ގައުމީ ޓީމުގެ ކެޕްޓަން، އަކުރަމް އަބްދުލް ގަނީ (އަކޫ) އާއި ތަޖުރިބާކާރު މިޑްފީލްޑަރު، މުހައްމަދު އުމެއިރު، ކުރިއަށް އޮތް ސީޒަނުގެ ދެ ވަނަ ޑިވިޝަނުގައި ވިކްޓަރީ ސްޕޯޓްސް ކްލަބަށް ކުޅެން ސޮއިކޮށްފި އެވެ.
ވިކްޓަރީގެ ކޯޗަކަށް ހަމަޖައްސާފައިވަނީ ކުރިން އެ ކްލަބަށް ކުޅެފައިވާ ކާމިޔާބު ކޯޗު ސޮބާހު މުހައްމަދު އިބްރާހިމް (ސޮބާ) އެވެ.
އަކޫ އާއި އުމެއިރު ވަނީ މެދުކެނޑުމެއް ނެތި ފާއިތުވި 17 އަހަރު ފުރަތަމަ ޑިވިޝަނުގައި ކުޅެފަ އެވެ. އަކޫ އާއި އުމެއިރު އަދި ސޮބާ ވިކްޓަރީ އަށް ސޮއިކުރީ މިރޭ އެ ކްލަބުން އެބްސް އެންޑް ފްލޯގައި ބޭއްވި އިވެންޓެއްގަ އެވެ. އަކޫ އާއި އުމެއިރު 10 މަހުގެ ކޮންޓްރެކްޓެއްގައި ސޮއިކުރިއިރު، ސޮބާ އެއްބަސްވީ ފަސް މަހުގެ ކޮންޓްރެކްޓެއް އާ ކުރާ ގޮތަށެެވެ.
ފުޓްބޯޅަ ކެރިއަރު، ވިކްޓަރީން ފެށި އުމެއިރު، 34، އެންމެ ފަހުން އެ ކްލަބަށް ކުޅެފައިވަނީ 2012 ވަަނަ އަހަރު އެވެ. އެ ސީޒަނުގައި އަކޫ، 35، ވެސް ވަނީ ވިކްޓަރީގެ ރަތް ޖޯޒީގައި ކުޅެފަ އެވެ.
މީގެ 10 މަސް ކުރިން، ސަސްޕެންޝަނުން ސަލާމަތްވެ، ވިކްޓަރީން ވަނީ މިދިޔަ އަހަރު ދެ ވަނަ ޑިވިޝަނުގައި ވާދަކޮށްފަ އެވެ. އެފްއޭއެމް އިން ވިކްޓަރީ ސަސްޕެންޑްކުރީ 2019 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެއީ ވިކްޓްރީން މުސާރަ ނުދޭ ދިވެހި ކުޅުންތެރިންނާއި ބިދޭސީ ކުޅުންތެރިންގެ މައްސަލަ އެފްއޭއެމާއި ފީފާގައި އޮތުމުންނެވެ. ވިކްޓަރީގެ އާ ބޯޑުން ވަނީ އެ ދަރަނިތައް ދައްކައި، ކްލަބް ސަސްޕެންޝަނުން ސަލާމަތްކޮށްފަ އެވެ.
ސްރީ ލަންކާގެ ކޯޗު ޕަކީރު އަލީގެ އިރުޝާދުގެ ދަށުން، މިދިޔަ އަހަރު ދެ ވަނަ ޑިވިޝަނުގައި ކުޅުނު ވިކްޓަރީ އަށް މުބާރާތް ނިމުނީ ގްރޫޕް ސްޓޭޖުންނެވެ.
އުމެއިރު (ކ) އާއި އަކުރަމް ވިކްޓަރީ އަށް ސޮއިކުރުމަށް ފަހު ޖޯޒީ ދައްކާލަނީ.--- ފޮޓޯ: އަދަދު
މިދިޔަ އަހަރުގެ ދެ ވަނަ ޑިވިޝަން ފުޓްބޯޅަ މުބާރާތަށް ވިކްޓަރީން ތައްޔާރީތައް ފެށިއިރު، އެހެން ޓީމުތައް ވަނީ ރަނގަޅު ފެންވަރުގެ ކުޅުންތެރިންނާ އެކު، ރަނގަޅު ޓީމުތަކެއް އެކުލަވާލައިފަ އެވެ. އެހެންވެ، ވިކްޓަރީ އަށް ރަނގަޅު ޓީމެއް އެކުލަވާލަން ގޮންޖެހުން ކުރިމަތިވި އެވެ.
މިދިޔަ އަހަރު ދިމާވި ހާލަތުން އިބުރަތް ހޯދައި، ވިކްޓަރީން މި ވަނީ ދުރާލާ މި އަހަރުގެ ދެ ވަނަ ޑިވިޝަން ފުޓްބޯޅަ މުބާރާތަށް ތައްޔާރުވުމުގެ މަސައްކަތް ފަށައިފަ އެެވެ. އަކޫ އާއި އުމެއިރުގެ ސޮއި ހޯދުމަކީ އޭގެ ފެށުމެކެވެ.
އެފްއޭއެމް އިން ކްލަބްތަކަށް ދީފައިވާ، މި ސީޒަނުގެ ޓެންޓޭޓިވް ކަލަންޑަރުގައި ދެ ވަނަ ޑިވިޝަން ފުޓްބޯޅަ މުބާރާތް ތާވަލުކޮށްފައި އޮތީ، އަންނަ އޮކްޓޫބަރު މަހަށެވެ.
