މެންޗެސްޓާ (ޑިސެމްބަރު 27) - މެންޗެސްޓާ ސިޓީ އަށް ކުޅެމުންދާ ނޯވޭގެ ފޯވަޑް އާލިން ބްރައުޓް ހާލަންޑަށް އޭނާގެ ކެރިއަރު ނިމުމުގެ ކުރިން 800 ލަނޑު ޖެހިދާނެ ކަމަށް ގަބޫލުކުރާ ކަމަށް ސިޓީގެ މިޑްފީލްޑަރު ކެވިން ޑި ބްރޭނާ ބުނެފި އެވެ.
ޖަރުމަނުގެ ބޮރޫޝިއާ ޑޯޓްމަންޓް އިން މި ސީޒަންގައި ސިޓީ އަށް ބަދަލުވި ފަހުން ހާލަންޑް 22، ވަނީ ސިޓީ އަށް ކުޅުނު 19 މެޗުގައި 24 ލަނޑު ޖަހައިފަ އެވެ.
ޑި ބްރޭނާ ބުނީ ހާލާންޑް ފިޓުކޮށް ހުރެއްޖެނަމަ، އޭނާ އަށް ކެރިއަރުގައި 800 ލަނޑު ޖެހޭނެ ކަމަށް ގަބޫލުކުރާ ކަމަށެވެ.
"މިހާރު ވެސް ހާލަންޑް (ކެރިއަރުގައި) 200 ލަނޑު ހަމަކޮށްފި. އެހެންވީމަ ހާލަންޑް ފިޓުކޮށް ހުރެ، އޭނާ މިހާރު ކުޅޭ ގޮތަށް ކުޅެވެންޏާ އޭނާ އަށްް 600، 700 ނުވަތަ 800 ލަނޑު ވެސް ހަމަކުރެވޭނެ،" ސިޓީގެ ވައިސް ކެޕްޓަން ޑި ބްރޭނާ ބުންޏެވެ.
ޑި ބްރޭނާ ބުނީ އޭނާގެ ކެރިއަރުގައި ވަރަށް މޮޅެތި ފޯވަޑުންނާ އެކު ކުޅެވިއްޖެ ކަމަށެވެ. އެކަމަކު، އެ ހުރިހާ ކުޅުންތެރިންނާ އަޅާބަލާއިރު، ހާލަންޑްގެ އެންމެ ބޮޑު ތަފާތީ ލަނޑު ޖެހުމަށް އޭނާ ބޭނުންވާ މިންވަރު ކަމަށެވެ.
"ވަކިވަކި ކުޅުންތެރިން އަޅާ ކިއުމަކީ ފަސޭހަކަމެއް ނޫން. އެއީ ކޮންމެ ކުޅުންތެރިއެއްގެ ވެސް ތަފާތު ކަންތައްތަކެއް ހުރޭ،" ޑި ބްރޭނާ ބުންޏެވެ.
"އަހަންނާ އެކު ކުޅުނު ގިނަ ފޯވަޑުން ވަނީ ކެރިއަރުގައި 300 ނުވަތަ 400 ލަނޑު ހަމަކޮށްފަ. އެކަމަކު އަހަރެން ގަބޫލުކުރަނީ ހާލަންޑަށް އެ އަަށް ވުރެ އިތުރު ކުރެވޭނެ ކަމަށް. އެއީ އެހެން ފޯވަޑުންނާ އަޅާބަލާއިރު، ލަނޑު ޖެހުމަށް ހާލަންޑް އެކުރާ މަސައްކަތާއި އަޒުމް ވަރަށް ތަފާތު،" ޑިބްރޭނާ ބުންޏެވެ.
އިނގިރޭސި ޕްރިމިއާ ލީގުގައި ބުދަ ދުވަހުގެ ރޭ ލީޑްސް ޔުނައިޓަޑާ ދެކޮޅަށް ސިޓީ ނުކުންނާނެއެވެ. ލީޑްސް އަކީ ހާލަންޑް އުފަންވި ސިޓީއެވެ.
