ދިރުވާލައިގެން ރާއްޖެއަށް މަސްތުވާތަކެތި އެތެރެކުރަން މަސައްކަތްކޮށްގެން ހައްޔަރުކުރި މީހާގެ ބަންދަށް 15 ދުވަސް ޖަހައިފި އެވެ.
އިންޓެލިޖެންސަށް ލިބުނު މައުލޫމާތަކާ ގުޅިގެން ރާއްޖެއަށް މަސްތުވާތަކެތި އެތެރެކުރަން އުޅުނު ލެޓްވިއާގެ 49 އަހަރުގެ ފިރިހެނަކު ހައްޔަރުކޮށްފައިވަނީ މި މަހުގެ 14 ވަނަ ދުވަހު އެވެ.
ފުލުހުން މިއަދު ބުނީ އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް ކްރިމިނަލް ކޯޓުން ޖަހާފައިވާ ކަމަށެވެ.
އޭނާގެ ހަށިގަނޑުން މަސްތުވާތަކެތި ކަމަށް ޝައްކު ކުރެވޭ 127 ބުލެޓު ފެނިފައިވާ ކަމަށް ވެސް ފުލުހުން ބުނެފައިވެ އެވެ.
އޭނާ ހައްޔަރުކޮށްފައި ވަނީ ފުލުހުން، ކަސްޓަމްސް އަދި އިމިގްރޭޝަން ގުޅިގެން ކުރި މަސައްކަތުންނެވެ.
މިހާރު އަމަލުކުރަމުންދާ ގަވައިދުގެ ދަށުން މިގޮތަށް ރާއްޖެއަށް މަސްތުވާތަކެތި އެތެރެކުރުމަށް މަސައްކަތް ކުރާ ބިދޭސީން ޑީޕޯޓުކޮށްލަނީ އެވެ. ޑީޕޯޓުކޮށްލަނީ މަސްތުވާތަކެތި އެތެރެކުރަނީ ރާއްޖޭގެ ނެޓްވޯކަކާ ގުޅިގެން ނޫން ކަމަށް ވާނަމަ އެވެ.
މިދިޔަ ހަފްތާގެ ތެރޭގައި ވެސް ވަނީ ރާއްޖެއަށް 2.6 ކިލޯގެ މަސްތުވާތަކެތި އެތެރެކުރަން މަސައްކަތް ކުރި ބިދޭސީއަކު ފޮނުވާލާފަ އެވެ.
