ގެއްލިގެން ހޯދަމުން ދަނިކޮށް ފެނުނު ގދ. ތިނަދޫ، މަނާރު، މުހައްމަދު ނިޒާމް، 45، ގެ މައްޗަށް ތުހުމަތުކުރާ މަރުގެ މައްސަލައިގައި 60 ދުވަހުގެ މުއްދަތަކަށް ބަންދުކުރުމަށް ކްރިމިނަލް ކޯޓުން މިއަދު އަމުރުކޮށްފި އެވެ.
ނިޒާމުގެ މައްޗަށް ތުހުމަތު ކުރަނީ ކޮން މަރަކާ ގުޅިގެން ކަމެއް ފުލުހުން ހާމަ ނުކުރި ނަމަވެސް އޭނާއާއެކު ތެޔޮ ބޯޓުގައި ދަތުރުކުރި ބަންގްލަދޭޝްގެ މޮހަންމަދު ލިޓޮން އަދިވެސް ނުފެނެ އެވެ.
އެ ދެ މީހުން ހޯދަން ފުލުހުން އިއުލާނުކުރީ ނިމިގެން ދިޔަ ޑިސެމްބަރު މަހުގެ 31 ގަ އެވެ.
ނިޒާމު އާއި ލިޓޮން ދަތުރުކުރި ފިއުލް ޕަވަ ކުންފުނީގެ "އަރާކުރި" ތެޔޮބޯޓު އޮޔާ ދަނިކޮށް ހުޅުމާލޭ ކައިރިން ޑިސެމްބަރު 29 ވަނަ ދުވަހު ފެނުނުއިރު ބޯޓުގައި އެއްވެސް މީހަކު ނެތެވެ.
އެއަށް ފަހު ނިޒާމު ހައްޔަރު ކުރީ އޭނާ ހޯދަމުން ދަނިކޮށް މާލޭން ފެނިގެން، އޭނާ ދިރިއުޅެމުން ދިޔަ ގެސްޓްހައުސްއިން އިއްޔެ އެވެ.
މި މައްސަލައިގެ ތަހުގީގުގެ ބޭނުމަަށް، ނިޒާމް ބަންދުގައި ބަހައްޓަން ކްރިމިނަލް ކޯޓަށް ހާޒިރުކުރުމުން، ބަންދުގެ މުއްދަތަކަށް 60 ދުވަސް ޖަހައިދިންކަން ފުލުހުން ޔަގީންކޮށްދެ އެވެ. ބަންދާ މެދު ގޮތެއް ނިންމުމަށް ބޭއްވި އަޑުއެހުން ކޯޓުގައި ކުރިއަށް ގެންދިޔައީ ފުލުހުން އެދިގެން ސިއްރުކޮށްގެނެވެ.
