ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަންކުރުމަށް ގޮވާލައި ޕީއެންސީ/ޕީޕީއެމް ހިމެނޭ އިދިކޮޅު ކޯލިޝަނުން ކުރިއަށް ގެންދާ ސިލްސިލާ މުޒާހަރާތަކަށް ފުލުހުން ހުރަސް އަޅައި މީހުން ހައްޔަރުކުރަމުންދާތީ ޓްރާންސްޕޭރެންސީ މޯލްޑިވްސް އާއި ބޭރުގެ ޖަމިއްޔާތަކަކުން އެކަން ކުށްވެރިކޮށްފި އެވެ.
އެމްނެސްޓީ އިންޓަނޭޝަނަލް އާއި، އެސޯސިއޭޝަން ފޯ ޑިމަކްރަސީ އިން ދަ މޯލްޑިވްސް އަދި ހިއުމަން ރައިޓްސް ވޮޗް ގުޅިގެން ނެރުނު ބަަޔާނެއްގައި ބުނެފައި ވަނީ، ޔާމީން މިނިވަންކުރުމަށް ގޮވާލައި ބާއްވާ މުޒާހަރާގެ ތެރެއިން މީހުން ހައްޔަރުކުރުމާއި، އެ މުޒާހަރާ ކަވަރުކުރާ ނޫސްވެރިން ހައްޔަރުކުރަމުން ދިއުމަކީ ގަބޫލުކުރެވޭ އަމަލުތަކެއް ނޫން ކަމަށެވެ.
ސުލްހަވެރި އެއްވުންތަކަށް ޖާގަ ދިނުމާއި ނޫސްވެރިކަމުގެ މިނިވަންކަން ދިނުމަކީ އިންސާނީ ހައްގުތައް ހިމާޔަތްކުރުމަށް މުހިންމު ކަންކަން ކަމަށް އެ ބަޔާނުގައި ވަނީ ބުނެފަ އެވެ. މުޒާހަރާތަކަށް ހުރަސް އެޅުމާއި މުޒާހަރާގެ ބައިވެރިން އަދި ނޫސްވެރިން ހައްޔަރުކުރަމުން ދިއުމަކީ ދިވެހި ގާނޫނު އަސާާސީ އާއި ޔުނިވާސަލް ޑެކްލަރޭޝަން އޮފް ހިއުމަން ރައިޓްސް އާއި ރާއްޖެ އިން ސޮއި ކޮށްފައިވާ ބައިނަލްއަގުވާމީ މަދަނީ އަދި ސިޔާސީ ހައްގުތަކުގެ މުއާހަދާތަކާ ހިލާފު ކަމެއް ކަމަށް ފާހަގަކޮށްފައި ވެއެވެ.
އެ ޖަމިއްޔާތަކުން ގޮވާލާފައިވާ ކަންކަމުގެ ތެރޭގައި އެއްވެސް ތަފާތުކުރުމެއް ނެތި ކޮންމެ ރައްޔިތަކަށްވެސް މުޒާހަރާތަކުގައި ބައިވެރިވުމުގެ ފުރުސަތު ދިނުމަށް ހިމަނާފައި ވެއެވެ.
އދ.ގެ ހިއުމަން ރައިޓްސް ކައުންސިލާއެކު ރާއްޖެއިން ސޮއިކޮށްފައި އޮންނަހާ ދުވަހަކު މިފަދަ ހައްގުތަކަށް ހުރަސް އެޅިގެން ނުވާނެ ކަމަށާއި، މި މައްސަލަ ކަމާ ގުޅުންހުރި އިދާރާތަކުން ބަލައި ހައްގުތަކަށް ހުރަސްއަޅާ އިދާރާތަކާ މެދު ފިޔަވަޅު އެޅުމަށް ވެސް އެ ބަޔާނުގައި ވަނީ ގޮވާލައިފަ އެވެ.
