ޅ. އޮޅުވެލިފުށްޓަކީ ސާފު ފަޅަކާއި، ޗާލު ފަރަކާއި ވަށައިގެންވާ ދޮންވެލީގެ ގޮނޑުދޮށަކާއި ހިޔާ ދޭ ބިޔަ ގަސްތައް ގިނަ، 26 ހެކްޓަރުގެ ޖަޒީރާ އެކެވެ.
ހަތް ސަތޭކައަށް ވުރެ ގިނަ މީހުންގެ އާބާދީއެއް އޮތް މި ރަށުގެ ގިނަ ޒުވާނުން ވަޒީފާ އަދާކުރަނީ ރިސޯޓުތަކުގަ އެވެ. ބައެއް މީހުން މަހަށް ދާއިރު، ރަށުގައި ފުޅާ ދާއިރާއެއްގައި ދަނޑުވެރިކަން ވެސް ކުރެ އެވެ. ސާޅީހަކަށް ދަނޑުބިން ދޫކޮށްފައިވެ އެވެ. އެދަނޑުތައް ހައްދައި ބަލަހައްޓަނީ ރަށުގެ ރައްޔިތުންނެވެ.
އޮޅުވެލިފުއްޓަނީ ބިޔަ ގަސްތައް ގިނަ ރަށެއް. -- ފޮޓޯ: އަހުމަދު ރައުފު
ދަނޑުވެރި ނަފާ ހޯދަނީ ހައްދާ ތަކެތި ރަށަށް ވިއްކައިގެންނާއި އަތޮޅުގެ އެހެން ރަށްރަށަށް ވިއްކައިގެންނެވެެ.
އޮޅުވެލިފުއްޓާ ގުޅޭ ގޮތުން މާ ގިނަ ވާހަކަތަކެއް ނެތަސް، އެއީ ދިވެހި ސަގާފަތާއި އާދަކާދަ ދަމަހައްޓާ، ރަށު ވަންތަ، އެކުވެރި ބަޔަކު އުޅޭ ރަށެކެވެ. އާބާދީގެ ގިނަ މީހުން ދިރިއުޅެނީ ވެސް ރަށުގަ އެވެ.
ހާއްސަ ދުވަސްތައް ފާހަގަ ކުރުމަށްޓަކައި ބޮޑުބެރު ޖެހުމާއި ކޯޑި ކެނޑުން ފަދަ ކުޅިވަރުތައް ބާއްވާއިރު، އީދު ބަންދުގައި ސްޓޭޖް ޝޯ އާއި ތަފާތު އެހެން ކުޅިވަރުތައް ކުޅެއެވެ. ރަށުގައި އޮންނަ ބޮޑު ބާބަކިއު އަކީ ފާހަގަ ކޮށްލެވޭ، ރަށުގެ އެކުވެރިކަމާއި ގުޅުން ރަމްޒުކޮށްދޭ ހަރަކާތެކެވެ.
އޮޅުވެލިފުށީ ސްކޫލުގައި ގްރޭޑު 10 އަށް ކިޔަވައިދޭއިރު، ތައުލީމު ހާސިލު ކުރަނީ 135 ދަރިވަރުންނެވެ. ރަށުގައި ހުރި އާދައިގެން ސިއްހީ މަރުކަޒު އަޕްގްރޭޑު ކުރުމުގެ މަސައްކަތް ކުރިއަށް ގެންދާއިރު، ފެނާއި ނަރުދަމާ ގާއިމުކުރުން ކުރިއަށް އެބަ ގެންދެ އެވެ. ރަނގަޅު ބަނދަރެއް އެބަ އޮތެވެ. ސައުވީސް ގަޑިއިރު ކަރަންޓުގެ ހިދުމަތް ލިބެ އެވެ.
އާންމު ވިޔަފާރިތަކަށް ބަލާއިރު، ހައެއްކަ ފިހާރަ އާއި ދެ ކެފޭ ހުރެ އެވެ. އަތޮޅު ވަށައިގެން ރިސޯޓުތައް ހުރިއިރު، އޮޅުވެލިފުށީގައި މިހާރު ގެސްޓް ހައުސްއެއް އެބަ ހުއްޓެވެ.
މި ރަށުން ދޭ މެސެޖެއް އެބަ އޮތެވެ. ރަށުގެ ހަމަޖެހުމާއި އުޅުމާއި ގުޅުން، ރަށުގެ ވެށީގެ ރީތިކަމާ އެއް މިންވަރަށް ޗާލުވުމެވެ. އެއީ ރަށަށް ޒިޔާރަތްކުރާ މީހުންނަށް ލިބޭ އިތުރު ހިތްހަމަކެހުމެކެވެ. އުފަލެކެވެ.
