އަހަރެއްގެ ތެރޭ އާބާދީގެ ނިސްބަތުން ދެވަނައަށް އެންމެ ގިނައިން ސީފުޑްގެ ބާވަތްތައް ކެއުމުގައި ބޭނުންކުރާ ގައުމަކީ ރާއްޖެ ކަމަށް ތަފާސްހިސާބުތަކުން ދައްކައިފި އެވެ.
ޔޫއެންގެ ފުޑް އެންޑް އެގްރިކަލްޗާ އޯގަނައިޒޭޝަންގެ "ދަ ސްޓޭޓް އޮފް ވޯލްޑް ފިޝަރީސް އެންޑް އެކުއާކަލްޗާ 2022" ރިޕޯޓުގައިވާ ތަފާސްހިސާބުތަކުން ދައްކާ ގޮތުގައި ރާއްޖޭގައި ބޮލެއްގެ މައްޗަށް އަހަރަކު އެވްރެޖްކޮށް 85 ކިލޯގެ ސީފޫޑް ބާވަތްތައް ކެއުމުގައި ބޭނުންކުރެ އެވެ.
އެއާއެކު، އާބާދީގެ ނިސްބަތުން ސީފުޑް ބާވަތްތައް ކެއުމުގައި ބޭނުންކުރާ ގައުމުތަކުގެ ލިސްޓުން ރާއްޖެއަށް ލިބެނީ ދެވަނަ އެވެ.
އެ ލިސްޓުގެ އެންމެ ކުރީގައި އޮތީ އައިސްލެންޑެވެ. އެ ގައުމުގައި އަހަރެއްގެ މައްޗަށް އާބާދީގެ ނިސްބަތުން ބޮލަކަށް އެވްރެޖްކޮށް 91 ކިލޯގެ ސީފުޑް ކަ އެވެ.
އެންމެ ގިނައިން ސީފުޑްގެ ބާވަތްތައް ބޭނުންކުރާ ގައުމުތަކަކީ، އެ ގައުމުތަކުގައި ސީފުޑް އުފެއްދޭނެ ޖާގަ އާއި ވަސީލަތްތައް ހުރި ގައުމުތައް ނޫން ކަމަށް ވެސް އެ ރިޕޯޓުގައި ބަޔާންކޮށްފައިވެ އެވެ.
ރާއްޖެއިން އަހަރެއްގެ މައްޗަށް ބޮލަކަށް އެވްރެޖްކޮށް 85 ކިލޯގެ ސީފުޑް ކާއިރު، 2019 ވަނަ އަހަރު، މުޅި ދުނިޔޭގައި ވެސް އެވްރެޖްކޮށް ބޮލަކަށް 20.5 ކިލޯގެ ސީފުޑްގެ ބާވަތްތައް ކެއުމުގައި ބޭނުންކޮށްފައިވެ އެވެ. އެއީ އާމްދަނީ ދަށް ގައުމުތަކަށް އެވްރެޖްކޮށް 5.4 ކިލޯ، މެދުފަންތީގެ އާންދަނީ ދަށް ގައުމުތަކަށް އެވްރެޖްކޮށް 15.2 ކިލޯ، މެދުފަންތީގެ އާމްދަނީ ލިބޭ ގައުމުތަކަށް އެވްރެޖްކޮށް 28.1 ކިލޯ އަދި މަތީ ފަންތީގެ ގައުމުތަކަށް އެވްރެޖްކޮށް 26.5 ކިލޯ ހިމެނޭހެންނެެވެ.
އާބާދީގެ ނިސްބަތުން ސީފުޑްގެ ބާވަތްތައް ބޭނުންކުރާ ގައުމުތަކުގެ ތެރޭގައި ރާއްޖެ ހިމެނޭއިރު ސީފުޑަކީ، އިންސާނާގެ ހަށިގަނޑަށް ބޭނުންވާ ގިނަ ނިއުޓްރިއެންޓްސް ފޯރުކޮށްދޭ ކާނާއެކެވެ. އެގޮތުން، ސައިންޓިފިކް ދިރާސާތަކުން ދައްކާ ގޮތުގައި ސީފުޑް ގިނައިން އެކުލެވޭ ކާނާގެ ސަބަބުން ތަފާތު ސިއްހީ ހާލަތްތަކުން ރައްކާތެރިކޮށްދެ އެވެ.
ސީފުޑްގެ ތެރޭގައި ހިމެނޭ ސެލްމަން، ކްލެމްސް އަދި ޝްރިމްޕް ފަދަ މަހާއި ޝެލްފިޝްގައި ޕްރޮޓީން އަދި ވިޓަމިންސް އާއި ވިޓަމިން ބީ12، ސެލެނިއަމް އަދި ޒިންކް ފަދަ މިނަރަލްސް ހިމެނެ އެވެ. އެހެން ނަމަވެސް ސީފުޑްގެ ބައެއް ބާވަތްތަކުގައި ހެވީ މެޓަލް މާކިއުރީ ހިމެނޭއިރު، އޭގެ ސަބަބުން ސިއްހަތަށް ނުރައްކާ ކުރިމަތިވެދާނެ އެވެ.
