އިލެކްޝަންސް ކޮމިޝަން (އީސީ) ގެ ސެކިއުރިޓީ ރޫމުގެ އިތުރުން ގުދަނަކުން ވެސް ވައްކަން ކޮށްފައިވާ ކަމަށާއި އެހެންނަމަވެސް އިންތިހާބަކާ ގުޅޭ އެއްވެސް ލިޔެކިޔުމެއް ގެއްލިފައިވާ ނުވާ ކަމަށް އެ ކޮމިޝަނުން ބުނެފި އެވެ.
މިދިޔަ މަހުގެ 30 ވަނަ ދުވަހު އެ ކޮމިޝަންގެ ސެކިއުރިޓީ ފޫމު ފަޅާލުމަށް ފަހު ވައްކަން ކޮށްފައިވާ މައްސަލައެއް ފުލުހުންނަށް ރިޕޯޓުކުރި ވާހަކަ މިއަދު މީޑިއާއަށް ވަނީ ތިލަވެފަ އެވެ.
މި މައްސަލައިގައި އީސީން މިއަދު ނެރުނު ނޫސްބަޔާނެއްގައި ބުނީ އޭގެ ފަހުން މި މަހުގެ 10 ވަނަ ދުވަހު ވެސް ބާ އަރަބިއްޔާގައި ހުންނަ އީސީގެ ގުދަނެއް ވެސް ފަޅާލައި ވައްކަން ކޮށްފައިވާ ކަމަށެވެ.
މި ދެ ވައްކަމުގައި ވެސް އެއްވެސް އިންތިހާބަކާ ގުޅޭ ލިޔެކިޔުމެއް ގެއްލިފައި ނުވާ ކަމަށް އީސީން ބުނެ އެވެ.
އީސީން ބުނީ ސެކިއުރިޓީ ރޫމުން ގެއްލިފައިވަނީ ފަސް ނެޓްބުކު ކަމަށެވެ. އަދި، ގުދަނުގައި ހުރި 11 ޔޫޕީއެސްއާއި 65 އިންޗީގެ ދެ ޓީވީއާއި ދެ ސްޕީކަރު ސެޓާއި 10 މީޓަރުގެ ކަރަންޓު އެކްސްޓެންޝަން ބޯޑެއް ވަގަށް ގެންގޮސްފައިވާ ކަމަށެވެ.
"މި ދެ ހާދިސާއާ ގުޅިގެން މިހާރު ބޭއްވުމަށް ހަމަޖެހިފައިވާ ބައި-އިލެކްޝަންތަކަށް އެއްވެސް އަސަރެއް ނުކުރާނެ އެވެ،" އީސީން ބުނެފައިވެ އެވެ.
އެ ކޮމިޝަނުން އިތުރަށް ބުނީ މި ހާދިސާތަކާ ގުޅިގެން އީސީގެ އޮފީސްތަކުގެ ސެކިއުރިޓީ ކަންކަން ވަރުގަދަ ކުރުމަށް ޓަކައި ކުރަން ޖެހޭ ހުރިހާ މަސައްކަތެއް ކަމާ ބެހޭ އިދާރާތަކާ ގުޅިގެން ކުރަމުން އަންނަ ކަމަށެވެ.
