ހަނިމާދޫއިން ފަތުރުވެރިކަމަށް ބިން ދޫކުރަން ނިންމައިފި އެވެ.
އެރަށު ކައުންސިލުން ވަނީ ބިން ދޫކުރުމަށް ނިންމާ އެކަމުގައި ގެންގުޅޭނެ އުސޫލްތައް ފާސްކޮށްފަ އެވެ. ބިން ދޫކުރުމަށް ނިންމާފައި ވަނީ ހަނިމާދޫ އެއާޕޯޓް ސަރަހައްދުގެ އުތުރުން އޮންނަ ބީޗް ސަރަހައްދުންނެވެ. އެ ސަރަހައްދަކީ ޓުއަރިސްޓު ގެސްޓު ހައުސް އަދި ސިޓީ ހޮޓާތައް ހިންގުމަށް ރަށުގެ ލޭންޑުޔޫސް ޕްލޭނުގައި ކަނޑައަޅާފައިވާ ސަރަހައްދެކެވެ.
ހަނިމާދޫ ކައުންސިލުން ނިންމާފައި ވަނީ އެ ސަރަހައްދުން 5000 އަކަފޫޓުގެ ހަތް ބިން ފަތުރުވެރިކަމަށް ދޫކުރުމަށެވެ.
ބިންތައް ދޫކުރެވޭނެ އެންމެ ދިގު މުއްދަތަކީ 30 އަހަރު ކަމާއި، އެ ބިންތައް ދޫކުރާ ފަރާތުން އެހެން މީހަކަށް އެބިންތައް ދޫކުރުމަކީ މަނާކަމެއް ކަމަށް ކަނޑައަޅާފައިވެ އެވެ.
އަދި ބިންތައް ހަމަ އެކަނި ބޭނުންކުރެވޭނީ ޓޫރިޒަމް ބޭނުމަކަށްކަންވެސް ވަނީ ކަނޑައަޅާފަ އެވެ.
