މި މަހުގެ ހަތަރު ވަނަ ދުވަހުން ފެށިގެން ހަބަރެއް ނުވެގެން ހޯދަމުންދާ ސ. މަރަދޫފޭދޫ، ގަސްކަރަ، މުހައްމަދު އާސިރު އިސްމާއީލް އެންމެ ފަހުން އެއާޕޯޓުން ފެނުނު ނަމަވެސް، ވައިގެ މަގުން އެއްވެސް ތަނަކަށް ފުރާފައި ނުވާ ކަމުގެ ޔަގީން ކަން ފުލުހުން ދީފި އެވެ.
އާސިރު އެންމެ ފަހުން ފެނިފައި ވަނީ ގެއްލުނު ރޭގެ 7:20 ހާއިރު ހުޅުމާލެ ފެރީ ޓާމިނަލް ކައިރިން ހުދުކުލައިގެ ޓެކްސީއަކަށް އަރާ މަންްޒަރު ކަމަށް ފުލުހުން ބުނެ އެވެ. އަދި ޓެކްސީ ގޮސް މަޑުކުރުމުން އެއާޕޯޓަށް ފައިބާ މަންޒަރު ސީސީޓީވީ ފުޓޭޖްތަކުން ފެންނަ ކަމަށް ފުލުހުން ވަނީ ބުނެފަ އެވެ.
މި މައްސަލައިގައި ފުލުހުން މިއަދު ނެރުނު ބަޔާނެއްގައި ބުނީ އާސިރު ހޯދުމަށް އެއާޕޯޓުގައި ހަރުކޮށްފައިވާ އެކި ކެމެރާތަކުގެ 150 ގަޑިއިރަށް ވުރެ ގިނަ ފޫޓޭޖު ބަލާފައިވާ ކަމަށެވެ.
އެހެންނަމަވެސް އޭނާ އެއާޕޯޓަށް ގޮސް ވަންނަ ހިސާބުގައި ކެމެރާއެއް ނެތުމުގެ ސަބަބުން، ދެން ދިޔަ ހިސާބެއް ދެނެގަނެވިފައި ނުވާ ކަމަށް ފުލުހުން ބުނެފައިވެ އެވެ. އެހެންކަމުން އެއާޕޯޓުގެ އެކި ސަރަހައްދުތަކާއި އޮޑިދޯނިފަހަރުތައް ބަލައި، އެއްވެސް ތަނަކަށް ދިއުމަށް ބުކިން އެއް ހައްދާފައިވޭތޯ ވެސް ބަލާފައިވާ ކަމަށް ފުލުހުން ބުނެ އެވެ.
"އެގޮތުން ކުރެވުނު މަސައްކަތުން އޭނާ ރާއްޖެއިން ބޭރަށް ފުރައިގެން ނުދާ ކަމާއި އެއްވެސް އެއާލައިނަކުން ރާއްޖޭގެ އެއްވެސް ރަށަކަށް ނުދާ ކަން ޔަގީން ކުރެވިފައިވެ އެވެ،" ފުލުހުން ބުނެފައިވެ އެވެ.
ފުލުހުން އިތުރަށް ބުނީ އާސިރު އެއާޕޯޓަށް ދިޔަ ޓެކްސީ ދެނެގަނެ، ޑްރައިވަރާ މިހާރު ސުވާލުކޮށްފައިވާ ކަމަށެވެ.
މީގެ އިތުރުން ރާއްޖޭގެ އެއްވެސް ރަށެއްގައި އޭނާ ހުރިތޯ ބެލުމުގެ މަސައްކަތް ވެސް ކުރަމުން އަންނަ ކަމަށް ބުނެފައިވެ އެވެ.
އާސިރުގެ އެއްވެސް މައުލޫމާތެއް ލިބިއްޖެ ނަމަ ފުލުހުންގެ ހޮޓްްލައިން 3322111 ނުވަތަ ގަލޮޅު ޕޮލިސް ސްޓޭޝަނުގެ ނަންްބަރު 9631696 އަށް ގުޅާ އެކަން ހިއްސާކުރުމަށް އެދިފައި ވެއެވެ.
