އެފްއޭއެމް 17 އަަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ، ކ. ގުރައީދޫ ސްކޫލާއި ކަލާފާނު ސްކޫލު ބައްދަލުކުރި މެޗުގައި ހިނގި ހަމަނުޖެހުން އެޑިއުކޭޝަން މިނިސްޓްރީން ކުށްވެރިކޮށްފި އެވެ.
އެޑިއުކޭޝަން މިނިސްޓްރީން ނެރުނު ނޫސް ބަޔާނެއްގައި ބުނެފައި ވަނީ، މިދިޔަ ހޯމަ ދުވަހު ކުރިއަށް ދިޔަ މި ފުޓްބޯޅަ މެޗު ނިމުމުން ދަނޑަށް އަރާ ސަޕޯޓަރުންގެ ބަޔަކު ވަނީ ކުޅިވަރުގެ ރޫހާ ހިލާފް އަމަލުތަކެއް ހިންގާފައި ކަމަށެވެ.
"އިއްޔެ މެޗު ނިމުމުން ސަޕޯޓަރުން ހިންގި ކުޅިވަރުގެ ރޫހާ ހިލާފް އަމަލުތައް މި މިނިސްޓްރީން ހަރުކަށި އިބާރާތުން ކުއްވެރިކުރަމެވެ. އަދި މިފަދަ އަމަލުތައް ދަރިވަރުންގެ ކުރިމަތީގައި ތަކުރާރު ނުކުރުމަށް ބެލެނިވެރިންނާއި ސަޕޯޓަރުންނަށް އިލްތިމާސްކުރަމެވެ." އެޑިއުކޭޝަން މިނިސްޓްރީގެ ބަޔާނުގައި ބުންޏެވެ.
މި މުބާރާތަކީ ކުޅިވަރުގެ ހުނަރުގެ އިތުރުން ދަރިވަރުންގެ ކިބައިގައި ރިވެތި އަހްލާގާއި ސިފަ އަށަގެންނެވުމަށް ކުރިއަށް ގެންދާ ހަރާކްތަކަކަށް ވާއިރު، އެކި ހައިސިއްޔަތުތަކުން މި މުބާރާތުގައި ބައިވެރިވާ ފަރާތްތަކުގެ ކިބައިން ވެސް އެދެނީ ރިވެތި ނަމޫނާ ފެނިގެން ދިއުން ކަމަށް މިނިސްޓްރީން ބުނެފައި ވެއެވެ.
ގަލޮޅު ދަނޑުގައި ހޯމަ ދުވަހު ކުޅުނު މެޗު ނިމުމަށް ފަހު ގުރައިދޫގެ ކުޅުންތެރިންގެ ބެލެނިވެރިންގެ ތެރެއިން ބަޔަކާއި ޓީމުގެ އޮފިޝަލުން އަދި ކުޅުންތެރިން ވެސް ހިމެނޭ ގޮތަށް ރެފްރީ ފަހައި ވަނީ ދުވެފަ އެވެ. ރެފްރީ އަށް ގުރައިދޫގެ ގިނަ ފަރާތްތަކެއް ހިމެނޭހެން ހަމަލާދޭ މަންޒަރު ފެންނަ ވީޑިއޯ ސޯޝަލް މީޑިއާގައި ވައިރަލްވެފައިވާއިރު، ރެފްރީސް ރޫމާ ހަމައަށް ދުވެފައި ދާތަން ވެސް ފެނެ އެވެ.
