ބިދޭސީންނަށް ކޯޓާ ދޫކުރުމުގެ އިންތިޒާމަށް ގެނެވޭ ބަދަލުތައް އެކްސްޕެޓް ސިސްޓަމް މެދުވެރިކޮށް ތަންފީޒު ކުރުމަށްޓަކައި އެކްސްޕެޓް ސިސްޓަމްއިން ދެމުންގެންދާ ބައެއް ހިދުމަތްތައް ވަގުތީ ގޮތުން މެދުކަނޑާލަން ނިންމައިފި އެވެ.
އިކޮނޮމިކް މިނިސްޓްރީން މިއަދު ކުރި އިއުލާނުގައި ބުނީ، އެކްސްޕެޓް ސިސްޓަމުގެ ބައެއް ހިދުމަތްތައް ވަގުތީ ގޮތުން މެދުކަނޑާލަން ނިންމާފައި ވަނީ އަންނަ އާދިއްތަ ދުވަހުން ފެށިގެން އަންނަ މަހު 11 ވަނަ ދުވަހުގެ ނިޔަލަށް ކަމަށެވެ.
ބައެއް ހިދުމަތްތައް މެދުކަނޑާލި ނަމަވެސް އެ މުއްދަތު ތެރޭގައި ވޯކް ޕާމިކް ފީގެ ހިދުމަތާއި ވޯކް ޕާމިޓް ޕާސްޕޯޓް އެޑްގެ ހިދުމަތް އެކްސްޕެޓް ސިސްޓަމް މެދުވެރިކޮށް ވަޒީފާ ދޭ ފަރާތްތަކަށް ލިބޭނެ ކަމަށް އެ އިއުލާނުގައި ވެއެވެ.
އެކްސްޕެޓް ސިސްޓަމްއަށް ގެނެވޭ ބަދަލުތަކާ އެކު، ސިސްޓަމް މެދުވެރިކޮށް ދެމުންގެންދާ ހުރިހާ ހިދުމަތްތަކެއް މާޗް 12 ވަނަ ދުވަހުން ފެށިގެން ވަޒީފާ ދޭ ފަރާތްތަކަށާއި ސިސްޓަމް ބޭނުންކުރާ ފަރާތްތަކަކަށް އަލުން ލިބިގެންދާނެ ކަމަށް އިކޮނޮމިކް މިނިސްޓްރީން ބުނެ އެވެ.
ބައެއް ހިދުމަތްތައް މެދުކަނޑާލަން ނިންމާ އެކަން އިއުލާނު ކުރި ނަމަވެސް މެދުކަނޑާލަނީ ކޮން ހިދުމަތްތަކެއް ކަމެއް އެ މިނިސްޓްރީން ހާމަކޮށްފައެއް ނުވެ އެވެ.
ރާއްޖޭގައި ވަޒީފާ އަދާކުރާ ބިދޭސީންނާ ގުޅިގެން ދޫކުރާ ހުއްދަތައް ދޫކުރުމާ، އެ ބިދޭސީންނާ ގުޅުންހުރި ކަންކަން ބަލަހައްޓައި މެނޭޖް ކުރުމުގެ މަސައްކަތްތައް ހަރުދަނާ ކުރުމުގެ ގޮތުން އެކްސްޕެޓް ސިސްޓަމްގައި ހުރި މައުލޫމާތު އަދާހަމަ ކުރުމާއި ކަނޑައެޅިފައިވާ އުސޫލުތަކުގެ ތެރެއަށް ފެއްތުމަށްޓަކައި އިކޮނޮމިކް މިނިސްޓްރީން ދަނީ މަސައްކަތްތަކެއް ކުރަމުންނެވެ.
