މިއަހަރުގެ ފުރަތަމަ ދުވަހުން ފެށިގެން ވެހިކަލްތަކުގެ ފީީ ބަލައިގަތުމަކީ އެ ވެހިކަލެއް ރަޖިސްޓްރީ ވެފައިވާ ކައުންސިލެއްގެ މަސްއޫލިއްޔަތެއް ކަމަށް ކަނޑައަޅާފައިވީ ނަމަވެސް އަދި ފީ ބަލައިގަންނަނީ ޖުމްލަ 19 ރަށެއްގެ ކައުންސިލަކުން ކަމަށް ޓްރާންސްޕޯޓް މިނިސްޓްރީން ބުނެފި އެވެ.
ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްގަނީ "އަދަދު" އަށް ވިދާޅުވީ، އެ ހިދުމަތް ގިނަ ކައުންސިލްތަކަށް އަދި ނުފެށެނީ ޕަބްލިކް އެކައުންޓުގެ މަރުހަލާ ޕްރޮސެސިންގައި ވާތީ ކަމަަށެވެ. މިހާރު ފީ ބަަލައިގަނެވޭނެ ގޮތަށް މުޅިން ތައްޔާރުވެފައި ވަނީ ޖުމްލަ 19 ކައުންސިލެއް އޭނާ ކަމަށް ފާހަގަކުރެއްވި އެވެ.
"ވާގޮތަކީ އެބޭފުޅުން ޕަބްލިކް އެކައުންޓު ހުޅުވުމުގެ ކަންތަކުގައި ޕްރޮސެސިން ދިގުލައިގެން ދަނީ. އެހެންމަ އެކަމުގަ އެ ލަސްވަނީ،" ހަމަދު ވިދާޅުވި އެވެ.
މިހާރު ފީ ބަލައިގަނެވޭނެ 19 ކައުންސިލަކީ:
- އައްޑޫ ސިޓީ ކައުންސިލް
- ބ. ދަރަވަންދޫ ކައުންސިލް
- ބ. ގޮއިދޫ ކައުންސިލް
- ފުވައްމުލަކު ސިޓީ ކައުންސިލް
- ގއ. ދާންދޫ ކައުންސިލް
- ހއ. މާރަންދޫ ކައުންސިލް
- ކުޅުދުއްފުށީ ސިޓީ ކައުންސިލް
- ލ. ފޮނަދޫ ކައުންސިލް
- ޅ. ނައިފަރު ކައުންސިލް
- މާލެ ސިޓީ ކައުންސިލް
- ނ. ކެނދިކުޅުދޫ ކައުންސިލް
- ނ. މަނަދޫ ކަައުންސިލް
- ނ. ވެލިދޫ ކައުންސިލް
- ރ. މީދޫ ކައުންސިލް
- ށ. ކޮމަންޑޫ ކައުންސިލް
- ށ. ޅައިމަގު ކައުންސިލް
- ށ. މިލަންދޫ ކައުންސިލް
- ށ. ނޫމަރާ ކައުންސިލް
- ތ. ދިޔަމިގިލީ ކައުންސިލް
ފިނޭންސް މިނިސްޓްރީގެ އޮފިޝަލަކު "އަދަދު" އަށް ވިދާޅުވީ ޕަބްލިކް އެކައުންޓުތަކުގެ އިދާރީ މަރުހަލާގެ މަސައްކަތްތައް މިހާރު އެއްކޮށް ނިމިފައިވާ ކަމަށާއި މިހާތަނަށް ގާތްގަނޑަކަށް 95 ކައުންސިލަކުން އެ ހިދުމަތް ފެށުމަށް އެދި ލިޔެކިއުންތަކާއެކު ބޭންކަށް ހުށަހަޅަން ޖެހޭ ރިޒޮލިއުޝަން ވެސް ހުށަހަޅާފައިވާ ކަމަށެވެ.
