އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީންގެ މައްޗަށް ޖަލު ހުކުމެއް އިއްވިޔަސް، އެމަނިކުފާނަށް ވާދަނުކުރެވޭ ގޮތަށް ރިޔާސީ އިންތިހާބު ބާއްވަން ފުރުސަތު ނުދީ، ދޫދިނުމެއް ނެތި ދެމިތިބޭނެ ކަމުގެ ޔަގީންކަން ޕީއެންސީގެ ރައީސް އަބްދުލްރަހީމް އަބްދުﷲ ދެއްވައިފި އެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވީ، އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކޮށްގެން ރިޝްވަތުގެ ގޮތުގައި 1.1 މިލިއަން ޑޮލަރު ނެންގެވި ކަމަށް ބުނާ މައްސަލާގަ އެވެ.
ޔާމީންގެ ސަޕޯޓަރުން ގަބޫލުކުރަނީ އެއީ ކުރިއަށް އޮތް ރިޔާސީ އިންތިހާބުގައި އެމަނިކުފާނު ވާދަކުރުމަށް ހުރަސް އެޅުމުގެ ގޮތުން، ސަރުކާރުން އުފުލާފައިވާ "ސިޔާސީ" ދައުވާތަކެކެވެ. އެމަނިކުފާނުގެ މައްޗަށް އިއްވީ "ހަރާމް ހުކުމެއް" ކަމަށް ބުނެ އެތައް ސަތޭކަ މީހުން މިއަދު މަގުމައްޗަށް ވަނީ ނުކުމެފަ އެވެ.
"ދިވެހި ރައްޔިތުން ބޭނުން ވަނީ ރައީސް އިބްރާހީމް މުހައްމަދު ސޯލިހު ވެރިކަމުން ބާލާފައި، ރައީސް އަބްދުﷲ ޔާމީން ރާއްޖޭގެ ވެރިކަމަށް ގެންނަން،" މާލޭގައި އޮތް ހިނގާލުމުގައި ބައިވެރިވި ސަޕޯޓަރުންނާ މުހާތަބުކޮށް، ކޯލިޝަން ހިންގެވުމުގައި އިސްކޮށް މިހާރު ހުންނެވި އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ މިނިވަން ދައުލަތެއްގެ ގޮތުގައި، ވަކި އެއްވެސް ބޭރުގެ ނުފޫޒެއްގައި ނުޖެހި މި ރާއްޖޭގެ ވެރިކަން ކުރެވޭނެ ހަމައެކަނި ލީޑަރަކީ ޔާމީން ކަމަށެވެ. ޔާމީން ނޫނީ ސިޔާސީ ލީޑަރަކު ނެތް ކަމަށް ދިވެހިންގެ ގިނަ ބަޔަކު މިއަދު ގަބޫލުކުރާނެ ކަމަށް އޭނާ ވިދާޅުވި އެވެ.
އިދިކޮޅު ލީޑަރު އަދި ކުރީގެ ރައީސް ޔާމީން މިނިވަން ކުރަން ގޮވާލައި މިއަދު މާލޭގައި ކުރި މުޒާހަރާގެ ތެރެއިން އަބްދުއްރަހީމް ވާހަކަ ދައްކަވަނީ -ފޮޓޯ: އަބްދުﷲ އިޔާން/އަދަދު
"ރައީސް ޔާމީންގެ ނަން ނެތި މި ރާއްޖޭގައި ރިޔާސީ އިންތިހާބެއް ބޭއްވުމުގެ ފުރުސަތެއް ދެން ނުދޭނަމޭ، އެއީ ދިވެހި ރައްޔިތުންގެ ވިންދު ހުރި ގޮތް،" މިފެށޭ 2023 ވަނަ އަހަރު އޮންނަ ރިޔާސީ އިންތިހާބުގައި ޔާމީންގެ ނަން ކޮންމެހެން އޮންނަން ޖެހޭ ކަމަށް ގޮވާލައްވަމުން އަބްދުލްރަހީމް ވިދާޅުވި އެވެ.
ޕީޕީއެމް/ޕީއެންސީން ގަބޫލުކުރާ ގޮތުގައި، މިހާރު އޮތް ރައީސް އިބްރާހީމް މުހައްމަދު ސޯލިހްގެ ސަރުކާރުގެ މައްޗަށް އަވައްޓެރި އިންޑިއާގެ ނުފޫޒު ގަދަ އެވެ. އިންޑިއާގެ ހުއްދަ ނެތި، ދިވެހި ސަރުކާރުގެ އެއްވެސް ސިޔާސަތެއް ބައްޓަން ނުކުރެވޭ ކަމަށް މިއަދު ވެސް އަބްދުލްރަހީމް ތުހުމަތު ކުރެއްވި އެވެ.
"އިންޑިއާއަށް މި ރާއްޖޭގެ ކަނޑުތަކާއި ފަޅުތަކާއި ގިރިތަކާއި ރަށްތައް ވިއްކާ ނުލާ ވެރިކަން ކުރެވޭނެ ބޭފުޅަކު ދިވެހިންނަށް ފެނިއްޖޭ، އެއީ ރައީސް ޔާމީނޭ،" އޭނާ ވިދާޅުވި އެވެ.
އަބްދުލްރަހީމް ދެން އިޝާރާތް ކުރެއްވީ އެމްޑީޕީގެ ޕްރައިމަރީއަށް ތާއީދު ހޯއްދަވަން ރައީސް ސޯލިހްގެ ބޭފުޅުން ރޭ ބޭއްވި ޖަލްސާއަށެވެ. އެ ތަނުގައި މާ ގިނަ ބަޔަކު ނެތް އިރު، އެމްޑީޕީގެ ގިނަ ސަޕޯޓަރުން ވެސް ތިއްބެވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއެކު ކަމަށް ވިދާޅުވި އެވެ.
"ރައީސް ސޯލިހުގެ ނިމުން ގާތްވެއްޖެ، އަޅުގަނޑުމެން އިރާދަކުރެއްވިއްޔާ މި މަސައްކަތް ނިންމާލާނީ ރައީސް ޔާމީން އަލުން މި ރާއްޖޭގެ ވެރިކަމަށް ގެނައުމަށް ފަހު،" އޭނާ ވިދާޅުވި އެވެ.
މާލޭގެ އިތުރަށް މީހުން ދިރިއުޅޭ ގިނަ ރަށްރަށުގައި، ޔާމީންގެ ސަޕޯޓަރުން މިއަދު ހަވީރު މަގުމައްޗަށް ނުކުމެ އެމަނިކުފާނު މިނިވަން ކުރުމަށް ގޮވާލައި ހިނގާލުން އެބަ ބާއްވަ އެވެ.
