އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ގދ. ތިނަދޫއަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަޑައިގަތް ވަގުތު މުޒާހަރާކުރަމުން ދިޔަ އިދިކޮޅު ޕީޕީއެމްގެ ސަޕޯޓަރަކު ފުލުހުން މިއަދު ހައްޔަރުކޮށްފި އެވެ.
ތިނަދޫގައި މުޒާހަރާ ކުރީ ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލައި އަދި މަސްވެރިންނަށް ރައީސް ސޯލިހު ވެފައިވާ ވައުދުތައް ނުފުއްދަވާ ކަމަށް ބުނެ އެވެ.
އެ މުޒާހަރާގެ ތެރެއިން މީހަކު ހައްޔަރުކޮށްފައިވާ ކަމަށް ފުލުހުން ވެސް ބުންޏެވެ. ނަމަވެސް އޭނާ ހައްޔަރު ކުރި ސަބަބެއް ފުލުހުން ހާމައެއް ނުކުރެ އެވެ.
އަންނަ ހޮނިހިރު ދުވަހު އޮންނަ އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ރައީސް ސޯލިހު ރަށްރަށަށް ކުރައްވާ ދަތުރުފުޅާ ދިމާކޮށް، އެ ރަށެއްގައި ތިބޭ ޕީޕީއެމްގެ ސަޕޯޓަރުން އަންނަނީ ރައީސް އެ ރަށަކަށް ވަޑައިގަންނަވާ ވަގުތު ޔާމީން މިނިވަން ކުރުމަށް ގޮވާލަމުންނެވެ.
ފުލުހުން ބެރިކޭޑް ޖަަހައި، ވަކި ހިސާބަކު މުޒާހަރާގެ ބައިވެރިން ހުއްޓުވާފައި ތިއްބައި އެއަށް ވުރެ ކުރިއަށް ޖެހެން މަސައްކަތް ކޮށްފި ނަމަ ފުލުހުން ހުއްޓުވަ އެވެ. ފުލުހުންގެ އަމުރަށް ކިޔަމަންތެރިނުވެއްޖެ ނަމަ، ހުއްޓުވުމުގެ ގޮތުން ޕެޕާ ސްޕްރޭ ޖަހައި ބާރުގެ ބޭނުން ވެސް ކޮށްފައި އެބަހުއްޓެވެ.
އެ ފަދަ ހާލަތެއްގައި، ހާލަތާ ނުބައްދަލު ބާރެއް ފުލުހުން ބޭނުންކޮށްފައި އޮތްތޯ ބަލާނެ ކަމަށް ފުލުހުން މީގެ ކުރިން ބުނެފައިވެ އެވެ. ސަރަހައްދީ ޑިޕާޓްމަންޓުން "ލޯކަލް ރިވިއު" އެއް ތައްޔާރުކޮށް، ޕްރޮފެޝަނަލް ސްޓެންޑަޑަށް މައްސަލަ ފޮނުވަން ޖެހޭނަމަ ފޮނުވައިގެން ފިޔަވަޅު އަޅާނެ ކަމަށް ވެސް ބުނެފައިވެ އެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވީ މިދިޔަ ޑިސެމްބަރު 25، ގަ އެވެ. އެއީ އެމަނިކުފާނުގެ ވެރިކަމުގައި ހިންގި އެމްއެމްޕީއާރުސީގެ ހިޔާނާތުގެ ތެރެއިން ވ. އާރަށް ދިނުމުގައި 1.1 މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ.
