ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) ގެ ވެހިކަލަކުން ގިނަ އަދަދެއްގެ ބަނގުރާ ފުޅިތަކެއް އަތުލައިގަތް މައްސަލައިގައި އިހުމާލުވާ ޑްރައިވަރު ޑީޕޯޓުކޮށްލާފައިވާ ކަމަށް އެ ކުންފުނިން މިއަދު ބުނެފި އެވެ.
އާރުސީސީގެ ވޭނެއް ފުލުހުން ބަލައިފާސްކުރާ މަންޒަރާއި، އެ ވެހިކަލްގެ ތެރެއިން ބަނގުރާ ފުޅިތަކެއް ނަގައިގެން ބަލަމުންދާ މަންޒަރު ހުރި ވީޑިއޯތަކެއް ސޯޝަލް މީޑިއާގައި މި މަހުގެ 11 ވަނަ ދުވަހު ވަނީ ދައުރުވެފަ އެވެ.
އެކަމާ ގުޅިގެން ފުލުހުން އެ ދުވަހު ބުނީ ހުޅުމާލޭގައި ދުއްވާފައި ދިޔަ ވޭނަކާ މެދު ޝައްކު ކުރެވިގެން ބެލިއިރު ބަނގުރާ ފުޅިތަކަކާއި ދަޅުތަކެއް ފެނިފައިވާ ކަމަށެވެ. އެކަމާ ގުޅިގެން ވޭން ދުއްވަން އިން މީހާ ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
އާރްސީސީން މިއަދު ބުނީ ރާއްޖޭގައި ހެދިފައިވާ ގާނޫނުތަކާ ހިލާފު އެއްވެސް ކަމެއްް އެ ކުންފުނިން ނުކުރާނެ ކަމަށާއި ހިތްވަރު ވެސް ނުދޭނެ ކަމަށެވެ.
އެ މައްސަލަ ފުލުހުން ތަހުގީގު ކުރުމަށްފަހު މައްސަލައިގައި އިހުމާލުވާ ޑްރައިވަރު މިއަދު ވަނީ ރާއްޖެ ނާދެވޭ ގޮތަށް ޑީޕޯޓް ކޮށްލެވިފައިވާ ކަމަށް ބުނެފައިވެ އެވެ.
އާރުސީސީއަކީ، އެމްއެންޕީގެ ރިޔާސީ ކެންޑިޑޭޓް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް (ކާނަލް ނާޒިމް) ގެ މަސްލަހަތު އޮންނަ ކުންފުންޏެކެވެ.
