ބ. ކެންދޫގައި ވެލާތަކެއް ފެޅި މައްސަލާގައި ޝާމިލުވާ ފަސް މީހުން ހައްޔަރުނުކޮށް, ބަޔާން ނެގުމަށްފަހު ދޫކޮށްލީ ކަމަށް އެންވާރަމަންޓް ޕްރޮޓެކްޝަން އެޖެންސީ (އިޕީއޭ) އިން ބުނެފި އެވެ.
އީޕީއޭއިން މިއަދު ކުރި ޓްވީޓެއްގައި ބުނީ މިމަހު ތިން ވަނަ ދުވަހު ފުލުހުން ވަނީ ހަ ވެލާ ކަތިލުމުގައި ބައިވެރިވި ފަސް މީހުންގެ ގްރޫޕެއް އަތުލައިގެންފައި ކަމަށެވެ. އަދި އެމީހުން އަތުލައިގަތީ ވެލާ މަސް ކައްކާ, ފުޅާ ދާއިރާއެއްގައި ޕްރޮސެސް ކުރުމުގެ މަސައްކަތް ކުރަމުން ދަނިކޮށް ކަމަށެވެ.
ހިމާޔަތްކޮށްފައިވާ ވެލާ ކަތިލާ, ކައްކަނިކޮށް އަތުލައިގަތީ ކެންދޫއަށް ނިސްބަތްވާ ފަސް މީހުން ކަމަށް އީޕީއޭއިން ބުނެ އެވެ.
އީޕީއޭއިން ބުނީ, އެ ހާދިސާއާ ގުޅޭ ހެއްކާއި, އެހެނިހެން މައުލޫމާތު ހޯދުމުގައި ފުލުހުންނަށް އެހީތެރިވެދިނުމުގެ ގޮތުން އެ އެޖެންސީގެ އިތުރުން, ބ. އަތޮޅު ބައޮސްފެއާ ރިޒާވްގެ މުވައްޒަފުން ވެސް އެ ސަރަހައްދަށް ގޮސް ހަރަކާތްތެރިވެފައިވާ ކަމަށެވެ.
އެ މައްސަލާގައި ޝާމިލުވާ ފަސް މީހުން ބަޔާން ނެގުމަށްފަހު ދޫކޮށްލާފައިވާކަން ވެސް އީޕީއޭއިން ބުނެ އެވެ. އެ އެޖެންސީން ބުނީ އެ މީހުން ދޫކޮށްލީ ގާނޫނީ މަރުހަލާ ކުރިއަށް ދާތީ, އިތުރު ފިޔަވަޅެއް އެޅެންދެން ކަމަށެވެ.
މިމަހު ތިން ވަނަ ދުވަހުގެ ހަވީރު ފުލުހުންނަށް ރިޕޯޓުކުރި މި މައްސަލައާ ގުޅިގެން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް މީގެ ކުރިން "އަދަދު"އަށް ވިދާޅުވީ އެ ހާދިސާގައި, މީހުން އަތުލައިގަތް އިރު އެމީހުން ވަނީ ވެލާގެ މަސް ނަގައި، އޭގައިން ތެޔޮ ހޭނާފައި ކަމަށެވެ.
ވެލާ ކަހަނބުގެ ދިރުންްތައް މުޅި ދުނިޔެއިން ވެސް ނެތިގެން ހިނގައިދާނެ ކަމުގެ ބިރާ އެކު އެތަކެއްޗަށް ގެއްލުން ދިނުމާއި، އެތަކެތީގެ މަސްކެއުމުގެ ބޭނުމުގައި މަރަމުން ދިއުމަަކީ މަނާ ކަމެކެވެ. 2016 ވަނަ އަހަރުން ފެށިގެން ވެލާ ކަހަނބު ވަނީ ފުރިހަމައަށް ހިމާޔަތްކޮށްފަ އެވެ.
ވެލާ ބިސް ވިއްކުން މަނާކޮށްފައި ވަނީ 1996 ވަނަ އަހަރު އެވެ. 2006 ވަނަ އަހަރު ވެލާ ކަހަނބު އަރާ 14 ރަށަކުން ބިސްނެގުން މަނާކުރި އެވެ.
