ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު "ކާނަލް" ނަޝީދުގެ މައްޗަށް ދައުލަތުން އުފުލި އެއްޖިންސުން ޖިންސީ ގުޅުން ހިންގުމުގެ ކުށުގެ ދައުވާގެ އަޑުއެހުމެއް މާދަމާއަށް ތާވަލުކޮށްފި އެވެ.
ނަޝީދުގެ މައްޗަށް ކުރާ ދައުވާގެ އަޑުއެހުންތައް ކުރިއަށްގެންދާނީ މީހުންނަށް ނުވަދެވޭ ގޮތަށް ސިއްރު ކޮށްގެންނެވެ. އަޑުއެހުން ތާވަލްކޮށްފައި އޮތީ މާދަމާ ހެނދުނު 10:00 އަށވެ.
ކުރީގެ މެމްބަރު އަދި ޑީއާރްޕީގެ ކުރީގެ ލީޑަރު ނަޝީދަކީ ބަންގްލަދޭޝްގެ އަލަމްގިރިއާ އެކު ގުޅުން ހިންގި މީހުންގެ ތެރޭގައި ހިމެނޭ އެކަކެވެ. އަލަމްގިރިއާއެކު ގުޅުން ހިންގި މަންޒަރު އާންމުވި ވީޑިއޯތަކުގެ ތެރޭގައި ނަޝީދުގެ ވީޑިއޯއެއް ހިމެނެ އެވެ.
މީގެ ކުރިން އެ މައްސަލައިގައި ބޭއްވި އަޑުއެހުމުގައި ދައުލަތުން އެދުނު ގޮތަށް ނަޝީދުއާ ދެކޮޅަށް ހެކީގެ ގޮތުގައި ހުށަހަޅާފައިވާ ވީޑިއޯ ނަޝީދަށް ދިނުމުގެ ބަދަލުގައި، ކޯޓުން އިންތިޒާމުކުރާ ގޮތެއްގެ މަތީން އެ ތަކެތި ދިރާސާކުރުމުގެ ފުރުސަތު އޭނާއަށް ޝަރީއަތުން ވަނީ ނިންމާފަ އެވެ.
އެ ދުވަހުގެ އަޑުއެހުމުގައި ވީޑިއޯގެ ތާޑުޕާޓީ އެނަލިސިސް ހެދުމަށް ނަޝީދުގެ ފަރާތުން އެދިފައިވާތީ، އެނަލަސިސް ހަދާ ފަރާތުގެ މައުލޫމާތު ލިޔުމުން ހުށަހެޅުމަށް ޝަރީއަތުން އެންގި އެވެ.
އެ މައްސަލައިގައި ޕީޖީއިން ދެން ދައުވާ އުފުލި އަނެއް ތިން މީހުންގެ ތެރެއިން ގާނޫނީ ވަކީލު، ނާޒިމް ސައްތާރު ވަނީ ޝަރީއަތުން ކުރި ހުކުމް ތަންފީޒުކޮށް ނިމުމުން މިނިވަން ވެފަ އެވެ.
އަލަމްގީރުގެ މައްޗަށް އުފުލި ދައުވާތައް އޭނާގެ މައްޗަށް ސާބިތުވެ ދަނީ ޖަލު ހުކުމް ތަންފީޒު ކުރަމުންނެވެ.
އެއްޖިންސުން ގުޅުން ހިންގާ ވީޑިއޯތަކެއް އާންމުވި މައްސަލައިގައި ކާނަލް ނަޝީދު ހިމެނޭހެން ޖުމްލަ 18 މީހެއްގެ ޕާސްޕޯޓު އޭރު ހިފަހެއްޓި އެވެ. އެހެން ނަމަވެސް،، އެކަށީގެންވާ މިންވަރަށް ހެކި ނެތުމުގެ ސަބަބުން ހަތަރު މީހުންގެ މައްޗަށް އެކަނި ދައުވާ އުފުލަން ނިންމީ އެވެ.
