މާލެ ސަރަހައްދުގައި ދިރިއުޅޭ ފަރާތްތަކުގެ ތެރެއިން ފަގީރުންގެ ދަފްތަރުގައި ރަޖިސްޓްރީވުމަށް ނަން ނޯޓުކޮށްފައިވާ ފަރާތްތަކުގެ ތެރެއިން އެ ދަފުތަރުގައި ނަން ނެތް ފަރާތްތަކަށް އެކަމުގެ ޝަކުވާ ހުށަހެޅުމަށް ފުރުސަތު ހުޅުވާލައިފި އެވެ.
އިސްލާމިކް މިނިސްޓްރީން ނެރުނު އިއުލާނެއްގައި ބުނީ މާލެ، ހުޅުމާލެ އަދި ވިލިމާލޭގައި ދިރިއުޅޭ ފަރާތްތަކުގެ ތެރެއިން 22 ޑިސެމްބަރު 2022 އިން 19 ޖެނުއަރީ 2023 އަށް ޝަކުވާ ހުށަހެޅި ފަރާތްތަކުގެ ފޯމަށް ޖަވާބު ދީފައިވާ ކަމަށެވެ.
އެހެން ކަމުން އެ ދަފްތަރުގައި ހިމެނިފައިނުވާ ފަރާތްތަކުން ޝަކުވާ ހުށަހަޅަން އެދޭނަމަ އިސްލާމިކް މިނިސްޓްރީގެ ކައުންޓަރަށް ނުވަތަ ޒަކާތު ދަފްތަރަށް މެއިލް ކުރެވޭނެ ކަމަށް އިއުލާނުގައި ބުންޏެވެ.
މެއިލް ފޮނުވާއިރު، ސަބްޖެކްޓުގައި ފޯމު ހުށަހެޅި ފަރާތުގެ ނަމާއި އައިޑީ ކާޑު ނަމްބަރާއި ފޯމު ނަމްބަރު ޖެހުމަށްވެސް މިނިސްޓްރީން ވަނީ އެދިފަ އެވެ.
މެއިލް ފޮނުވަންޖެހޭނީ މިމަހުގެ 16 ވަނަ ދުވަހުގެ މެންދުރު 2:00 ގެ ކުރިންނެވެ.
އިސްލާމިކް މިނިސްޓްރީން ބުނީ އެ ތާރީހަށް ފަހުގައި ހުށަހެޅޭ އެއްވެސް ޝަކުވާއެއް ބަލައިނުގަނެވޭނެ ކަމަށެވެ.
