ބަންގްލަދޭޝްއަށް ނިސްބަތްތާ އެމްޑީ އަލަމްގީރު އާއެކު އެއްޖިންސުން ގުޅުންހިންގިކަން ސާބިތުވެ ގާނޫނީ ވަކީލު ރައްޔިތުން މަޖިލީހުގެ ރައީސް މުހައްމަދު ނަޝީދުގެ ކޮށްކޮ ނާޒިމް ސައްތާރުގެ މައްޗަށްކުރި ހުކުމް ތަންފީޒުކޮށް ނިމުމަށްފަހު މިނިވަންވެއްޖެ އެވެ.
ނާޒިމްގެ ކުށަށް އިއުތިރާފުވެ ދެން އެފަދަ ކުށެއް ނުކުރާނެ ކަމަށް ކުށަށް ތައުބާވެފައިވާތީ އަދަބު ލުއިކޮށް އެއް މަހާއި 28 ދުވަހުގެ ޖަލު ހުކުމަކަށް ކަނޑައެޅި އެވެ.
ޖަލު ހުކުމް ގޭބަންދަށް ބަދަލުކޮށްދިނުމަށް ނާޒިމް އެދުމުން އެ ކަމަށް ރިއާޔަތްކޮށް ތިން މަހާއި 26 ދުވަހަށް ގޭގައި ބަންދުކުރަން އޭނާގެ މައްޗަށް ހުކުމްކުރީ މިދިޔަ އަހަރު ސެޕްޓޭމްބަރު މަހުގެ ތެރޭގަ އެވެ.
ނާޒިމްގެ މައްޗަށް އެ ދައުވާ އުފުލީ އަލަމްގީރާއެކު އެއްޖިންސުން ގުޅުންހިންގާ ވީޑިއޯއެއް ލީކުވުމާ އެކު އެވެ.
މި މައްސަލައިގައި އަލަމްގީރު ވެސް ވަނީ ހައްޔަރުކޮށްފަ އެވެ. އެގޮތުން އޭނާގެ މައްޗަށް އެއް ޖިންސުން ގުޅުން ހިންގުމުގެ ތިން ދައުވާއަކާއި އޮރިޔާންކާޑު ހެދުމުގެ 40 ދައުވާއެއް އުފުލާ ޖުމްލަ ހަތަރު އަހަރާއި ހަ މަހަށް ޖަލަށް ލުމަށް ހުކުމް ކުރި އެވެ.
