މިއަހަރު ސެޕްޓެމްބަރު މަހު ބާއްވަން ހަމަޖެހިފައިވާ ރިޔާސީ އިންތިހާބާ ގުޅޭ އެކި މަސައްކަތްތައް ކުރުމަށް އިލެކްޝަންސް ކޮމިޝަން (އީސީ) އިން ގިނަ އަދަދެއްގެ ކޮންޓްރެކްޓް މުވައްޒަފުން ހޯދަން އިއުލާންކޮށްފި އެވެ.
އިލެކްޝަން ކޮމިޝަނުން ވަނީ 203 އޮފިސަރުންނާއި، 39 ސީނިއާ އޮފިސަރުން ހޯދަން އިއުލާންކޮށްފަ އެވެ.
އޮފިސަރުގެ މަގާމަށް އިލެކްޝަނުން ހުށަހަޅާފައި ވަނީ 10،000ރ. މުސާރަ އެކެވެ. އަދި ސީނިއާ އޮފިސަރުގެ މަގާމަށް ހުށަހަޅާފައި ވަނީ 12،000ރ. މުސާރަ އެކެވެ. އޭގެ އިތުރުން ނުރަސްމީ ގަޑީގައި ނިކުމެ ކުރާ މަސައްކަތްތަކަށް ކަނޑައެޅިފައިވާ އުސޫލުން އިތުރު ގަޑީގެ ފައިސާ ދޭނެ ކަމަށް އީސީގެ އިއުލާނުގައި ވެއެވެ.
އީސީން އިއުލާންކޮށްފައިވާ މި ވަޒީފާތަކަށް މާބޮޑެތި ޝަރުތުތަކެއް ނެތްއިރު، މި މަގާމުތަކަށް އެދި ހުށަހެޅުމުގެ ފުރުސަތު ހުޅުވާލާފައި ވަނީ އަންނަ އެޕްރީލް 30، ގެ ނިޔަލަށެވެ.
މި ވަޒީފާތަކަށް ނަގާ މީހުންނަކީ ސިޔާސީ ޕާޓީއެއްގެ ހަރަކާތްތަކުގައި އިސްކޮށް އުޅޭ މީހަކަށް ވެގެން ނުވާނެ އެވެ. ހަމައެއާއެކު ސިޔާސީ ޕާޓީއެއްގެ ދަފްތަރުގައި އޮތް މީހެއް ނަމަ، ވަޒީފާއަށް ހޮވުމުން އެ ޕާޓީއަކުން ވަކިވާން ޖެހޭނެ އެވެ.
ޖުމްލަ 242 ވަޒީފާއަށް މީހުން ހޯދުމަށް އިލެކްޝަންސް ކޮމިޝަނުން އިއުލާން ކޮށްފައިވާއިރު، ވަޒީފާއަށް އެދި ހުށަހަޅަން ޖެހެނީ ވަޒީފާއަށް އެދޭ ފޯމާއި، އައިޑީ ކާޑު ކޮޕީ، ސީވީ އަދި އަސްލާ އެއްގޮތް ކަމަށް ތައްގަނޑު ޖަހާފައިވާ ތައުލީމީ ސެޓްފިކެޓްތަކުގެ ފޮޓޯކޮޕީ އެވެ.
