ފުލުހުންހެ ބެލުމުގެ ދަށަށް ގެނެވޭ ފޮރެންސިކް ހެކީގެ މައުލޫމާތު ލީކުނުވާނެ ކަމުގެ ޔަގީންކަން ފުލުހުންގެ އިދާރާއިން ދީފި އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ ފުލުހުންގެ ބެލުމުގެ ދަށަށް ހެކީގެ ގޮތުގައި ގެނެވޭ ތަކެތި ގެންގުޅުމާއި ބެލެހެއްޓުމުގައި އަމަލުކުރަނީ ގާނޫނުގައިވާ ގޮތުގެ މަތިން އަދި ބައިނަލްއަގުވާމީ ބެސްޓް ޕްރެކްޓިސްއާ އެއްގޮތަށް ކަމަށެވެ.
"ފޮރެންސިކްގެ ބެލުމުގެ ދަށަށް ގެނެވޭ ހެއްކެއްގައި ހުންނަ އެއްވެސް މައުލޫމާތެއް ލީކު ނުވާނެ ކަމުގެ ފުރިހަމަ ޔަގީންކަން މި ހިދުމަތަށް އޮވޭ،" ފުލުހުން ބުނެފައިވެ އެވެ.
މީގެ އިތުރުން ފުލުހުންގެ ފޮރެންސިކް ލެބޯރަޓަރީގެ މަސައްކަތްތައް ތަރުތީބުކުރެވިފައި ހުންނާނީ ޕްރައިވަސީ ރައްކާތެރިކޮށްދެވޭ ގޮތަށް ކަމަށްވެސް އެ އިދާރާއިން ވަނީ ބުނެފަ އެވެ.
ފުލުހުން މިފަދައިން ބުނެފައި މިވަނީ ފިލްމީ ތަރި އައިމިނަތު ރިޝްފާގެ ޒާތީ ފޮޓޯތަކަކާއި ވީޑިއޯތަކެއް ފުލުހުން ލީކު ކޮށްލި ކަމަށް އޭނާ ތުހުމަތުކޮށްފައި ވަނިކޮށެވެ.
އެގޮތުން ރިޝްފާ އޭނާގެ ސޯޝަލް މީޑިއާ އެކައުންޓުގައި ކުރި ޕޯސްޓެއްގައި ބުނެފައިވަނީ ކޯޓު އަމުރެއްގެ ދަށުން އޭނާގެ ފޯނުގެ ޕާސްވޯޑު ފުލުހުން މިދިޔަ މަހު ހޯދާފައިވާ ކަމަށެވެ. އަދި އެއަށްފަހު އޭނާގެ ޒާތީ ފޮޓޯތަކެއް އަދި ވީޑިއޯތަކެއް ލީކުވެފައިވާ ކަމަށް އޭނާ ވަނީ ބުނެފަ އެވެ.
އަދި މި މުއްދަތުގައި އޭނާ ފިޔަވައި އޭނާގެ ފޯނަށް އެކްސެސް ވެވުނީ ހަމައެކަނި ފުލުހުންނަށް ކަމަށް ބުނެ އެ ތަކެތި ލީކުކޮށްލީ ފުލުހުންގެ އިދާރާއިން ކަމަށް ތުހުމަތުކޮށްފަ އެވެ.
