ކޮވިޑުގެ ބަލިމަޑުކަމަށްފަހު ފުރަތަމަ ފަހަރަށް ގައުމީ ކަބް ސްކައުޓް ރެލީ މިއަދު ބާއްވައިފި އެވެ.
ކަބް ސްކައުޓް އަދި ސްކައުޓުގައި އުޅޭ ދަރިވަރުންނަށް ތަފާތު އެކި ހުނަރުތަކާއި ދިރިއުޅުމުގައި ކުރިއަށް ދާނެ ތަފާތު ދާއިރާތަކާ ގުޅޭ ހަރަކާތްތައް ހިންގުމަށްޓަކައި ކުރިއަށް ގެންދާ އެ ރެލީ ކުރިއަށް ގެންދިޔައީ މިއަދު ހެނދުނު 9:00 އިން އިރުއޮއްސި 6:00 އަށެވެ.
އެ ރެލީގެ ތެރެއިން ސްކައިޓުގެ އެންމެ ހަގު ބޮޑީ ކަމުގައިވާ ޕްރީ ކަބުގެ "ފަންޑޭ" ވެސް ވަނީ ކުރިއަށް ގެންގޮސްފަ އެވެ.
މިއަދު ކުރިއަށް ގެންދިޔަ ކަބް ރެލީގެ ތެރެއިން -- ފޮޓޯ: މޯލްޑިވްސް ސްކައުޓް އެސޯސިއޭޝަން
މާލޭގެ ސްކޫލުތަކާއި ކ.، ވ. އަދި ބ. އަތޮޅުން ޖުމްލަ 26 ސްކޫލަކުން 1400 ކުދިން ކަބް ރެލީގައި ބައިވެރިވެފައިވެ އެވެ.
މޯލްޑިވްސް ސްކައުޓް އެސޯސިއޭޝަންގެ ޗީފް ކޮމިޝަނަރު، މައީދު މުހައްމަދު ޒާހިރު މި ނޫހަށް ވިދާޅުވީ އެ ހަރަކާތުގެ ތެރެއިން ސްކައުޓުގައި ހިންގާ ތަފާތު ހަރަކާތްތަކާއި ރިވެތި އަހުލާގަށް އެކުދިންގެ ގައިގައި އަށަގެންނެވުމުގެ ހަރަކާތްތަކާއި ދިރިއުޅުމުގައި ކުރިއަށް ދާން ކޮންމެހެން ބޭނުންވާ ތަފާތު އެކި ހުނަރުތައް މިއަދުގެ އިވެންޓުން ކުދިންނަށް ދަސްކޮށްދެވިފައި ވާނެ ކަމަށެވެ.
މިއަދު ކުރިއަށް ގެންދިޔަ ކަބް ރެލީގެ ތެރެއިން -- ފޮޓޯ: މޯލްޑިވްސް ސްކައުޓް އެސޯސިއޭޝަން
މި އަހަރުގެ ކަބް ރެލީ ކުރިއަށް ގެންގޮސްފައި ވަނީ އެޗްޑީސީއާ ގުޅިގެންނެވެ.
ސްކައުޓު އެސޯސިއޭޝަނުން ބުނީ މި ހަރަކާތް ކުރިއަށް އޮތް ތަނުގައި ކޮންމެ އަހަރަކު ވެސް ކުރިއަށް ގެންދިއުމަށް ރާވާފައިވާ ކަމަށެވެ.
