ތުރުކީވިލާތާއި ސޫރިޔާ ގުޅޭ ސަރަހައްދަށް ހުސްވި ހަފްތާގައި އައި ބިންހެލުމުގައި ހާލުގައި ޖެހުނު މީހުންނަށް އެހީވުމަށް ދިވެހި ރެޑް ކުރެެސެންޓުން ހުޅުވާލި ރިލީފް ފަންޑަށް 2.6 މިލިއަން ރުފިޔާ ލިބިއްޖެ އެވެ.
މިދިޔަ ބުދަ ދުވަހު ހުޅުވާލި އެ ފަންޑު ރޭ 11:59 ގައި ބަންދު ކުރިއިރު، ޖުމްލަ 2,659,507.45ރ. (ދެ މިލިއަން ހަ ލައްކަ ފަންސާސް ނުވަހާސް ފައްސަތޭކަ ހަތް ރުފިޔާ ސާޅީސް ފަސް ލާރި) ލިބިފައިވެ އެވެ.
ތުރުކީވިލާތާއި ސޫރިޔާ ގުޅޭ ސަރަހައްދަށް މި މަހުގެ ހަ ވަނަ ދުވަހު ރެކްޓާ މިންގަނޑުން 7.8 ގެ ބާރުމިނުގައި އައި ބިންހެލުމުގައި މިހާތަނަށް ވަނީ 41،000 ވުރެ ގިނަ މީހުން މަރުވެފަ އެވެ.
އެ ދުވަހުގެ ބިންހެލުމަށްފަހު އެރި 300 އެތައް ލޮޅުމެއްގެ ސަބަބުން އެ ކާރިސާގައި އިމާރާތްތައް ދަށުވި މީހުން ސަލާމަތް ކުރުމުގެ މަސައްކަތަށް ވަނީ އެކިވަރުގެ ގޮންޖެހުން ކުރިމަތިވެފަ އެވެ.
އެ ކާރިސާއަކީ މިފަހުގެ ތާރީހެއްގައި ކުރިމަތިވި އެފަދަ އެންމެ ހިތާމަވެރި އެއް ހާދިސާ އެވެ.
އެ ދެގައުމުން ހާލުގައި ޖެހުނު މީހުންނަށް އެހީވުމަށްޓަކައި ދިވެހި ސަރުކާރުން ވަނީ އެއް މިލިއަން މަސްދަޅު އެ ދެ ގައުމަށް ހަދިޔާ ކުރުމަށް ނިންމާފަ އެވެ. އެއީ ކޮންމެ ގައުމަކަށް ބައިލައްކަ މަސްދަޅެވެ.
އެ ބިންހެލުމުގައި އަނިޔާވި މީހުންނަށް ފަރުވާ ދިނުމަށް އިންޓަނޭޝަނަލް އެއިޑް ކެމްޕޭނާ ގުޅިގެން ރާއްޖޭގެ ޓީމެއް ވެސް ވަނީ ތުރުކީއަށް ގޮސްފަ އެވެ.
އޭގެއިތުރުން، އެ ދެގައުމަށް އެހީވުމަށް އިންޓަނޭޝަނަލް އެއިޑް ކެމްޕޭނުން ވެސް ވަނީ ރިލީފް ފަންޑެއް ހުޅުވާލާފަ އެވެ. އެ ފަންޑަށް މިހާތަނަށް ވަނީ 4،215،932.01ރ. (ހަތަރު މިލިއަން ދެ ލައްކަ ފަނަރަހާސް ނުވަސަތޭކަ ބައްތިރީސް ރުފިޔާ) ލިބިފަ އެވެ. އެ ފަންޑު އަދިވެސް ހުރީ ހުޅުވާލާފަ އެވެ.
