ޕީޕީއެމުން ކުރިއަށް ގެންދާ ސިލްސިލާ މުޒާހަރާތަކުގެ ތެރެއިން، ރޭ ކުރިއަށް ގެންދިޔަ މުޒާހަރާގައި ހައްޔަރުކުރި 15 މީހަކު ދޫކޮށްލައިފި އެވެ.
އިދިކޮޅު ކޯލިޝަން ޕީޕީއެމް/ޕީއެންސީ ހިމެނޭހެން ސިލްސިލާ މުޒާހަރާތަކެއް ކުރުމަށް ނިންމާފައި ވަނީ ކުރީގެ ރައީސް އަބްދުﷲ ޔާމީނަށް ހުކުމްކޮށް، ޖަލަށް ލުމާ ގުޅިގެން، އެމަނިކުފާނު ދޫކޮށްލުމަށް ގޮވާލަ އެވެ.
ރޭ ކުރިއަށް ގެންދިޔަ މުޒާހަރާގެ ތެރެއިން 15 މީހަކު ހައްޔަރުކުރިއިރު، އެ މީހުން ވަނީ ރޭގެ ވަގުތެއްގައި ދޫކޮށްލާފައި ކަމަށް ފުލުހުން ބުނެފައިވެ އެވެ.
ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ، ޔާމީން 11 އަހަރަށް ޖަލަށް ލުމަށް ކްރިމިނިލް ކޯޓުން ހުކުމް ކުރީ އާދިއްތަ ދުވަހުގެ އިރުއޮއްސުމަށް ގާތްވެފައި އޮއްވަ އެވެ. އެއާއެކު ގިނަ އިރުތަކެއް ނުވެ، ކަރެކްޝަންސްގެ ބެލުމުގެ ދަށުން ޔާމީން މާފުށީ ޖަލަށް ގެންދިޔަ އެވެ.
ޔާމީން ދޫކޮށްލުމަށް ގޮވާލާ އާދިއްތަ ދުވަހުގެ ރޭ ވެސް މާލޭގެ މަގުތަކުގައި އިދިކޮޅު ލީޑަޝިޕާއި ސަޕޯޓަރުން މުޒާހަރާ ކުރި އެވެ. މަޖީދީ މަގާއި ޗާންދަނީ މަގު ހުރަސްވާ ކަންމަތިން ފެށި މި މުޒާހަރާ ފުލުހުން ރުޅާލާފައިވަނީ ބާރުގެ ބޭނުންކޮށް 16 މީހަކު ހައްޔަރު ކޮށްގެންނެވެ. ނަމަވެސް އެމީހުން ވެސް ވަނީ ދޫކޮށްލާފަ އެވެ.
ސިލްސިލާކޮށް މުޒާހަރާތައް ކުރިއަށް ގެންދިއުމުގެ އިތުރަށް އަންނަ ހުކުރު ދުވަހު ބޮޑު މުޒާހަރާއެއް ކުރުމަށް ޕީޕީއެމުން ވަނީ ނިންމާފަ އެވެ. ހުކުރު ދުވަހުގެ ހަރަކާތް ހުރިހާ ރަށެއްގައި ވެސް ހަވީރު 4:00 ގައި ފަށަން ހަމަޖެހިފައިވާއިރު، މާލޭގައި މުޒާހަރާ ފަށާ ސަރަހައްދެއް ފަހުން އިއުލާން ކުރާނެ ކަމަށް އެ ޕާޓީން ވަނީ ބުނެފަ އެވެ.
ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވަނީ ޔާމީނުގެ މައްޗަށް ކުރިމިނަލް ކޯޓުން ކުރީ 'ހަރާމް' ހުކުމެއް ކަމަށް ބުނާ ބުނުން ތަކުރާރުކުރައްވާފަ އެވެ. އަދި ހުކުރު ދުވަހުގެ ހަރަކާތަކީ ޔާމީނުގެ ސަޕޯޓަރުންނާއި އިދިކޮޅު ކޯލިޝަނުގެ މެންބަރުންނާއި ގައުމަށް ހެޔޮއެދޭ ފަރާތްތަކުން ބައިވެރިވާނެ ހަރަކާތެއް ކަމަށެވެ.
"އަޅުގަނޑު ދަންނަވާލަން ބޭނުން، އެންމެ ތަންފުކެއްވެސް ދޫނުކުރައްވާށޭ.. ކެރިގެން ރައްޔިތުން ނިކުމެވަޑައިގެން މި ގައުމު ސަލާމަތްކުރުމަށް ރައީސް ޔާމީން ފައްޓަވާދެއްވި މަސައްކަތުގައި ސާބިތުވެ ތިއްބަވާށޭ," އިދިކޮޅު ސަޕޯޓަރުންނާ އަބްދުއްރަހީމް ވިދާޅުވި އެވެ.
