ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގައި ކުރިމަތިވި ނާކާމިޔާބީއަށް ފަހު ފުރަތަމަ ފަހަރަށް އެ ޕާޓީގެ ރައީސް މުހައްމަދު ނަޝީދު އެމަނިކުފާނުގެ ސަޕޯޓަރުންނާ މިވަގުތު ބައްދަލުކުރައްވަމުން އެބަ ގެންދަވަ އެވެ.
ހެންވޭރު ބޮޑުތަކުރުފާނު މަގު އަލިމަސް ކާނިވަލް ސަރަހައްދުގައި ހުންނަ ދޮންމަނިކު ސްކައި ވިއު ރެސްޓޯރަންޓުގައި ނަޝީދު ގެންދަވަނީ އެމަނިކުފާނުގެ ސަޕޯޓަރުންނާއި ކެމްޕޭން ޓީމުތަކުގެ މެމްބަރުންނާ އެކު މެންދުރުގެ ފަރިއްކޮޅަކަށް އިންސާފު ކުރައްވަމުންނެވެ.
މިއީ އިންތިހާބުން ބަލިވި ފަހުން ނަޝީދު އާންމު ތަނަކުން ފެނިވަޑައިގެންނެވި ފުރަތަމަ ފަހަރެވެ. އަދި، އިންތިހާބުގެ ނަތީޖާއާ ގުޅޭގޮތުން އާންމު ޕްލެޓްފޯމެއްގައި އެމަނިކުފާނު ވާހަކަފުޅު ދައްކަވާފައެއް ނުވެ އެވެ.
ނަމަވެސް، މިއަދުގެ އިވެންޓުގައި އެކަމާއި ގުޅޭގޮތުން ވާހަކަފުޅު ދައްކަވާނެ ކަމަށް ބެލެވެ އެވެ.
ހޮނިހިރު ދުވަހުގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހާ ވާދަކުރައްވާ ބަލިވެވަޑައިގެންނެވި ފަހުން އެމަނިކުފާނު ވަނީ ރައީސް ސޯލިހާ އެކު ކުރިއަށް ވަޑައިގެން މި އަހަރުގެ ރިޔާސީ އިންތިހާބު ކާމިޔާބު ނުކުރެވޭނެ ކަމަށް ވިދާޅުވެފަ އެވެ.
ނަޝީދު ވަނީ 'ފިކުރެއްގެ ދިރުން' ނަމުގައި އެމްޑީޕީގެ ތެރޭގައި ވަކި ހަރަކާތެއް ކުރިއަށް ގެންދަވާނެކަމުގެ އިޝާރާތެއް ދެއްވައިފަ އެވެ. އަދި އެ ފެކްޝަނުން ތާއީދު ކުރާނެ ރިޔާސީ ކެންޑިޑޭޓެއް ފަހުން އިއުލާނު ކުރާނެ ކަމަށް ނަޝީދު ވިދާޅުވި އެވެ.
އޭގެ އިތުރުން، 'ފިކުރެއްގެ ދިރުން' ނަމުގައި އެމްޑީޕީގެ ގޮފިތައް ހުރިހާ ރަށެއްގައި ވެސް އަލުން ހެދުމަށާއި އެމްޑީޕީއިން ވަކިކުރި ކަމަށް އެމަނިކުފާނު ވިދާޅުވާ 39،000 މެންބަރުން އަލުން ޕާޓީއަށް ވަނުމަށް ވެސް ނަޝީދުގެ މެސެޖުގައި ވަނީ ގޮވާލައްވާފަ އެވެ.
"އެމީހުން [ވަކިކުރި 39،000 މެންބަރުން] އާއެކު އަޅުގަނޑުމެންނަށް ފެންނަ ގޮތެއް ނިންމުމަށް [ފެންނަނީ]. ފިކުރެއްގެ ދިރުންގެ ފަރާތުން ތާއީދު ކުރާ ރިޔާސީ ކެންޑިޑޭޓު ކަނޑައަޅާނީ ފަހުން،" ނަޝީދު ވިދާޅުވި އެވެ.
ނަޝީދު މިހެން ވިދާޅުވެފައިވާއިރު އެމްޑީޕީގެ ރިޔާސީ ޕްރައިމަރީ 61 އިންސައްތަ ވޯޓާއެކު ރައީސް ސޯލިހު ކާމިޔާބުކުރައްވާ ރިޔާސީ ޓިކެޓު ވަނީ ހޯއްދަވާފަ އެވެ. އެހެންކަމުން ނަޝީދުގެ ވަކި ހަރަކާތުން އެމްޑީޕީގެ ކެންޑިޑޭޓަށް ތާއީދުކުރާނެ ކަމުގެ ޔަގީންކަމެއް އަދި ދީފައިނުވާއިރު އެހެން ކެންޑިޑޭޓަކަށް ތާއީދުކުރުމުގެ ފުރުސަތުވެސް އެބައޮތްކަން ނަޝީދުގެ މެސެޖުން ފާހަގަވެ އެވެ.