ރިޒޮލިއުޝަން ހުށަހަޅާ މަރުހަލާ ދިގުލައިގެން ދަނީ ބައެއް ފަހަރު ކައުންސިލްތަކުން ކުރަން ޖެހޭ ބައެއް ކަންކަން ވެސް އެ މިނިސްްޓްރީއިން ހަމަޖައްސައިދެމުން ދާތީ ކަމަށް އޭނާ ވިދާޅުވި އެވެ. އަދި ލަސްވި ނަމަވެސް ވަރަށް އަވަހަށް މި މަސައްކަތްތައް ނިންމާ ފީ ބަލައިގަތުން ފަށާނެ ކަމަށް ވެސް އޭނާ ވިދާޅުވި އެވެ.
"ކައުންސިލުން އަންނަ ރިޒޮލިއުޝަން ބޭންކަށް ހުށަހަޅާނީ. ދެން ބޭންކާއި، ފިނޭންސް މިނިސްޓްރީގެ ބައެއް މަރުހަލާތަކަށް ފަހު އެކަން ހަމަޖެހިގެން އަންނާނީ. އަޅުގަނޑަށް މައުލޫމާތު ލިބިފައިވާ ގޮތުން 95 ވަރަކަށް ކައުންސިލުން އެ ރިޒޮލިއުޝަން ހުށަހަޅާފައި ވަނީ މިހާތަނަށް،" އޭނާ ވިދާޅުވިއެވެ.
އޭނާ އިތުރަށް ބުނީ ބާކީ ހުރި ކަންކަން ވަރަށް އަވަހަށް ނިމި އެ ކައުންސިލްތަކުން ފީ ބަލައިގަނެވޭނެ އިންތިޒާމް ދާދި އަވަހަށް ހަމަޖެހިގެން ދާނެ ކަމަށެވެ.
އެއްގަމު އުޅަނދު ފީ އާއި، ކަނޑުގައި ދުއްވާ އުޅަނދުގެ ފީ އާއި، ޓްރެފިކް އަދި ޕާކިން ވަޔަލޭޝަން ޖޫރިމަނާ ފީތައް މީގެ ކުރިން ބަލައިގަންނަމުން ދިޔައީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ނަމަވެސް އެ ގަވާއިދަށް ބަދަލު ގެނެސް ފީ ބަލައިގަތުމަކީ ވެހިކަލް ރަޖިސްޓްރީވެފައިވާ ކައުންސިލެއްގެ ބެލުމުގެ ދަށުން ކުރިއަށްދާ ކަމެއް ކަމަށް ނިންމީ މިދިޔަ އަަހަރުގެ ފަހު ކޮޅެވެ.
މިދިޔަ ޑިސެމްބަރު 31، ވަނަ ދުވަހުގެ ކުރިން ފީ ބަލައިގަނެވޭނެ އިންތިޒާމުތައް ކައުންސިލުތަކުން ހަމަޖެއްސުމަށް އެދި ފިނޭންސް މިނިސްޓްރީއިން ސާކިއުލާއެއް ވެސް ކައުންސިލްތަކަށް ފޮނުވި އެވެ. އެ ސާކިއުލާގައި ވާގޮތުން ފީ ބަލައިގަންނާނީ ޓްރާންސްޕޯޓް މިނިސްޓްރީގެ "ސަވާރީ ޕޭ"، ޔޫއާރުއެލް (pay.transport.gov.mv ) މެދުވެރިކޮށެވެ.
އެ ބަދަލަށް ފަހު އެއްގަމު އުޅަނދުތަކާއި ކަނޑު އުޅަނދުތަކުގެ އަހަރީ ފީއިން ލިބޭ އާމްދަނީ ލިބޭނީ ކައުންސިލްތަކަށެވެ. ކައުންސިލްތަކުން ދެމުން ގެންދާ އެކި ހިދުމަތްތަކުގެ ފީގެ ގޮތުގައި ލިބޭ ފައިސާ އާއި ކައުންސިލްތަކުގެ އިހްތިސާސްގައިވާ ރަށްރަށް ކުއްޔަށްދީގެން ލިބޭ އާމްދަނީ ވެސް ލާމަރުކަޒީ ގާނޫނުގެ ތެރެއިން ލިބެނީ ކައުންސިލްތަކަށެވެ.
