ރާއްޖޭގެ ނެޝަނަލް ކެންސަރު ކޮންޓްރޯލް ޕްލޭން 2022-2026 އިފްތިތާހުކޮށްފި އެވެ.
މި ޕްލޭނަކީ ގައިންގަޔަށް ނާރާ ބަލިތައް ކޮންޓްރޯލްކޮށް ސިއްހީ ދުޅަހެޔޮކަން އިތުރުކުރުމަށް، މިހާރު ސަރުކާރުން ކުރަމުން ގެންދާ މަސައްކަތްތައް އިތުރަށް ފުޅާކޮށް ހަރުދަނާކުރުމަށް ރޭވިފައިވާ މުހިންމު ކަންކަމުގެ ތެރެއިން އެކުލަވާލާގައިވާ ޕްލޭނެކެވެ.
މި ޕްލޭން އިފްތިތަހުކޮށްދެއްވީ އެކަމަށްޓަކައި މިއަދު ބޭއްވި ހާއްސަ ރަސްމިއްޔާތެއްގައި ހެލްތް މިނިސްޓަރު އަހުމަދު ނަސީމެވެ.
"ނެޝަނަލް ކެންސާ ކޮންޓްރޯލް ޕްލޭން" (އެންސީސީޕީ) އަކީ ކެންސަރު ބަލި ކޮންޓްރޯލްކުރުމަށް ކަނޑައަޅާފައި ހުރި ކަންކަމުގެ މައްޗަށް އެކުލަވާލާފައިވާ ފަސް އަހަރުގެ ފްލޭނެކެވެ. މި ޕްލޭން އެކުލަވާލީ ދުނިޔޭގެ ސިއްހަތު ޖަމްއިއްޔާގެ ފަންނީ ލަފާއާއި އެހީތެރިކަމާއެކު ރާއްޖޭގެ މިކަމާ ގުޅުންހުރި ފަންނީ ފަރާތްތަކުގެ މަޝްވަރާއާއެކު ކަމަށް ހެލްތް މިނިސްޓްރީން ބުނެ އެވެ.
މި ޕްލޭންގެ މައިގަނޑު މަގުސަދުތަކަކީ:
- ކެންސަރުން ރައްކާތެރިވުމަށް ސިއްހީ އާދަތަކަށް އަހުލުވެރިވުން
- އަވަހަށް ބަލި ދެނެގަނެ އަވަހަށް ފަރުވާ ފެށުން
- އާއިލާތަކަށް މާލީ ބުރައެއް އުފުލަންނުޖެހި ކެންސަރުގެ ފަރުވާ ލިބުން
- ކެންސަރު ބަލި ތަހައްމަލުކުރާ ފަރާތްތަކަށް ބޭނުންވާ ޕެލިއޭޓިވް އަދި ސަޕޯޓިވް ކެއާގެ ކަވަރޭޖު ފުޅާކުރުން
- ކެންސަރުގެ ގައުމީ ރަޖިސްޓްރީ ގާއިމު ކުރުމާއި ދިރާސާތައް ކުރުން
މިއަދު އިފްތިތާހުކުރި ޕްލޭނާއެކު ކެންސަރުން ރައްކާތެރިތެރިވުމަށް ރާއްޖޭގައި އަޅަންޖެހޭ ފިޔަވަޅުތައް ކަނޑައެޅުމާއި ކެންސަރު ބަލީގެ މީހުންނަށް އެކަށީގެންވާ ފަރުވާއާއި އެހެނިހެން ހިދުމަތްތައް ފޯރުކޮށްދިނުމާއި އެ ފަރުވާ ހޯދުމަށް ދިމާވާ ގޮންޖެހުންތައް ކުޑަކުރެވޭނެ ކަމަށް ހެލްތް މިނިސްޓްރީން ބުނެ އެވެ.
އެ މިނިސްޓްރީން ބުނީ މި ކަންކަމާ ގުޅޭގޮތުން ދައުލަތުގެ މުއައްސަސާތަކުންނާއި ޕްރައިވެޓް ސެކްޓާ އާއި މަދަނީ ޖަމިއްޔާ ޖަމާއަތްތަކުން ކުރާ މަސައްކަތްތައް އެއް އަމާޒަކަށް ކުރިއަށް ގެންދިއުމަށް ބޭނުންވާ ކޯޑިނޭޝަން ރަނގަޅު ކުރެވޭނެ ކަމަށެވެ.
ކެންސަރު ޖެހޭ މިންވަރާއި، ކެންސަރުގެ އާންމު ވައްތަރުތަކާ އަދި ކެންސަރު ބައްޔަށް ހުށަހެޅޭ މީހުންގެ ދިރިއުޅުމުގެ ވައްޓަފާޅިއާއި، ފަރުވާ ހޯދާ މީހުންގެ މައުލޫމާތު ގަވައިދުން އެއްކޮށް އެފަރާތްތަކަށް ދޭންޖެހޭ ފަރުވާއާއި އެހީތެރިކަން ރަނގަޅަށް ވިލަރެސްކޮށް، ތަފާސް ހިސާބު އެއްކުރުމަށް ބޭނުންވާ "ކެންސަރު ރަޖިސްޓްރީ" ހަރުދަނާކުރުމަކީ ވެސް މި ޕްލޭންގެ ދަށުން ކުރުމަށް ހަމަޖެހިފައިވާ މައިގަނޑު އެއް މަސައްކަތެވެ.
ހެލްތް މިނިސްޓްރީން އިތުރަށް ބުނީ މި ޕްލޭނުގައި ހިމެނޭ ކަންކަން ތަންފީޒު ކުރުމުން، ގައިން ގަޔަށް ނާރާ ބަލިތައް މިހާރު ހުރި މިންވަރު 2030 ގެ ނިޔަލަށް 25 ޕަސަންޓަށް ދައްކުރުމަށް ކަނޑައަޅާފައިވާ އަމާޒަށް ވާސިލުވުމަށް މަގުފަހިވެގެންދާނެ ކަމަށެވެ.
