އިލެކްޝަންސް ކޮމިޝަން (އީސީ) ގެ ސެކިއުރިޓީ ރޫމު ފަޅާލައިފި އެވެ.
ފުލުހުން ބުނީ މިދިޔަ މަހުގެ 30 ވަނަ ދުވަހު އެ ކޮމިޝަންގެ ސެކިއުރިޓީ ފޫމު ފަޅާލުމަށް ފަހު ވައްކަން ކޮށްފައިވާ މައްސަލައެއް އެ އިދާރާއަށް ހުށަހަޅާފައިވާ ކަމަށެވެ.
"އިލެކްޝަންސް ކޮމިޝަންގެ ސެކިއުރިޓީ ރޫމުން ވައްކަން ކޮށްފައިވާ މައްސަލަ ނޮވެމްބަރު 30 ވަނަ ދުވަހު ފުލުހުންނަށް ރިޕޯޓްކޮށްފައިވޭ،" ފުލުހުން މީޑިއާތަކަށް ފޮނުވި މެސެޖުގައިވެ އެވެ.
އެ މައްސަލައަކާ ގުޅިގެން މިހާތަނަށް މީހަކު ހައްޔަރުކޮށްފައެއް ނުވެ އެވެ.
ވައްކަން ކުރި ތަކެތީގެ މައުލޫމާތު އަދި ހާމަކޮށްފައިނުވާއިރު، އެ ތަނަކީ އިންތިހާބުތަކުގެ ވޯޓު ކަރުދާސްތައް ވެސް ބަހައްޓާ ތަނެވެ. އަންނަ ހޮނިހިރު ދުވަހު ބައެއް ކައުންސިލްތަކުގެ ބައި-އިލެކްޝަން ވެސް އެބަ އޮތެވެ.
އެކަމާ ގުޅިގެން ސުވާލު ކުރުމުން އީސީގެ ނައިބު ރައީސް އިސްމާއީލް ހަބީބް ވިދާޅުވީ އެ ތަނުން އެއްޗެއް ގެންގޮސްފައި ނެތް ކަމަށާއި އަދި މާ ބޮޑު ގެއްލުމެއް އެ ކޮމިޝަނަށް ލިބިފައި ނެތް ކަމަށެވެ.
