މޫދުގައި ދިރިއުޅޭ މަޑީގެ އެއްވެސް ބާވަތަކަށް ކާން ނުދިނުމަށާއި ދޯންޏާއި އެހެނިހެން އުޅަނދު ދުއްވާއިރު އެ ސޮރުމެންނަށް ބަލައިގެން ދުއްވުމަށް ތިމާވެށި ރައްކާތެރި ކުރާ އޮތޯރިޓީން އިލްތިމާސްކޮށްފި އެވެ.
އެންވަރަމެންޓް ޕްރޮޓެކްޝަން އެޖެންސީން ނެރުނު ބަޔާނެއްގައި މިއަދު ބުނީ، މި ދުވަސްވަރަކީ ޗުއްޓީ ދުވަސްވަރުކަމުން އެންމަޑި، ވައިފިޔަ މަޑި އަދި މަޑީގެ އެހެނިހެން ބާވަތްތައް ބެލުމަށް ބޮޑު ޑިމާންޑެއް ލިބޭ ކަމަށާއި ނަމަވެސް އެ ސޮރުމެންނަށް ގެއްލުން ލިބިދާނެ ފަދަ އަމަލުތައް ބައެއް މީހުންގެ ފަރާތުން ފާހަގެވަފައިވާ ކަމަށެވެ.
"ދަތުރުފަތުރުކުރުމުގަ އާއި ސްނޯކްލިންގް، ޑައިވިން، ކްރޫޒިން އަދި މޫދަށްއެރިއުޅުމުގައި ހިމާޔަތްކުރެވިފައިވާ މަޑީގެ ބާވަތްތަކަށް ނޭދެވޭ އަސަރު ފޯރާގޮތަށް ބައެއް ފަރާތްތަކުގެ އަމަލުތައް ހުރުމަކީ މިއެޖެންސީން ނުހަނު ކަންބޮޑުވާ އަދި ހިތާމަކުރާކަމެއް،" އީޕީއޭއިން ބުނެފައިވެ އެވެ.
ދިރޭ ތަކެއްޗާބެހޭ ގަވާއިދު ގެ ދަށުން ދިވެހިރާއްޖޭގެ ކަނޑުފަޅުގައި އުޅޭ ހުރިހާ ބާވަތެއްގެ މަޑި ވަނީ ހިމާޔަތްކޮށްފަ އެވެ. އެ ގަވާއިދުގެ ދަށުން، ހިމާޔަތްކޮށްފައިވާ ދިރޭ ތަކެތީގެ ތަބީއީ ނުވަތަ ގުދުރަތީ ނިޒާމަށް ބުރޫ އަރާނެ ފަދަ އަމަލެއް ކުރުމަކީ ވެސް މަނާ ކަމެކެވެ.
"ކަނޑުފަޅުގެ ދިރުންތަކަކީ އޮޅު ޖަނަވާރުކަމުގައި ނުވެފައި، އެތަކެތީގައި އަތްލާ، ކާންދީހެދުމަކީ އޭގެ ތަބީއީ ގޮތްތަކަށް އަދި ގުދުރަތީ ނިޒާމަށް ބުރޫ އަރާ، އަދި އެކި ކަހަލަ ބަލިތަކަށް މިދިރުންތައް ހުށަހެޅިގެންދާނެ ފަދަ އަމަލެއްކަން މި ފުރުސަތުގައި ހަނދާންކޮށްދެން،" އެ ބަޔާނުގައި ބުނެފައިވެ އެވެ.
އީޕީއޭއިން ބުނީ މަޑި ބަލައި ހަދަންވާނީ އެ ސޮރުމެންނާ މަދުވެގެން ތިން މީޓަރު (10ފޫޓު) ދުރުގައި ތިބެގެން ކަމަށެވެ.
"ކަނޑުފަޅުގައި އުޅަނދުފަހަރު ދުއްވާއިރުގައާއި ފަތުރުވެރިކަމާއި ގުޅޭ ހަރަކާތްތައް ކުރިއަށްގެންދިއުމުގައި އެއްވެސް ބާވަތެއްގެ މަޑީގެ ގުދުރަތީ ދިރިއުޅުމަށް ބޫރޫ ނާރާނެ ގޮތަށް މަދުވެގެން ތިން މީޓަރު ދުރުން މަޑީގެ ހިތްގައިމު މަންޒަރު ބަލާލުން އެއީ އެންމެ އެކަށީގެންވާގޮތް،" އީޕީއޭއިން ބުންޏެވެ.
އަދި ބައެއް މަޑީގެ ދިރުންތަކަކީ ކާނާހޯދުމަށް ލޮނުގަނޑު ކައިރިން ހަރަކާތްތެރިވެ އުޅޭ ދިރުންތަކަށްވާތީ މިހާލަތްތަކުގައި އެސޮރުމެންނަށް ގޯނާނުވާގޮތަށް އުޅަނދުފަހަރުގެ ދުވެލި މަޑުކުރުމަށާއި މޫދަށްއެރިއުޅޭ ފަރާތްތަކުން ވެސް މަޑިއަށް އުނދަގޫނުވާނެ ފަދައިން ހަރަކާތްތައް ގެންގުޅުމަށް ވަނީ އެދިފައެވެ.
ފަތުރުވެރިކަމުގެ ވިޔަފާރި ކުރާ ބައެއް ރިސޯޓުތަކުގައި ގަވައިދުން މަޑި، މިޔަރު އަދި އެހެންވެސް ކަނޑުގެ ދިރުންތަކަށް ކާންދިނުމަކީ ކުރަމުން އަންނަ ކަމެކެވެ. ނަމަވެސް އީޕީއޭއިން ވަނީ މިކަމުގެ ސަބަބުން އެތަކެތީގެ ސިއްހަތަށް އޭގެ ނުރަނގަޅު އަސަރުކޮށް އެފަދަ ދިރުންތައް ނެތިގެން ދިއުން އެކަށީގެންވާ ކަމަށް ބުނެފަ އެވެ.
