އިދިކޮޅު ލީޑަރު ރައީސް އަބްދުﷲ ޔާމީން އަބްދުލްގައްޔޫމް މިނިވަންކުރުމަށް ގޮވާލާ ބާއްވަމުން އަންނަ މުޒާހަރާތައް ރޫޅާލުމަށް ފުލުހުން ބޭނުން ކުރަނީ އެކަށީގެންނުވާ މިންވަރުގެ ބާރު ކަމަށާއި އެއީ "ލާއިންސާނީ އަނިޔާ" ގެ ގޮތުގައި ދެކޭ ކަމަށް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ބުނެފި އެވެ.
މިއަދު ނެރުނު ނޫސްބަޔާނެއްގައި ޕީޕީއެމުން ބުނީ އިހުތިޖާތުތަކުގައި ފުލުހުން ހާލަތާ ނުބައްދަލު ބާރުގެ ބޭނުންކުރާ ކަމަށާއި އެކަން ހަރުކަށި އިބާރާތުން ކުއްވެރިކުރާ ކަމެއް ކަމަށް ބުނެފައިވެ އެވެ.
"ރައްޔިތުން މަގުތަކަށް އެއްވެ އަޑު އުފުލަނީ ގާނޫނުއަސާސީން ލިބިދީފައިވާ ހިޔާލު ފާޅުކުރުމުގެ ހައްގާާއި އެއްވެ އުޅުމުގެ ހައްގުގެ އިންތަކުގެ ތެރޭގަ. ނަމަވެސް އެއްވެ ތިބޭ މީހުންނާ ދިމާލަށް ފުލުހުންގެ ވެހިކަލް ބާރަށް ދުއްވާފަ ވަނުމާއި ފަހަތުން ދުވެ ގޮސް ސުލްހަވެރިކަމާއެކު މަޑުން ތިބޭ މީހުންގެ ގަޔަށް އަރައިގަނެ، އެއްވެސް ބެލުމެއް ނެތި އަނިޔާވެރިކަމާއެކު ހިފައިގަނެ އަނިޔާ ދެމުންދާކަން ފާހަގަ ކުރަން،" ޕީޕީއެމުން ބުންޏެވެ.
މުޒާހަރާގެ ބައިވެރިންނަށް ފުލުހުން އަނިޔާ ދެމުން ދާއިރު އެކަމާ ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން އެއްވެސް ފިޔަވަޅެއް ނާޅާ ކަމަށް ވެސް ޕީޕީއެމުން ވަނީ އެކަމުގެ ކަންބޮޑުވުން ވެސް ފާޅުކޮށްފަ އެވެ.
އޭގެ އިތުރުން، މުޒާހަރާއެއްގެ ތެރެއިން ހައްޔަރުކޮށް ބަންދު މުއްދަތު ޖަހާފައިވާ އެކޯލިޝަނުގެ މައްޗަންގޯޅި މެދު ދާއިރާގެ ރައީސް އިބްރާހީމް ޒަމީލް އާއި ހެންވޭރު ސްޓިއަރިން ކޮމިޓީގެ މެންބަރު އަބްދުﷲ އަދުލީ ދޫކޮށްލުމަށް ވެސް އިދިކޮޅުން ނެރުނު ބަޔާނުގައި ގޮވާލާފައިވެ އެވެ. އެ ދެމީހުންގެ ބަންދަށް 15 ދުވަސް ވަނީ ޖަހާފަ އެވެ.
އިދިކޮޅުން ސިލްސިލާކޮށް މުޒާހަރާ ކުރަން ފެށީ ޑިސެމްބަރު 25، ގައި ޔާމީން 11 އަހަރަށް ޖަލަށްލުމުންނެވެ. އެމަނިކުފާނުގެ މައްޗަށް މިފަހަރު ސާބިތުވީ ރިޝްވަތު ހިފުމާއި މަނީ ލޯންޑާ ކުރުމުގެ ކުށުވެ. މީގެ ކުރިން ވެސް މަނީ ލޯންޑާ ކުރުމުގެ ކުށް ސާބިތުވި އެވެ. ނަމަވެސް އެންމެ މަތީ ކޯޓުން ވަނީ އެ ހުކުމް ބާތިލްކޮށްފަ އެވެ.
