ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އެމްޑީޕީގެ ރިޔާސީ ޕްރައިމަރީ ކާމިޔާބުވެއްޖެނަމަ، ރިޔާސީ އިންތިހާބަށް ނުކުންނަވާނީ ރަނިން މޭޓެއްގެ ގޮތުގައި އައްޑޫ ބޭފުޅަކާ އެކު ކަމަށް އެމަނިކުފާނު ހާމަކުރެއްވީ އިއްޔެ އެވެ.
ރިޔާސީ ޕްރައިމަރީގެ ކެމްޕޭންގައި މެދު ރާއްޖޭގެ ހަތަރު އަތޮޅަކަށް ކުރެއްވި ދަތުރުފުޅު ނިންމަވާލެއްވުމަށް ފަހު، އިއްޔެ މާލޭގައި ބޭއްވި ޕްރެސް ކޮންފެރެންސްގައި، ނޫސްވެރިޔަކު ކުރި ސުވާލެއްގެ ޖަވާބުގައި ނަޝީދު ވިދާޅުވީ ރަނިން މޭޓަކަށް ކަނޑައަޅާނީ އައްޑޫގެ ޒުވާން ބޭފުޅެއް ކަމަށެވެ.
"އަޅުގަނޑުގެ އުމުރުން ވެސް މިހާރު ކުޑަކޮށް އެބަ ދޮށީވޭ. އަޅުގަނޑު ދެކެނީ ސިޔާސީ މަސައްކަތުގައި ޒުވާނުންގެ ހިއްސާ މިހާރަށް ވުރެ ބޮޑު ވާން ޖެހޭ ކަމަށް," ރައީސް ނަޝީދު ވިދާޅުވި އެވެ.
މީގެ ކުރިން 2013 ވަނަ އަހަރުގެ ރިޔާސީ އިންތިހާބުގައި ވާދަކުރެއްވިއިރު ވެސް، ނަޝީދުގެ ރަނިން މޭޓަކަށް ހުންނެވި ކުރީގެ އެޑިއުކޭޝަން މިނިސްޓަރު ޑރ. މުސްތަފާ ލުތުފީއަކީ އައްޑޫ ބޭފުޅެކެވެ. އެ ފަހަރު ވެސް ރަނިން މޭޓް އިއުލާން ކުރެއްވުމުގެ ކުރިން، ރަނިން މޭޓަކަށް ވާނީ އައްޑޫ ބޭފުޅެއް ކަން ހާމަކުރެއްވި އެވެ.
އައްޑޫ ސިޓީއަކީ އެމްޑީޕީގެ ތާއީދު ބޮޑު ސަރަހައްދެކެވެ. ކޮންމެ އިންތިހާބެއްގައި ވެސް އައްޑޫގެ ބޮޑު މެޖޯރިޓީއެއް އެމްޑީޕީއަށް ލިބެ އެވެ. އައްޑޫ ސިޓީއަކީ މާލެ ނެގުމަށް ފަހު، ރާއްޖޭގެ އެންމެ ބޮޑު އާބާދީ އޮތް ސަރަހައްދެވެ.
އައްޑޫ އަތޮޅުގެ މަޖިލިސް ހުރިހާ ގޮނޑިއެއް ވެސް ތަމްސީލު ކުރައްވަނީ އެމްޑީޕީއަށް ނިސްބަތްވާ މެމްބަރުންނެވެ. އެ ހަތް މެމްބަރުންގެ ތެރެއިން މި ޕްރައިމަރީގައި ނަޝީދަށް ތާއިދު ކުރައްވާކަން ހާމަކުރައްވާފައި ވަނީ ދެ މެމްބަރުންނެވެ. އެއީ، ހުޅުދޫ ދާއިރާގެ މެމްބަރު އިލްޔާސް ލަބީބް އަދި ހިތަދޫ މެދު ދާއިރާގެ މެމްބަރު އަހްމަދު ރަޝީދެވެ.
ބައެއް މުހިންމު ހަބަރުތައް
- ބަދަލު ހިފުމުގެ ގޮތުން އައްޑޫގައި ޓެރަރިސްޓު ހަމަލާއެއް ދޭނެ ކަމުގެ އިންޒާރު ދިން މައްސަލައެއް ދިވެހި ފުލުހުން ތަހުގީގު ކުރަން ފަށާފައިވާކަން ހާމަކުރީ އިއްޔެ އެވެ.
- ގދ. ފިޔޯރީ ސްކޫލުގައި މިހާރު ވެސް ކިޔަވައިދިނުމަށް ބޭނުންކުރަމުންދިޔަ އިމާރާތެއްގައި އަލިފާނުގެ ހާދިސާއެއް ހިނގައި ބޮޑެތި ގެއްލުންތަކެއް ލިބުނީ އިއްޔެ އެވެ.
- ނ. އަތޮޅުގެ ބައެއް ރަށްތައް ދިގު މުއްދަތަކަށް ޓޫރިޒަމަށް ދޫކުރަން ސަރުކާރުން ކުރާ މަސައްކަތް ހުއްޓުވައިދިނުމަށް އެދި އެ އަތޮޅު ކައުންސިލުން ސިވިލް ކޯޓަށް މައްސަލައެއް ހުށަހެޅީ އިއްޔެ އެވެ.
ދުވަހުގެ ކޯޓޭޝަން
މިއަހަރުގެ ސެޕްޓެމްބަރު މަހުގެ ތެރޭގައި ބޭއްވުމަށް ނިންމާފައިވާ ރިޔާސީ އިންތިހާބުގެ ކެމްޕޭނާ ދިމާކޮށް ދައުލަތުގެ ވަސީލަތްތައް ބޭނުންކުރުން ހުއްޓާލުމަށް ގޮވާލައި ޓްރާންސްޕޭރެންސީ މޯލްޑިވްސްއިން އިއްޔެ ނެރުނު ބަޔާނެއްގައި ބުނީ:
ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރުމަކީ އިންތިހާބުގެ ނަޒާހަތްތެރިކަން ގެއްލި، ވޯޓުލާ ފަރާތްތަކަށް ނުފޫޒުން އެއްކިބާވެ، މިނިވަންކަމާ އެކު ކެންޑިޑޭޓެއް ހިޔާރުކުރުމުގެ ހައްގަށް ބުރޫ އަރާ ކަމެއް،
ދުވަހުގެ ފޮޓޯ
އިއްޔެ ހަވީރު ގދ. ފިޔޯރީ ސްކޫލުގެ އިމާރާތުގައި ހިނގި އަލިފާނުގެ ހާދިސާ. އެ އިމާރާތަކީ ސްކޫލްގެ ސެން ކްލާހާއި، އާންމުކޮށް ކިޔަވައިދޭ ތިން ކްލާސްރޫމުގެ އިތުރުން ސްކޫލުގެ ގުދަންވެސް ހުރި އިމާރާތް. އަލިފާނުގެ ހާދިސާގައި އިމާރާތް ވަނީ އެއްކޮށް އަނދާ ހުލިވެފައި --- ފޮޓޯ: އަހްމަދު އާސިފް
