ނިމިގެން ދިޔަ ޑިސެމްބަރު މަހުގެ 31 ވަނަ ދުވަހެވެ. ވިލިމާލެއިން ތެޔޮ ބޯޓެއްގައި ފުރައިގެން ދަތުރުކުރަމުން ދިޔަ ދެ މީހަކު ގެއްލިގެން ފުލުހުން އިއުލާންކުރި އެވެ. ބަންގްލަދޭޝްގެ މޮހަންމަދު ލިޓޮން އަދި ގދ. ތިނަދޫ މަނާރު، މުހައްމަދު ނިޒާމު އެވެ.
"ހެދޭކުރި" ނަމަކަށް ކިޔާ އެ ތެޔޮ ބޯޓު ހުޅުލޭ ނެރާ ދިމާއިން އޮޔާ ދަނިކޮށް ފެނިފައި ވަނީ ޑިސެމްބަރު 29 ވަނަ ދުވަހު އެވެ. ބަންޑުން ޖަހާނުލައި ތެދަށް އޮތް ބޯޓު އޮޔާ ދަނިކޮށް ފެނުނުއިރު އޭގެން ދަތުރުކުރި ނިޒާމު އާއި ލިޓޮން އުޅަނދުގައި ނެތެވެ. އެހެންވެ، އެ ދެ މީހުން ގެއްލިގެން ހޯދަން އިއުލާނު ކުރުމާ އެކު އެންމެންނަށް ވެސް ހީވީ ކަނޑުމަތީގައި ހާދިސާއެއް ހިނގީ ކަމަށެވެ. ނަމަވެސް، ބަންޑުން ޖަހާނުލައި، މާލެ ކައިރިން ބޯޓު ފެނުމާ އެކު އުފެދުނު ސުވާލުތައް ގިނަ އެވެ.
ގެއްލިގެން އެ ދެ މީހުން ހޯދަމުން ދިޔައިރު، ނިޒާމު އުޅެމުންދިޔައީ މާލެތެރޭގަ އެވެ. އޭނާއާ އެކު ބައެއް މީހުން ސޯޝަލް މީޑިއާއަށް ފޮޓޯ ދޫކޮށްލި އެވެ. އެއަށް ފަހުން އޭނާ ހައްޔަރުކުރީ މާލޭގެ ގެސްޓް ހައުސްއެއްގައި އުޅެނިކޮށް، މި މަހު ތިން ވަނަ ދުވަހު އެވެ.
އުމުރުން 45 އަހަރުގެ ނިޒާމު ހައްޔަރުކުރީ މަރުގެ މައްސަލައެއްގެ ތުހުމަތުގައި ކަމަށް ފުލުހުން ބުނި ނަމަވެސް، ތުހުމަތު އެ ކުރަނީ ކޮން މަރަކާ ގުޅިގެން ކަމެއް ހާމައެއް ނުކުރެ އެވެ. ނިޒާމާ އެކު ދަތުރުކުރި ލިޓޮން ފެނިފައި ނުވާއިރު، ވީގޮތެއް ފުލުހުން ހާމަކޮށްފައި ނެތެވެ. އެހެންވެ، ނިޒާމަށް އެ ކުރަނީ ލިޓޮންގެ މަރާ ގުޅޭ ތުހުމަތު ކަމަށް ބެލުމުގެ ފުރުސަތު އެބަ އޮތެވެ.
ނިޒާމާ ގުޅޭ ގޮތުން މައުލޫމާތު ހޯދުމަށް "އަދަދު" ނޫހުން ކުރި މަސައްކަތުން އޭނާއަކީ ކުށުގެ ރެކޯޑު އޮތް މީހެއްކަން ކަށަވަރުވެ އެވެ. ނަމަވެސް, އެ ކުށްތަކުގެ ތެރޭގައި މާރާމާރީއެއް، މީހަަކަށް އަނިޔާއެއް، ނޫނީ ގޯނާއެއް ދީގެން ހައްޔަރުކޮށްފައެއް ނުވެ އެވެ.
އަދަދަށް ލިބިފައިވާ ލިޔުންތަކުން އެނގޭ ގޮތުގައި، ޖެނުއަރީ 2008 އިން ފެށިގެން މެއި 2022 އާ ދެމެދު އެކި ފަހަރު މަތިން އޭނާ ހައްޔަރުކޮށްފައިވެ އެވެ. އެއީ މުޅިން ވެސް މަސްތުވާތަކެތި ބޭނުންކުރުމާއި، ވައްކަމުގެ މައްސަލަތަކުގަ އެވެ. އެންމެ ފަހުން އޭނާ ހައްޔަރުކުރީ މަރުގެ މައްސަލައިގަ އެވެ.
ނިޒާމުގެ ކުށުގެ ރެކޯޑް
- 11 ޖެނުއަރީ 2008: މަސްތުވާތަކެތި ބޭނުންކުރުން
- 7 ފެބްރުއަރީ 2008: މަސްތުވާތަކެތި ބޭނުންކުރުން
- 4 އޭޕްރީލް 2008: މަސްތުވާތަކެތި ބޭނުންކުރުން
- 17 ސެޕްޓެމްބަރު 2014: ތިނަދޫ ފިހާރައަކުން މޯބައިލް ފޯނެއް ވަގަށް ނެގުން
- 11 ނޮވެމްބަރު 2014: މަސްތުވާތަކެތި ބޭނުންކުރުން
- 3 މެއި 2015: މަސްތުވާތަކެތި ބޭނުންކުރުން
- 5 ފެބްރުއަރީ 2020: އެހެން މީހަކާ ގުޅިގެން ސައިކަލެއް ވަގަށް ނަގައި، އެ ސައިކަލު ގެންގުޅުން
- 3 ސެޕްޓެމްބަރު 2020: ތިނަދޫ ގެއަކުން ގޭސްފުޅިއެއް ވަގަށް ނެގުން
- 21 މެއި 2021: ސިޓީ ބޭކަރީ ކައިރީ ހުރި ސައިކަލެއްގައި އަޅުވާފައިވާ ތަކެތި ވަގަށް ނަގަން އުޅުން
- 27 މެއި 2022: ހއ. މާފަހީގެ ސަޕްލައި ބޯޓުން ވައްކަންކުރުން
- 3 ޖެނުއަރީ 2023: މަރުގެ މައްސަލައެއް
ނިޒާމުގެ މައްޗަށް މަރެއްގެ ތުހުމަތުކޮށް ހައްޔަރުކޮށްފައިވާއިރު މައްސަލައިގެ ތަހުގީގަށް އޭނާ 60 ދުވަހު ބަންދުގައި ބެހެއްޓުމަށް ކޯޓުން ވަނީ އަމުރު ނެރެފަ އެވެ.
