މި އަހަރު ބާއްވާ ރިޔާސީ އިންތިހާބު ދެވަނަ ބުރަކަށް ގޮސްފި ނަމަ އިންތިހާބު ބޭއްވުމަށް މިހާރު ބަޖެޓުކޮށްފައިވާ އަދަދުގެ އިތުރަށް 30 މިލިއަން ރުފިޔާ ބޭނުންވާ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
އިންތިހާބާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި އީސީގެ ރައީސް ފުއާދު ތައުފީގު ވިދާޅުވީ ދެވަނަ ބުރަކަށްދާ ހާލަތެއްގައި މިހާރު އޮތް ބަޖެޓުން އިންތިހާބު ކުރިއަށް ގެންދިއުމަށް ދަތިތަކެއް ކުރިމަތިވާނެ ކަމަށެވެ.
އިތުރަށް ބޭނުންވާކަމަށް އަންދާޒާ ކުރެވޭ އަދަދާ މެދު ސުވާލު ކުރުމުން ފުއާދު ވިދާޅުވީ ލަފާކުރެވޭ ގޮތުގައި އިތުރަށް 30 މިލިއަން ރުފިޔާ ބޭނުންވާނެ ކަމަށެވެ.
"އަޅުގަނޑުމެން (އިންތިހާބަށް) އަންދާޒާކުރީ 120 މިލިއަން ރުފިޔާ، އަޅުގަނޑުމެންނަށް ލިބުނީ 90 މިލިއަން، އަޅުގަނޑުމެން ލަފާކޮށްފަ އޮތް ގޮތަށް ހަރަދުތައް ދާނަމަ އިތުރަށް 30 މިލިއަން ބޭނުންވާނެ،" ފުއާދު ވިދާޅުވި އެވެ.
ނަމަވެސް ފުއާދު އިތުރަށް ވިދާޅުވީ އިންތިހާބަށް ތައްޔާރުވަމުން އަންނައިރު ހަރަދު ކުޑަކުރެވޭނެ ގޮތްގޮތް ފެންނަމުންދާ ކަމަށެވެ. އެގޮތުން ދައުލަތުގެ ވަސީލަތްތައް އިންތިހާބުގެ ކަންކަމުގައި ބޭނުންކުރެވޭ މިންވަރު އިތުރު ކުރެވޭ ނަމަ ހަރަދު ކުޑަ ކުރެވޭނެ ކަމަށް ވިދާޅުވި އެވެ.
މި ހަރަދުތައް ކުޑަކުރަން ކުރެވޭ މަސައްކަތުން ގާތްގަނޑަކަށް 10 މިލިއަން ރުފިޔާ ކުޑަކުރެވިގެން ހިނގައިދާނެ ކަމަށް ފުއާދު ވިދާޅުވި އެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އީސީއިން މިއަދު އިއުލާނުކުރި ތާރީހަކީ ސެޕްޓެމްބަރު މަހުގެ ނުވަ ވަނަ ދުވަހެވެ. ދެވަނަ ބުރަކަށް ގޮސްފި ނަމަ ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ އެ މަހުގެ 30 ވަނަ ދުވަހެވެ.
އިންތިހާބުގައި ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވަނީ ޖުލައި 23 އިން އޮގަސްޓު މަހުގެ ތިންވަނަ ދުވަހުގެ ނިޔަލަށެވެ.
