައް އަދި ސިނާއީ ރައްތައް ހިމަނައިގެން ޖުމްލަ 600 ވޯޓު ފޮށި މިއަހަރު ބެހެއްޓުމަށް ނިންމާފައި ވެއެވެ. 2018 ވަނަ އަހަރު ބަހައްޓާފައި ވަނީ 472 ވޯޓު ފޮއްޓެވެ.
