މި އަހަރު ނިމުމުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ހިދުމަތް ގާއިމްކުރުމަށް ނިންމާފައިވާ ކަމަަށް ރައީސް އިބްރާހިމް މުހައްމަަދު ސޯލިހް ވިދާޅުވެއްޖެ އެވެ.
މި އަހަރު ރައްޔިތުންގެ މަޖިލިސް ހުޅުވަން މިއަދު ބޭއްވި ޖަލްސާގައި މި ދައުރުގެ ފަސްވަނަ ރިޔާސީ ބަޔާން އިއްވަމުން ރައީސް ސޯލިހު ވިދާޅުވީ، މީހުން ދިރިއުޅޭ ހުރިހާ ރަަށެއްްގައި ފުލުހުންގެ ހިދުމަތް ގާއިމްކުރުމަކީ ބޮޑު އެހެން ނަމަވެސް އަދި ނުވެ އޮތް ކަމެއް ކަަމަށެވެ. މި އަހަރު ނިމުމުގެ ކުރިން މީހުން ދިރިއުޅޭ ހުރިހާ ރަށެއްގައި ފުލުހުންގެ ހިދުމަތް ގާއިމްކުރާނެ ކަމަށް ރައީސް ސޯލިހް ވިދާޅުވި އެވެ.
"ފާއިތުވި އަހަރު ފުލުހުންގެ 18 މަރުކަޒެއް ހުޅުވި ހިދުމަތް ދޭން ފެށުނު. އަދި އިރާދަކުރެއްވިއްޔާ ރާއްޖޭގެ މީހުން ދިރިއުޅޭ ހުރިހާ ރަށެއްގައި މި އަހަރު ނިމޭއިރު ފުލުހުންގެ ހިދުމަތް ގާއިމް ކުރެވޭނެ," ރަައީސް ސޯލިހް ވިދާޅުވި އެވެ.
ރައީސް ވިދާޅުވީ ރާއްޖޭގެ ދާހިލީ އަމަން ބެލެހެއްޓުމުގައި އެންމެ ބުރަ މަސްއޫލިއްޔަތެއް އަަދާކުރަނީ ދިވެހި ފުލުހުން ކަމަށާއި، ރާއްޖޭގެ ރަށްތައް އެތުރިފައިވާ ގޮތުން ހިދުމަަތް ދިނުމުގައި ހުރި ގޮންޖެހުންތައް "ނުހަނު ބޮޑު" ކަމަށެވެ.
މީގެ އިތުރުން ރައީސް ވިދާާޅުވީ، 2021 ވަނަ އަހަރުގެ މާޗް 2021ގެ ތެރޭގަައި ތަސްދީގުކުރެވުނު ދިވެހި ފުލުހުންގެ ގާނޫނުގެ މަންފާ ރައްޔިތުންނަށް ދަނީ ލިބެމުން ކަަމަަށާއި، މިހާތަނަށް 100 އަށްވުރެ ގިނަ ރަށުގައި ނޭބާހުޑް ފުލުހުންގެ ހިދުމަަތް ގާއިމްކުރެވިފައިވާ ކަމަށެވެ.
"ބޮޑީ ވޯން ކެމެރާ ތައާރަފް ކުރެވި ރައްޔިތުންނާ ފުލުހުންގެ ރައްކާތެރިކަމަށް އޮންނަ ޖާގަ ފުޅާ ކުރެވިއްޖެ. ރާއްޖޭގެ ފުލުހުންގެ އޮފިސަރަކު ފުރަތަމަ ފަހަރަށް އިންޓަޕޯލްގާ މިހާރު މަސައްކަތްކުރަމުން އެބަގެންދޭ. މިއީ ދިވެހި ފުލުހުންގެ ހިދުމަތަށް ލިބުނު ބޮޑު ޝަރަފެއް," ފުލުހުންގެ ގާނޫނުގެ ދަށުން ލިބުނު ކުރިއެރުންތައް ފާހަގަކުރަމުން ރައީސް ސޯލިހް ވިދާޅުވި އެވެ.
ރާއްޖޭގެ ދިފާއީބާރުގައި ހިމެނޭ އިދާރާތަކުން މިދިޔަ ހަތަރު އަހަރު ތެރޭގައި 25610 އަށްވުރެ ގިނަަ އޮޕަރޭޝަން ހިންގާފައިވާކަން ރައީސް ސޯލިހް ފާހަގަކުރެއްވި އެވެ.
"ދިވެހިރާއްޖޭގެ ގައުމީ ދިފާއީ ބާރަކީ ރާއްޖޭގެ މިނިވަންކަމާ އިސްތިގްލާލަށް ލިބިފައިވާ ޖޯރު. ދިވެހި ގައުމިއްޔަތުގެ ހުރިހާ ރުކުންތަކުގެ ދިފާއުގައި ތިބީ ރާއްޖޭގެ ސަލާމަތީ ހިދުމަތްތަށް. ބޭނުންވާ ޒަމާނީ ތައުލީމާ ތަމްރީނާ ވަސީލަތް ތަށް ފަހިވެ، ފުރިހަމަ ވެގެން މެނުވީ އަދުގެ ދުނިޔޭގެ ހަލަބޮލި ކަމުގައި ހިފަހައްޓައެއް ނުލެވޭނެ." ރައީސް ސޯލިހް ވިދާާޅުވި އެވެ.