ސޮބާ، ވިކްޓަރީ ކޯޗުކަމާ ހަވާލުވިއިރު، އޭނާ ވަނީ މީގެ ކުރިން ފުރަތަމަ ޑިވިޝަނުގައި، ނިއު ރޭޑިއަންޓާއި ކްލަބް ގްރީން ސްޓްރީޓްސް އަދި ކްލަބް ވެލެންސިއާ އަށް ކޯޗުކޮށްދީފަ އެވެ، މިދިޔަ އަހަރު އޭނާ ފެނުނީ ދެ ވަނަ ޑިވިޝަނުގައި ނިއުގެ ކޯޗެއްގެ ގޮތުގަ އެވެ.
އަކުރަމް އާއި އުމެއިރުގެ ކެރިއަރަށް ކަޅިއެއް
ވިކްޓަރީގެ ޑިފެންޑަރެއްގެ ގޮތުގައި 2006 ވަނަ އަހަރު ކެރިއަރު ފެށި އުމެއިރު ވަނީ ޒުވާން އުމުރުގައި އެ ޓީމުގެ ކެޕްޓަންކަން ވެސް ކޮށްފަ އެވެ. ވިކްޓަރީ ދޫކޮށް، 2010 ވަނަ އަހަރު ވީބީ ސްޕޯޓްސް ކްލަބަށް ކުޅުމަށް ފަހު، އުމެއިރު، 2011 ވަނަ އަހަރު ފެނުނީ، މާޒިޔާ އިންނެވެ. އޭގެ ޖެހިގެން އައި އަހަރު، 2012 ގައި އަލުން ވިކްޓަރީ އަށް ބަދަލުވި އެވެ.
އޭގެ ފަހުން، އުމެއިރު ފެނުނީ ވެލީޒާ ޕޮޕޯފްގެ އިރުޝާދުގެ ދަށުން 2013 ވަނަ އަހަރު ނިއު ރޭޑިއަންޓުން ރާއްޖޭގެ ހުރިހާ މުބާރާތެއް ކާމިޔާބުކޮށް، ފުރިހަަމަ ކުރި ރެކޯޑް ސީޒަނުގައި އެ ޓީމުންނެވެ. ނިއު އަށް 2015 ވަނަ އަހަރުގެ ޖެނުއަރީގައި ކުޅުނު ޕީޕަލްސް ކަޕްގެ ނިޔަލަށް ކުޅުމަށް ފަހު، އުމެއިރު ދެން ފެނުނީ މާޒިޔާ އިންނެވެ. އެ ޓީމަށް 2017 ގެ ނިޔަަލަށް ކުޅުމަށް ފަހު، ދެން ބަދަލުވީ ކްލަބް ގްރީން ސްޓްރީޓްސް އަށެވެ. އޭގެ ފަހުން، 2020 ގައި އަނެއްކާ ވެސް މާޒިޔާ އަށް ބަދަލުވިއިރު، މިދިޔަ ސީޒަނުގައި ލޯން އުސޫލުން ފެނުނީ ވެލެންސިއާ ޓީމުންނެވެ.
މިދިޔަ އޮކްޓޫބަރު މަހު ކަކުލުގެ އޮޕަރޭޝަނެއް ކުރި އަކުރަމް، ކެރިއަރު ފެށީ 2006 ވަނަ އަހަރު ވެލެންސިއާ އިންނެވެ. އޭގެ ފަހުން 2007 އިން 2009 އަށް އަކުރަމް ފެނުނީ ނިއު ރޭޑިއަންޓުންނެވެ. ނިއު ދޫކޮށް 2010 ވަނަ އަހަރު ވީބީ އައްޑޫ އެފްސީ އަށް ކުޅުމަށް ފަހު 2011 ވަނަ އަހަރު ހޭދަކުރީ މާޒިޔާގަ އެވެ. އަދި 2012 ވަނަ އަހަރު ވިކްޓްރީ އަށް ކުޅުނެވެ.
އަކުރަމް، ދެ ވަނަ ފަހަރަށް ވެލެންސިއާ އަށް ބަދަލުވީ 2013 ވަނަ އަހަރު އެވެ. އޭގެ ފަހުން ނިއު އަށް އަނެއްކާ ވެސް ބަދަލުވި އެވެ. ނިއު އަށް 2014 ވަނަ އަހަރުގެ ސީޒަންގެ ނިޔަލަށް ކުޅެ، 2015 އާއި 2016 ކުޅުނީ އަނެއްކާ ވެސް ވެލެންސިއާ ޖޯޒީގަ އެވެ. ވެލެންސިއާ ދޫކޮށް 2017 ގައި ނިއު އަށް ބަދަލުވެ، އެ ޓީމަށް ކުޅުނެވެ. އޭގެ ފަހުން 2018 ވަނަ އަހަރު ޓީސީ ސްޕޯޓްސް ކްލަބަށް ވެސް ވަނީ ކުޅެފަ އެވެ. ޓީސީ ދޫކޮށް 2019 ވަނަ އަހަރު ވެލެންސިއާ އަށް ކެރިއަރުގެ ހަތަރު ވަނަ ފަހަރަށް ބަދަލުވި އެވެ.
އޭގެ ފަހުން، 2020 ވަނަ އަހަރުގެ އޮގަސްޓް މަހު ކްލަބް އީގަލްސް އިން އޭއެފްސީ ކަޕްގެ ޕްލޭއޮފްގައި ބެންގަލޫރާ ދެކޮޅަށް ކުޅުނު މެޗުގައި އަކުރަމް ވަނީ އީގަލްސް އަށް ކުޅެފަ އެވެ. އެ އަށް ފަހު، މިދިޔަ ސީޒަނުގައި އަކުރަމް ވަނީ ކެރިއަރުގައި ދެ ވަނަ ފަހަރަށް މާޒިޔާ އަށް ކުޅެފަ އެވެ.
