އަންނަ މެއި މަހުގެ އެއް ވަނަ ދުވަހުން ފެށިގެން ސިއްހީ ދާއިރާގެ ހުރިހާ މުވައްޒަފުންގެ މުސާރަ ބޮޑުވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މި އަހަރަށް މަޖިލިސް ފެށުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހު ވަނީ ފާއިތުވީ އަހަރު މުދައްރިސުންގެ މުސާރަ ބޮޑުކޮށްދެވިފައިވާ ކަން ފާހަގަކުރައްވައި ކުރިއަށް އޮތީ ސިއްހީ ދާއިރާގެ މުވައްޒަފުން ކަމަށް ވިދާޅުވެފަ އެވެ.
"އިރާދަ ކުރެއްވިއްޔާ އަންނަ މޭ މަހުގެ އެކަކުން ފެށިގެން ސިއްހީ ދާއިރާގެ މުވައްޒަފުންގެ މުސާރަ ބޮޑުވެގެންދާނެ،" ރައީސް ސޯލިހު ވިދާޅުވި އެވެ.
ސިއްހީ ދާއިރާގެ އިތުރުން ބައެއް އެހެނިހެން މުވައްޒަފުންގެ މުސާރަ ބޮޑުވެގެން ދާނެ ކަން ވެސް ރައީސް ފާހަގަކުރެއްވި އެވެ. އެގޮތުން ސަރުކާރުގެ ވުޒާރާތަކުގައި 35 ޕަސަންޓް އެލަވަންސް ނުލިބި ތިބި މުވައްޒަފުންނަށް މެއި މަހުން ފެށިގެން އެލަވަންސް ލިބޭނެ ކަމަށް ވިދާޅުވި އެވެ.
އަދި، ޔުނިވާސިޓީތަކުގެ ލެކްޗަރާއިންގެ މުސާރައަށް ވެސް އަންނަ މާޗު މަހުން ފެށިގެން "ހެޔޮ ބަދަލެއް" އަންނާނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ ޕޭ ހާމަނައިޒޭޝަންގެ މަސައްކަތުގެ ތެރެއިން ސިވިލް ސާވިސް ހުރިހާ މުވައްޒަފުންގެ މުސާރައަށް ވެސް ބަދަލު އަންނާނެ ކަމަށެވެ.
"ޕޭ ހާމަނައިޒް ކުރުން ނިމިގެން ދާއިރު، ޝަރުއީ ދާއިރާ އާ އިމާމުންނާއި މުދިމުންނާ އަދި ޖުމްލަކޮށް ސިވިލް ސާވިސްގެ ހުރިހާ މުވައްޒަފުން ޝާމިލްވާނެ،" ރައީސް ވިދާޅުވި އެވެ.
ރިޔާސީ ބަޔާނުގައި ރައީސް ވަނީ މިދިޔަ އަހަރު ތަންފީޒު ކުރަން ފެށުނު މިނިމަމް ވޭޖާއި ގެނެވުނު ސާވިސް ޗާޖާ ގުޅޭ ބަދަލުގެ ސަބަބުން އެތައް ހާސް މަސައްކަތްތެރިންނަށް "ހެޔޮ ބަދަލެއް" އައިސްފައިވާ ކަމަށެވެ.
"މަދުވެގެން 10 އިންސައްތައިގެ ސާވިސް ޗާޖެއް ނަގާ މުވައްޒަފުންގެ މެދުގާ ހަމަހަމައަށް ބެހުން ލާޒިމްކުރާ ގާނޫނީ ބަދަލު، މުވައްޒަފުންގެ އާމްދަނީއަށް އައި ބަދަލުން އެ އާއިލާތަކުގެ ދިރިއުޅުމުގެ ހާލަތު ރަނގަޅުވެއްޖެ،" ރައީސް ވިދާޅުވި އެވެ.
މަޖިލީހަށް މިހާރު ފޮނުވާފައިވާ އޮކިއުޕޭޝަނަލް ހެލްތް އެންޑް ސޭފްޓީ ބިލަށް ވެސް ރައީސްގެ ރިޔާސީ ބަޔާނުގައި ވަނީ އަލިއަޅުވާލައްވައިފަ އެވެ. އަދި އިންޑަސްޓްރިއަލް ރިލޭޝަންސް ބިލް މި ދައުރުގައި ފޮނުވާނެ ކަން ފާހަގަކުރައްވައި ރައީސް ވަނީ އެ ދެ ބިލުގެ މަސައްކަތް ވީހާ ވެސް އަވަހަށް ނިންމައިދިނުމަށް މެންބަރުންގެ އަރިހުން އެދިވަޑައިގެންފަ އެވެ.
